Proverbios 29 - Bible in Tzotzil de Chamula

¹ Ti buch'u xtac'tun no'ox c'alal ta xich' tojobtasele, ta jech yepal ta xlic sta ti svocol une.

² C'alal cuchem yu'unic ti buch'u oy stuq'uilique, xmuyubajic no'ox ma' ti jnaclejetique; c'alal cuchem yu'unic ta spasel mantal ti buch'u mu'yuc xch'ulel xa'i sbaique, oyic ta vocol ti jteclume.

³ Ti bijil nich'onile, xmuyubaj no'ox yu'un ti stote; ti buch'u xlotet xchi'uc ants sna' sbolomalin sbae, ta xixlan staq'uin.

⁴ Ti oy stuq'uil ta ventainvanej ti ajvalile, mu'yuc c'usi sna' ti slumale, ja'uc ti buch'u ja' no'ox sc'an ti patane, ta soques ti jteclume.

⁵ Ti buch'u xch'i o xa'i ta stoyesbel sc'oplal ti buch'u lec xil sba xchi'uque, le' une, yuni yacobil stuc ta sta.

⁶ Spets'al ti buch'u mu'yuc xch'ulel xa'i sbae, ta scoj no'ox smul stuc; ti buch'u oy stuq'uile mu'yuc c'usi sna', xmuyubaj no'ox cuxul.

⁷ Ti buch'u oy stuq'uile ta xchiquintabe sc'op ti me'un mu'nate, ja'uc ti buch'u mu'yuc xch'ulel xa'i sbae, mu sventauc.

⁸ Ti jliquesej c'opetique, xvochvun no'ox yu'un sjunul ti jteclume; ti buch'u oy sbijilique ta slamajes c'alal c'ac'uneb ti o'ntonale.

⁹ Ti bijil vinique, mi ta stsac ta c'op ti mu'yuc xch'ulel xa'i sbae, xcap sjol xchi'uc un, ta xlabanat, mu'yuc c'usi ta xchapaj yu'un.

¹⁰ Ti j'ac'vanej ta milele, xchi'uc ti buch'utic mu'yuc xch'ulel xa'i sbaique, juteb ta yo'ntonic ac'o chamuc ti buch'u oy stuq'uil yo'ntone.

¹¹ Ti buch'u pimunebe, j'ech'el ta sbusan ti bu xa oy ti sc'ac'al yo'ntone, ja'uc ti buch'u oy sbijile, ta lec no'ox spajes sba.

¹² Ti lec xa xa'i staq'uel jutbil c'op ti ajvalile, ta soques scotol ti yajtuneltaque.

¹³ Ti buch'u ta xich' ilbajinele, xchi'uc ti buch'u ta x'ilbajinvane, xi yuni c'oplalic xchibalique: co'ol ac'bil satic ta sq'uelel osil yu'un ti Diose.

¹⁴ Ti ajvalile jal ta xchoti ta pas mantal mi c'alal ta me'un mu'nat ti oy lec smelol ti c'u s'elan sta o sc'an pasbel ta stojolic ta xile.

¹⁵ Ti xc'amlij jmojuque, xchi'uc ti oy vulele, oy c'usi ta xich' tael yu'un un, ja'uc ti nich'onil q'uelbil no'oxe, ta xac' ta q'uexlal ti sme'e.

¹⁶ Ti yepal no'ox oy ti mu'yuc xch'ulel xa'i sbaique, yepal ti mulile; ti ta sta ti svocolic une, ta xilic ti viniquetic ti oy stuq'uilique.

¹⁷ Tojobtaso ti anich'one, jun avo'nton ta xacuxi yu'un, ta xata ti atuc xa no'ox mu'yuc buch'u xtaun ta xava'ie.

¹⁸ Ti bu mu'yuc tojobtasel ti liquem talel ta toyole, naca chopol ta xc'ot ta pasel; mu'yuc c'usi sna' ti jteclum mi xc'ot ta pasel yu'un ti oy c'usi jbel tsots albil yu'un ti Diose.

¹⁹ Mu xtuq'uib ta eil no'ox ma' ti mosovile, ac'o mi ta xa'i, mu xch'un un.

²⁰ Ti buch'u mu snopojuc xbet'bun no'ox ti ye ta soquesvaneje, mu ts'icbaj, ja' xi to jutuc ti buch'u pimunebe.

²¹ Ti buch'u sq'ueloj no'ox ti smosov c'alal biq'uit toe, ts'acal to xcha'na' xa liquel un.

²² Ti buch'u jtsoc' jtij ta c'ope, jliquesej leto, mu no'ox albajuc yepal ta xjelav.

²³ Ti buch'u toyobbae ta soques yuni c'oplal stuc; yan ti buch'u peq'uel ta xac' sbae, ta sta lec sc'oplal.

²⁴ Ti buch'u co'ol sba xchi'uc ti j'eleq'ue, laj xa sten sba xcaltic, ac'o mi ta sbise ta cotol chaval, laj ta alel ti ta svinajes sbae.

²⁵ Ti xi'el yu'un ti viniquetique, muc'ul tsalel ta j'ech'el; ti buch'u spatoj yo'nton ta stojol ti Dios une, chabibil lec.

²⁶ Yepal oy buch'u ta sa'ic pojel chapanel ta stojol ti ajvalile, le' une, ja' no'ox ta stojol Dios oy chapanel.

²⁷ Ti buch'u oy stuq'uilique mu ts'icbaj ta xa'iic ti buch'u mu'yuc xch'ulel xa'i sbaique, jech ec ti buch'u mu'yuc xch'ulel xa'i sbaique mu ts'icbaj ta xa'iic ti buch'u oy stuq'uilique.