Proverbios 21 - Bible in Tzotzil de Chamula

¹ Mi oy ta yoc sc'ob Dios snopbenal yu'un ti ajvalile, co'ol s'elan yoc uc'um x'uc'ubinaj no'ox stamoj batel c'usi ta sc'an ti Diose.

² Scotol lec yilel c'usi stamoj ta spasel ti vinique, Dios xojtiquin un c'u s'elan ti o'ntonale.

³ Ac'bo yipal ta spasel ti c'usi lec ta pasele, xchi'uc ti tuq'uilale; tsots sc'oplal ta xa'i ti Dios taje, ja' mu sta sc'oplal ti milbil matanale.

⁴ Ti mulil oy ta stojolic ti buch'u mu'yuc xch'ulelique, ja' ti quemelic no'ox ti satique, ti xcajetic no'ox xchi'uquic ti snopbenale.

⁵ Mi nopbil lec c'usi ta xich' pasele, lec ta xc'ot ta pasel, ja'uc mi ta anil no'ox nopbile, vocol xal o.

⁶ Ti naca ta jutbil ta xich' tael ti c'ulejale, mu jaluc ti muyubajele, yac' o xa sjol sbaquil yu'un un.

⁷ Ta yuni capemal no'ox xac' sjol sbaquil xchi'uc ti buch'u mu'yuc xch'ulelique, ta scoj ti mu stamic ta spasel ti c'usi oy stuq'uile.

⁸ Ti bu stamoj batel ti buch'u mu'yuc xch'ulel xa'i sbae, chib sc'oplal yaloj, yu'un jot o ti bu stamoj batele; ti c'usi ta spas ti buch'u oy stuq'uile, jun yutsil ta j'ech'el.

⁹ Ja' xi to smuc'ul ma' ti naclej ta uni biq'uit nae, ja' mu sta ti naclej ta jun muc' ta na xchi'uc jun jti'oltavanej antse.

¹⁰ Naca chopol yac'ojbe yipal ta spasel ti buch'u mu'yuc xch'ulel xa'i sbae; yic'obal no'ox sat ta sq'uel ti xchi'iltaque.

¹¹ Mi mu q'uelbiluc no'ox ti buch'u pimunebe, ta xtojob liquel ec ti buch'u xtoyet xa'i sbae, ja'uc ti buch'u bije, ta jbel no'ox c'op jc'otel ta yo'nton.

¹² Ti lequil tuq'uil Diose chajal ta sba ta sat ta sq'uelel talel c'usi ta xc'ot ta pasel yu'un ta yut sna ti buch'u mu'yuc xch'ulel xa'i sbae, xchi'uc ta sta svocol yu'un ti buch'u mu'yuc xch'ulel xa'i sbae.

¹³ Ti buch'u mu xa'ibe sc'op ti me'un mu'nat c'alal xvocolete, mi ja'uc ta x'a'yibat sc'op ec ti c'alal xvocolete.

¹⁴ Manchuc mi tsots ta j'ech'el ti c'ac'al o'ntonale, ta xlamaj mi ta xc'ot ta mucul ti matanale.

¹⁵ C'alal oy lequil chapanele, jech ti buch'u oy stuq'uile, xmuyubaj xa, ja'uc ti buch'u mu'yuc xch'ulel xa'i sbaique, ta sta svocolic.

¹⁶ Ti buch'u ta xicta sba ta spasel ti c'usi leque, lajel tubel sq'ueloj batel.

¹⁷ Ti buch'u ta xac'be sba c'usi xal ti yo'ntone, ti xyal o ta uch'ubajele, ti xjiq'uet ta muil poxil ta xanave, ta xc'ot ta me'un mu'nat xchi'uc.

¹⁸ Svocol ti lamal ox ta xc'ot ta stojol ti buch'u oy slequil stuq'uile, ja' lamal ta xc'ot ta stojol ti buch'u mu'yuc xch'ulel xa'i sba ta lo'lavaneje.

¹⁹ Stac' to ts'iquel ma' ti naclej ta sbajtical banomile, ja' mu stac' ts'iquel ti cotsolic no'ox sat ti jti'oltavanej antse.

²⁰ Ta sna ti buch'u oy sbijile, oy sc'ulejal, oy muil poxiletic yu'un; ti c'u yepal oy yu'un ti buch'u mu'yuc xch'ulel xa'i sbae, naca xlaj no'ox yu'un scotol.

²¹ Ti buch'u mu xicta sba ta sa'el ti tuq'uilale, ti c'uxubinele, ta sta xch'iel sc'opojel, xchi'uc yich'el ta muc'.

²² Jun jteclum ti lec chabibile, ta stsalat yu'un ti buch'u x'ech' to sbijile, ta xlilij ti c'otem ta yip yo'nton ti ja' spojobbaile.

²³ Ti buch'u stuc'ulanoj sba xchi'uc ti c'usi ta xale, j'ech'el mu sta svocol.

²⁴ J'esom-jol le'e, toyobba le'e, mu xa'i sba le'e, xi sc'oplal ma' ti buch'u yac'ojbe yipal ta yalilanel ti yesomal sjole.

²⁵ Xbic'bun yo'nton xcham xlaj o ma' ti ch'ajil vinique, yu'un mu xpich' yoc sc'ob ta abtel.

²⁶ Jech o scotol c'ac'al xbic'bun yo'nton xchi'uc un, ja'uc ti buch'u oy stuq'uile, xt'olbij no'ox.

²⁷ Ti matanal ta xaq'uic ti buch'u mu'yuc xch'ulel xa'i sbaique, mu lecuc ta xil ti Diose, yu'un ma'uc ta yutsil yo'nton ta xaq'uic.

²⁸ J'ech'el ta sta svocol ma' ti jutc'op rexticoe; xtac' sutel yu'un ma' ti buch'u xtojob ta xchiquintaele.

²⁹ Stsinan xa sba yu'un sc'op yilel ma' ti buch'u mu'yuc xch'ulel xa'i sbae, ja'uc ti buch'u oy stuq'uile, mu stselbuj ti bu stamoj batele.

³⁰ Ta sba ta sat ma' ti Dios une ma'uc tsacbil ta muc' sbijil ti vinique, ti snopbenale, ti oy c'usi ta xale.

³¹ Ti vinique chapal xa yu'unic ca' sventa ti ac'-letoe; ti jtsalvanej ta xc'ote, Dios ta sva'an sba un.