Proverbios 16 - Bible in Tzotzil de Chamula

¹ Ti vinique ta xchapan ti c'usi sc'an pasele; ti stsutseb c'op une, Dios sbainoj mi ta xc'ot ta pasele.

² Ta sventa stuc ti buch'uuc no'oxe, yaloj ti lec ta xbat yu'un scotol ti c'usi ta spasique, ja'uc ti Diose xojtiquin lec bu c'alal pajem ti o'ntonale.

³ C'ubano ta stojol Dios ti c'usitic ta xapase, ta xc'ot ta pasel ti c'usi anopoje.

⁴ Ti Diose oy smelol ti laj yac' ayanuc ti c'usitic oye, jech ec ti buch'u mu'yuc xch'ulel xa'i sbaique, smalauc xa no'ox xa'i ti tsitsele.

⁵ Ti Diose mu ts'icbaj ta xa'i ti jtoyobbaetique; mu'yuc bu xbat ta jelavel ti c'usi ora sta ta xich' ti tsitsele.

⁶ Ti buch'u mu tenbaj ta yo'nton ta xa'i ti Diose, ti j'ech'el jamal ti yo'ntone, ta sta ti ch'aybil ta xc'ot ti smule; c'alal xi'tabil ti Diose, ta xicta comel ti c'usi chopole.

⁷ C'alal lec ta xil Dios c'u s'elan stamoj ti vinique, xu' ta xc'ot ta pasel yu'un ta slamajes c'op xchi'uc ti scontrae.

⁸ Xi to smuc'ul xal ti bu yich' a'yiel c'uxi toj ti juteb canalil och ta c'abale.

⁹ Ti vinique ta sbain ta snopel ti c'usi ta spase; ti Dios eque ta stic' sba yo' ta xc'ot ta pasel yu'un.

¹⁰ Ti ajvalile ta xc'opoj ta sventa ti Diose, mu yalel toyoluc ta spas ti bu sta o ta x'ac'van batele.

¹¹ Ti c'usitic naca ta yalal ta sbise, xchi'uc ti sbisobiltac naca ta jipanbil sna' sbise, ta xchapanat xchi'uquic yu'un ti Diose; scotol ti sbisobiltaque, jech loc' ta nopel yu'un stuc ti Diose.

¹² Mu sq'uelojuc no'ox ma' ti ajvaliletic ti c'usi chopol ta xich' pasele, yu'un ti ochem ta ajvalile, tsots sc'oplal ti tuc' ta xchapanvane.

¹³ Ti ajvaliletique lec ta xil, c'ux ta xa'i ti buch'utic ti jamal ye sti' xc'ot xc'opojique.

¹⁴ Ti xvojet no'ox ye ti ajvalile, chamebal xal o; oy sbijil ma' ti buch'u ta xac'be yipal ta spajesbel ti sc'ac'al yo'ntone.

¹⁵ Ti xmuyubaj no'ox ti ajvalile, cuxlejal xal, ti slequil yo'ntone, co'ol s'elan junuc toc ta xtal ti vo' yu'une.

¹⁶ Ti yich'uc tael ti bijilile, x'ech' to yutsil, ja' mu sta ti oroe; ti oyuc lec ti snopbenale, x'ech' to yutsil, ja' mu sta ti platae.

¹⁷ Ti c'u s'elan sc'an ta spasic ti buch'u oy stuq'uilique, ta xch'ac sbaic ta stojol ti c'usi chopole; ti ta jtuc'ulantic c'u s'elan ti jtaleltique, ta jc'uxubin jba jtuctic.

¹⁸ C'alal stsacoj yip ti toyobbaile, vocol xal o; c'alal sujoj sba ta bet'bunel ti eile, jipel ta lum xal o.

¹⁹ Ja' lec mi biq'uit xcac' jbatic ta stojol ti me'un mu'nate, ja' ch'ayel xal o ma' ti xicajet xitoyet xa xchi'uc ti jc'uleje.

²⁰ Ti sbainoj lec ti c'usi ac'bil sventainoje, lec ta xc'ot ta loq'uel xchi'uc; mu c'usi sna' ma' ti buch'u spatoj yo'nton ta stojol ti Diose.

²¹ Ti buch'u xac' no'ox sbijil ta snopele, ta x'albat ti oy sbijile; xc'ot no'ox ta o'ntonal ma' ti buch'u xlamet ti slo'il ya'yeje.

²² Ti oy lec ti snopbenale, co'ol s'elan j'ac'-cuxlejal sat vo'; mi ta stojobtas ti buch'utic pimuneb xa'i sbae, mu xa'i sba ec.

²³ Ti buch'u oy snopbenal yu'un ti sbijile, oy stuq'uil ti c'usi ta xale, xc'ot no'ox ta o'ntonal ti sbijil ta snope.

²⁴ Ajapom xa s'elan yutsil ta lajesel ti xi s'elan xlamet ta a'yiel ti c'ope: xac' to tsatsalil, xvic'luj to ti satil yu'une.

²⁵ Oy bu lec ta ts'acliel yilel ti bu stamojic batel ti yane, ti c'alal lajel tubel xal oe.

²⁶ Ti cuparo no'ox ta xa'i ti yabtele, ta suj sba ta yabtel; ta suj sba ta sa'el yo' mu xa'i ti vi'nale.

²⁷ Co'ol s'elan stilemal jorno c'otem xchopolil ti buch'u mu'yuc xch'ulel xa'i sbae; ti c'usi ta xloc' ta yee, co'ol s'elan leb c'oc'.

²⁸ Ti buch'u ts'i'uneb xa'i sbae, jun jliquesej leto; ti jlo'iltavaneje ta sliques contrainel.

²⁹ Ti buch'u jbel xa yiluc ti c'usi ta xale, naca slo'la no'ox ti buch'u lec xil sbaic xchi'uque, ta stam batel yan be yu'un.

³⁰ Yuni satilal o xa yu'un xchi'uc ma' ti buch'u yac'oj sjol ta spasel ti c'usi chopole; smacoj no'ox ye xchi'uc ti c'usi c'ot xa ta nopel yu'une.

³¹ Yich'el ta muc' c'otem xchi'uc ti sac chijan ti jolile, laj sta ti oy smelol stuq'uil ti sc'opojele.

³² Ja' xi smuc'ul oyuc ti sts'iquemal xcuchemale, ja' ch'ayel xal ma' ti x'ech' no'ox une; ja' xi smuc'ul ma' ti ta jpajes jbatique, ja' ch'ayel xal ma' ti ta xich' u'ninel ti jteclumetique.

³³ Ac'o mi naca ta yorail sna' sq'uelel ti viniquetique, le' une, Dios sna' stuc mi jech ta xac' c'otuc ta pasel.