Proverbios 26 - Bible in Tzotzil de Chamula

¹ Mu snupin sba oy taiv c'alal yorail ti vo'e. Mu snupin sba oy chaquilo' c'alal yorail ta xich' stsobel ti ts'unubale. Mu snupin sba ich'bil xa ta muc' ti buch'u pimunebe

² Ma'uc ti q'uelel xa talel bac vocol mi mu'yuc c'usi pasbile, ech'el no'ox ta xjelav batel jech c'u cha'al jch'ayemal ts'unun, mi mo'oje, jech c'u cha'al xjaval-eq'uen ti mu sna' bu com ti stase.

³ Sc'an ochesel ta be ti ca'e, sc'an ac'bel spajesobil ti burroe, sc'an tojobtasel ec ti buch'u pimunebe.

⁴ Ti buch'u mu tac'biluc ta muc' ya'yej ta xc'ot yu'un ti buch'u pimuneb xa'i sbae, mu xchanbe sbolil xchi'uc ti spimile.

⁵ Jech c'u cha'al ti spimile, ja' jech xatac'be sutel sc'op ti buch'u pimuneb xa'i sbae, yo' mu spac'ta sba ti oy sbijil ti c'usi ta xale.

⁶ Co'ol s'elan ta xasa' c'op, mi ta xaboj avoc, ti apatoj xa avo'nton ta staquel ta j'al-mantal j'ich'-c'op ti buch'u pimuneb xa'i sbae.

⁷ Ti jc'asemal-oque mu xc'ot ta nom, ja' jech ti nichimal c'ope mu x'ayan talel ta stojol ti buch'u pimuneb xa'i sbae.

⁸ Mi chucbil ti ton ta spec'ul ti jimich'e, yac' xa unbi, jech ta xc'ot ta stojol ti buch'u utsuc xa stoyesbe sc'oplal ti buch'u pimuneb xa'i sbae.

⁹ Ti ts'apajtic ch'ix ta sbec'tal ti jyacubele, mu xa'i, ti oy xi x'ale ti c'ope, mi ja'uc xa'ibe smelol ti buch'u pimuneb xa'i sbae.

¹⁰ Co'ol s'elan j'ac'-yolob ti sbijil satioj scotol ti buch'u ta x'ech'e, jech ta xc'ot ta stojol ti buch'u ta xac' abtejuc ta sna ti buch'u pimuneb xa'i sbae.

¹¹ Ta xcha'lo' xenel ma' ti ts'i'e; mu xicta spimil ec ti buch'u pimunebe.

¹² Stac' to ts'icbel jutuc ti buch'u pimunebe, ja' mu sta ti buch'u ta snop jelavem ti sbijile.

¹³ Yo' mu x'abtej ti ch'ajil vinique, utsuc xa xalilan ti oy león ta bee.

¹⁴ Ti ti'nae xlevet no'ox yu'un ti stsacobiltaque; xlevet no'ox ta stem ec ti buch'u ch'ajunebe.

¹⁵ Ti jun ch'ajil vinique naca stsac no'ox ti c'usi oy ta sets'e, le' une, naca ac'bil ta ye sti' ta sc'an.

¹⁶ Ti buch'u ch'ajunebe, ta snop ech'em ti sbijile, ti mu sta sbijil mi oy vucub (7) viniquetic sna'ic staq'uele.

¹⁷ Ti ta xatic' aba ta letovajel ti ma'uc c'otem ta aventae, co'ol s'elan ta xmich'be ta tsaquel xchiquin ti ts'i'e.

¹⁸ Jun chuvaj s'elan ti buch'uuc naca xach'be no'ox yolob ti oy sc'ac'al sni' ti chamebal xale.

¹⁹ Ja' jech s'elan ec ti buch'u lec lectic sba ta slo'la ti buch'u lec xil sba xchi'uque, ts'acal to un, ta xal ti naca tajimol no'ox ta stojole.

²⁰ Mi ch'abal ti si'e, ta xtub ti c'oq'ue; mi mu'yuc ti lo'iltaele, ch'abal ti letoe.

²¹ Ti chac-uban no'ox ti c'oq'ue, sc'an ac'al; ta tilesel ti c'oq'ue, sc'an si'; yo' ta xich' yip ti letoe, yabtel pochanil.

²² Chi' poj xa yutsil ta ya'yiel ma' ti lo'iltavaneje, c'alal to yut o'ntonal ta xc'ot ta j'ech'ele.

²³ Ti c'upil sba bonbil ta plata ti bine, jech yutsil ye sti' ti buch'u chopol snopoj ta yo'ntone.

²⁴ Ti buch'u xti'et ti sjole, mu xac' iluc c'alal ta xc'opoje, ta yut yo'nton une, mu albajuc ma' ti c'usi chopol ta spase.

²⁵ Ma' ti jun xa yutsil ta sc'oponote, mu xach'un un, spajebal no'ox snopoj ma' ti chopol une.

²⁶ Ac'o mi mu xac' ta ilel ti sti'emal sjole, ta xc'ot ta t'omel scotol ma' ti c'usi chopol snopoje.

²⁷ Ta xbaj yalel stuc ti buch'u yacal ta sjomel ti banomile; ta xnet'at yu'un ti buch'u ta svalc'un batel ti tone.

²⁸ Ti buch'u jutc'ope xti'et sjol yu'un ti melele; ti buch'u jun xa yutsil xlamet ti ye sti' spas sba yilele, xvochvun no'ox liquel yu'un ti c'ope.