Proverbios 3 - Bible in Tzotzil de Chamula

Sc'oplal c'u s'elan ta tael ti bijilile

¹ Ti c'u s'elan laj jchanubtasote, cuni nich'on, mu xach'ay ta avo'nton, bejeluc ta ajol ti jmantaltaque,

² jech ta xata ti ta xnatij acuxlejal une, mu'yuc c'usi xana' ta x'ech' avu'un ti c'ac'ale.

³ J'ech'eluc mu xavicta ti xc'uxul avo'ntone, ti meleluc ti ac'ope, ti uinbiluc avu'un jech c'u cha'al ti nats'ile. Bejeluc ta ajol ta avo'nton,

⁴ jech ta xata ti lec xa'ile yu'un ti Diose, xchi'uc ta stojol ti jnaclejetique.

⁵ J'ech'eluc pato avo'nton ta stojol ti Diose, ma'ucuc ti c'u s'elan ta xac' ti snopobil avu'une.

⁶ Ta scotol ti c'usi ta xapase, sventainojuc ti Diose, va'i unbi, ta stojobtasot batel ta tuq'uil be.

⁷ Xi s'elan sc'an pasele: mu xabis aba ti ech'em xa abijile, xi'tao ti Diose, ch'aco aba ta spasel ti chopole.

⁸ Taje, ja' jun lequil poxil sventa yo' chijtsatsub yu'un.

⁹ Tuneso ta yich'el ta muc' Dios xchi'uc ti c'usitic x'ayan avu'une, xchi'uc ti sba sat-tac ats'unob xloc' x'ayane,

¹⁰ va'i unbi, bujul no'ox ta xata ti sq'uejobiltac ti c'usitic x'ayane, xchi'uc ti xch'amlebtac ya'lel uvae.

¹¹ Cuni nich'on, mu xabaj ti tojobtasel yu'un ti Diose, mu chopoluc xava'i ti tuq'uibtasel yu'une.

¹² Yu'un ta xtojobtasat ti buch'u mu tuch'baj ta o'ntonal ta x'a'yie yu'un ti Diose jech c'u cha'al ti totil ta stojobtas ti xnich'on ti mu jipbaj ta xa'ie.

¹³ Mu'yuc c'usi sna' ti buch'u laj sta ti sbijile, ti laj sta ti snopbenale,

¹⁴ yu'un ech'em stunel, ja' mu sta ti platae, yepal yabtel, ja' mu sta ti oroe.

¹⁵ Ti bijilil une, tsots sc'oplal, ja' mu sta ti c'upil sba tonetique, mi ja'uc sta sc'oplal ti c'usitic xbic'taj o'ntonal yu'une.

¹⁶ Ta xnatij ti cuxlejal yu'une, ta xac' c'ulejal xchi'uc ich'el ta muc'.

¹⁷ Mi tambil batel ti c'usi ta xale, jun yutsil ta j'ech'el; mi tambil batel bu ta x'ic'van batele, ch'iel c'opojel xal unbi.

¹⁸ Ti buch'u oy yu'un ti bijilile, cuxlejal ta j'ech'el; mu'yuc c'usi sna' ti buch'u xtojob ta stunesele.

¹⁹ Ti laj sva'an vinajel banomil ti Diose, ta sbijil ta snopobil yu'un.

²⁰ Ti laj xch'ac sba yu'un ti nabe, ti ta xac' job ac'ubal ti toque, ta sbijil no'ox.

²¹ Oyuc ta ajol ti tuc'uc snopobil avu'une, cuni nich'on, mu xch'ay xava'i ti bijbijane.

²² Ta xacuxi yu'un, ti c'upil aba ch'alalot xchi'uc jech c'u cha'al ti uile.

²³ Apatoj avo'nton ti bu yalel muyelote, j'ech'el mu xabosi avoc.

²⁴ Mi jutebuc xi'el ta xava'i c'alal ta xacux avo'ntone; c'alal ta xapuch'an abae, jun avo'nton ta xavay.

²⁵ Mu xaxi' yu'un ti c'usi ta xvul ta loq'uel ti xi'bal sbae, mi ja'uc ti c'usi ta xvul ta stojolic ti buch'utic mu'yuc xch'ulel xa'i sbaique,

²⁶ yu'un ti Diose ta xac'bot yip avo'nton, mu sq'uelojuc ta xabaj ta buyuc no'ox pets'.

²⁷ Mu xajalta mi oy buch'u ta sc'an coltaele, tic'o aba ta scoltael c'alal xu' avu'un une.

²⁸ Ti coltaele, mu xacomtsan ta yoc'omal c'alal stac' xapas ti c'ac'al tana li'e.

²⁹ Mu xtal ajol ta pasbel chopol ti buch'u spatoj yo'nton ta atojole.

³⁰ Mu xatsacvan ta leto mi mu'yuc buch'u ti c'usi chopol ta spasbote.

³¹ Mu it'ixuc xava'i yu'un ti buch'u ts'i'uneb xa'i sbae, ma'ucuc ti xac' xa ajol ta spasel jech c'u cha'al ta spase,

³² yu'un ti Diose mu sc'an sq'uel ti buch'utic mu'yuc xch'ulel xa'i sbaique, ja'uc ti buch'u oy slequil yo'ntonique, ta xac'be spatobil yo'nton.

³³ Ti Diose ta sbisbe ta cotol chaval sna ti buch'u mu'yuc xch'ulel xa'i sbaique, ja'uc ti buch'u oy stuq'uil sjol yo'ntone, sva'anoj sba ta stojol.

³⁴ Ti Diose xlabaj no'ox ta stojol ti jlabanvanejetique, oy yutsil yo'nton ta stojol ti buch'u biq'uit yac'oj sbaique.

³⁵ Ti buch'u bijique c'otem ta smotonic ti cajal sc'oplalique, yan ti buch'u pimunebique, ja' xa yuni motonic ec un ti bajbil tenbile.