Proverbios 31 - Bible in Tzotzil de Chamula

Ti Lemuele laj yal ti oy xi x'ale ti c'ope

¹ Xi laj yal ti Lemuel ajvalil ta jteclum Masae, ti tojobtasat o yu'un ti sme'e:

² Stojol ti xivocolet ta stojol ti Diose, laj jvoq'uesot un, cuni ol, ¿mi oy la yan ti c'usi ta xcalbot une?

³ Mu xavilbajin aba yu'un ti antsetique, yu'un ja' ta scoj ta xch'ay ta be ti ajvaliletique.

⁴ Le' une, cuni Lemuel, mu lecuc ma' ti x'uch'obajic no'ox ti banquilal ajvaliletique, ti its'inaletique, ti xyal no'ox yu'unic ti vinoe, ti pasem uch'bolale.

⁵ Xu' ta xc'ot ta pasel un, ta xch'ay ta yo'ntonic ti oy c'usi jbel tsots albile, ti mu xa xaq'uic ta venta sc'op ti buch'utic abol sbaique.

⁶ Ti ya'lel uvae, ti c'usitic yan pasemique, q'uelo no'ox ti yuch'icuc ti buch'u tsalbile, ti mu'yuc yipal yu'unique.

⁷ Yuch'icuc un, bal to xa'i mu xvules ta sjol ti me'unale xchi'uc ti svocolique.

⁸ Tic'o ave ta spojel ti buch'u mu x'a'yibat ti sc'opique; va'ano aba ta spojel un ti buch'u mu xpac yu'un ti sc'oplalique.

⁹ Tic'o ave ati', tsatsajan ta xchapanel un; va'ano aba ta spojel ti me'un mu'natetique, xchi'uc ti mu xpac yu'un ti sc'oplalique.

Yich'el ta muc ti ants ti lequil yajval na ta stuc'ulanel scotole

¹⁰ Ti ants ti lequil yajval na ta stuc'ulanel scotole, nomantic bu ta tael, ja' mu sta sc'oplal yutsiquil ti baxtone.

¹¹ Spatoj lec yo'nton yu'un ti smalale, xtojob, xloc' venta ta x'ile.

¹² Ti c'u sjalil cuxule, naca lec ta spas ta stojol ti smalale.

¹³ Ta sa'ilan tsots xchi'uc xela no, xmuyubaj no'ox ta xabtelan c'usitic c'upil sba ta xloc' ta luchel yu'un.

¹⁴ Co'ol s'elan jbolomajel barco ta nom ta xich' talel ti c'usitic ta xtun yu'une.

¹⁵ Yamal to sna' xjulav, sob no'ox ta smalq'uinan yalab xchi'uc sme' mosovtac.

¹⁶ Ta x'och ta xpaxyaltael banomil, mi lec laj yil une, ta sman un, ta sventa ti slubel xchamel une, ta xlic sts'un uva.

¹⁷ C'alal ta xil stsac xa yip ti yabtele, sjunul yo'nton ta xac'be yipal.

¹⁸ Mu xch'ay juteb sat ti mu xtub ti sbolomale; sob ta stam, mal xa c'ac'al ta xicta ti yabtele.

¹⁹ Ta xpich' yoc sc'ob ta snaunel no xchi'uc ta sjalel.

²⁰ Ta stic' sba ta scoltael ti me'un mu'nate xchi'uc ti buch'u mu'yuc c'usi x'ayan yu'unique.

²¹ Ti ta yorail taive, mu svul yo'nton ta stojol c'u yepal oy ta snae, scotol ti c'u yepalique, oy lec pimic sc'u' yu'un.

²² Ta smeltsan pimiquil tasil yu'un stuc, jun yutsil ti sc'u' ta slape.

²³ Ti smalale, ojtiquinbil ta jteclum yu'un, cajal sc'oplal c'otem jech c'u cha'al buch'u ich'bil ta muc' ta jteclume.

²⁴ Ta smeltsan loin c'u'iletic xchi'uc chuquiletic ma' ti stuc une, ta xchonbe ti jmanolajeletique.

²⁵ Yip c'otem ta xa'i ti mu'yuc buch'u xpojbun ti yutsilale; ma'uc xvulvun yo'nton xchi'uc ti c'usi ta xc'ot ta pasel ti oc'om cha'eje.

²⁶ Naca ta sbijil ti c'usi ta xloc' ta yee; ta xchanubtasvan ta yutsil slequil yo'nton.

²⁷ Stuc'ulanoj c'u s'elan ti yut snae; ti ma'uc ta yabtel staoje, j'ech'el mu stun slajes.

²⁸ Xi ta x'albat sc'oplal yu'un ti yalab xnich'nabe xchi'uc ti smalale:

²⁹ “Ti alac' sba antsetique, yepal oy, le' une, atuc no'ox ti jelavem yutsil ti avo'ntone.”

³⁰ Ti lo'lajem o'ntonal yu'un ti yutsiquilique, ch'ayel xal o, ti alac' sba ta q'uelele, ac'vanej no'ox ta pich' o'ntonal; yan ti ants sna' xi'ta ti Diose, sc'otebal o ti lequil c'optabile.

³¹ Ta sba satuc scotol jteclum, lequil c'optabiluc. Ich'biluc c'otuc ta muc' scotol yutsil ti yabtel laj spase.