Proverbios 2 - Bible in Tzotzil de Chamula

Oy c'usi lec ta xich' tael ta sventa ti bijilile

¹ C'otuc ta avo'nton ti jc'op ca'yeje, cuni nich'on, bejano ta ajol ta avo'nton ti jmantaltaque.

² Ts'etano lec achiquin ta ya'yiel ti c'usi ta xac' ta na'el ti bijilile, tuneso lec ta ajol ta avo'nton ti slequil nopbenale.

³ Ta sjunuluc avip, sa'o ti lecuc snopbenal avu'une, ti oyuc stuq'uil ajole.

⁴ Batuc avo'nton ta sa'el jech c'u cha'al ta xasa' ti platae, mi ja' ti c'ulejal bu nac'ale.

⁵ Va'i unbi, ta xlic ava'ibe smelol ta xi'tael ti Diose; ta xlic jamuc asat c'u s'elan ta ojtiquinel ti Diose.

⁶ Ti bijilile, ja' ta xac' ti Diose; ta ye ta sti' ta xlic ayanuc talel ti lec snopbenale, ti jamal ba satil ta yojtiquinele.

⁷ Ti Diose ta stic' sba ta scoltael ti buch'u stamojbe smelole, ti mu'yuc soquesoj ti sc'oplale.

⁸ Ta xchabi ti buch'u oy stuq'uil smelole; ta spoj ti buch'u jun sjol yo'ntonic ta stojole.

⁹ Ta xlic ava'ibe smelol ti c'usi leque, ta xbat avo'nton ta snopel ti c'usi tuq'ue.

¹⁰ Ta xata ti abijile, ti lec snopbenal une, ta xlic ava'i ti jun yutsil ti abijile.

¹¹ Ti xana' xatuc'ulan abae, ti oy abijile, mu'yuc c'usi xanuptan unbi.

¹² Mu xatam batel yu'un ti chopol be, ti bu stamojic batel ti jti'-jol-o'ntonetique,

¹³ ti laj xa yictaic comel bu to ox lec stamojic batele, ti stamojic xa batel sbelel ch'ayele,

¹⁴ ti batem xch'ulel xchi'uquic ta spasel ti c'usi chopole, ti spasic xa q'uin xchi'uquic sventa ti c'usi chopol ta spasique,

¹⁵ sbelel xa ch'ayel xal o ti bu stamojic batele, ti laj xa yictaic comel steq'uel ti tuq'uil bee.

¹⁶ Ja' jech xtoc mu sq'uelojucot ta xu'ninbot avo'nton ti ants ti yan o yuni c'op ta a'yiele, ti chi' xa ya'yel ta lajesel ti c'usi ta xale,

¹⁷ ti ta sjip ta sten comel ti xchi'ile, ti ta xch'ay ta yo'nton ti yaloj strate ta stojol ti Dios une.

¹⁸ Ti tam xi batel ti sbelel snae, ja' xa tambil batel sbelel ti lajebale.

¹⁹ Ti buch'u ta x'och batel ta snae, mu xa sut talel, j'ech'el mu xa xtal stec' sbelel ti cuxlejale.

²⁰ Jech o xal un, tamo ti lequil bee, paso jech c'u cha'al ta spasic ti buch'u tuc' sjol yo'ntonique.

²¹ Ti buch'u stamojbe stuq'uile, ti mu'yuc soquesoj ti sc'oplale, ta xcuxi ta banomil.

²² Ti buch'u mu'yuc xch'ulel xa'i sbaique, xchi'uc ti jpayvaneje, ta xjipe ta xteneic loq'uel.