Proverbios 25 - Bible in Tzotzil de Chamula

Xcha'cojal ti laj svol ta alel ti Salomón ti oy xi x'ale ti c'ope

¹ Ti li' une, ja' yu'un Salomón ti oy xi x'ale ti c'ope, ti xi laj xcha'loc'taic ta ts'ibael yajtuneltac ti Ezequías ajvalil yu'un ti Judae:

² Yich'el ta muc' ti Dios une ti oy c'usi mucul yu'une. Yich'el ta muc' ti ajvalil ta sventa ti jamal lec ti yo'ntone.

³ Ti c'u s'elan ta snop ti ajvaliletique, mu na'baj ta j'ech'el, co'ol s'elan staylej ti vinajele xchi'uc spimil ti banomile.

⁴ Ti platae ta xich' chajel ta sapel, ta smeltsan ta bis ti j'unijesej-plata une.

⁵ Ti ajvalil ti ta sloq'ues ta yajtunel ti buch'u mu'yuc xch'ulel xa'i sbae, stsacoj lec yip ta spasel mantal.

⁶ Mu xavac' aba ta ich'el ta muc' bu oy ti ajvalile, mi ja'uc ti ta xac'otes aba jech c'u cha'al ti buch'u ich'bilic ta muq'ue.

⁷ Mi ta sba ta sat tenbil ta xaloc' ti buch'u ich'bilic ta muq'ue, tsalvan xa unbi, mi ic'bilot muyel ti bu taje, lec unbi. Ti c'usi laj avil ta aba ta asat une,

⁸ mu xabitet ta anil ta yalel ta chapanobbail xchi'uc. Le'e, naca mi oy yan rextico ta xal ti mu jechuque, mu stac' a'yeluc c'usi ta xapas xchi'uc unbi.

⁹ Pojo aba yu'un ti buch'u ta sa'bot amule, mu aveuc xa ta yalel ti c'usi ma'uc c'otem ta aventae.

¹⁰ Xu' xayac' ta q'uexlal mi oy buch'u laj ya'ie, mu'yuc xa c'usi xavut aba ti laj asoques ti ac'oplale.

¹¹ Ti sc'otebal o c'ot ti c'op bu stamoje, co'ol jech c'u cha'al jbej sloc'obbail mantsana meltsanbil ta oro, ti nichimtasbil ta platae.

¹² Co'ol s'elan ixtolal c'obal, mi co'ol s'elan nats'il meltsanbil ta lequil oro, jech yutsil ti buch'u xtojob ta lequil tuq'uibtasvaneje.

¹³ Ti lequil j'al-mantal j'ich'-c'op ti tacbil batele, co'ol s'elan jun bot ta xc'ot ti siquet xa yutsil c'alal q'uixin ti banomile, yu'un xcuxet to banomil ta xa'i yu'un ti yajvale.

¹⁴ Ti buch'u ye xa yilel oy c'usi ta xac' ti mu xc'ot ta pasel yu'une, jech s'elan c'otem jech c'u cha'al toc, mi jech c'u cha'al ic' ti mu xtal ti vo' yu'une.

¹⁵ Ti oy sts'iquemal xcuchemale, ta x'ech' ti sti'emal jolale; mu stsac yip mi xlamet no'ox ti c'op ta xich' taq'uele.

¹⁶ Mu ech'emuc xalo' mi oy bu laj ata ti ajapome, naca mi xenan xchi'uc mi ech'em lalo'e.

¹⁷ Ma'uc xapas ti xava'vun ta svu'lanel ti buch'u lec xavile, naca mi sti'joltaot.

¹⁸ Ti buch'u naca jeche' no'ox oy c'usi ta xalbe ti lec xil sbaic xchi'uque, co'ol s'elan majob te', mi espada, mi ni' yolob ta xac'be.

¹⁹ Ti xapat xa avo'nton ta stojol ti jpay c'op ti oyot ta vocole, co'ol s'elan c'asem xa avacan, mi co'ol s'elan tsacbilot ta c'uxben chon ti mu xac' ve'an yu'un ti yavanele.

²⁰ Ti buch'u ta xq'uejin ta stojol ti buch'u oy ta vocole, co'ol s'elan ta xich' jaxbel ats'am ta syayijemal ta xa'ie, mi ta xloc'bat sc'u' ta xa'i c'alal ja' o yorail ti sique.

²¹ Mi ta xvi'naj, mi ta xa'i taqui ti'il ti avajcontrae, ac'bo sve'el yuch'om.

²² Dios ta xasq'uextabot sutel, chac pochan xa sat avu'un ta q'uexlal.

²³ Ti ic' ta xlic talel ta yolon xocon sloq'ueb c'ac'ale, ta xtal ti chaquilo'e; Ti chopol ti c'usi ta xloc' ta alele, ta xlic ti soquem xa ti satile.

²⁴ Ja' xi to smuc'ul ma' ti naclej ta jun biq'uit nae, ja' mu sta c'alal nacalot ta jun muc' ta na xchi'uc ti jun jti'oltavanej antse.

²⁵ Ti lequil a'yejetic ta xpuc talel ta namal banomile, co'ol xa s'elan siquilo' xjaxet ta xyal ta uch'el.

²⁶ Ti buch'u ch'abal smule, mi ta xnic ta xi'el ta stojol ti buch'u oy smule, co'ol s'elan tat puc'an sat vo' xchi'uc yepal yic'obal ta q'uelel

²⁷ Mu lecuc mi ep ta xbat slo'el ti ajapome. mu lecuc xtoc mi xasa' avich'el ta muq'ue.

²⁸ Ti buch'u mu xa'ibe xchiquinal ta spajesel sbae, co'ol s'elan jun jteclum ch'abal smocal ta q'uelel ti vocol ta xvul ta stojole.