Proverbios 13 - Bible in Tzotzil de Chamula

¹ Ti bijil nich'onile ta xich' ta muc' ti tojobtasel ta x'albat yu'un ti stote, ja'uc ti toyobba bichobbae mu xac' ta venta ti vulele.

² Ti bu sq'ueloj batel ti c'usi ta xloc' ta alele, yu'un stuc ta stsob ti jujune, ja'uc ti jpayc'opetique me'inem xa'i ti ilbajinvaneje.

³ Ti buch'u ta stuc'ulan sba ti c'usi ta xloc' ta yee, ta xich' sba ta c'ac'al, ja'uc ti buch'u xlic no'ox ta lum ti c'usi ta xale, ye no'ox x'aq'ue ta vocol yu'un.

⁴ Ti c'usi juteb ta yo'nton ta sta ya'i ti uni ch'aje, mi ja'uc ta sta, ja'uc ti buch'u baxbol ta abtele ta sta no'ox ti c'usitic ta xtun yu'une.

⁵ Ti buch'u tuc' sjol yo'ntone ta scontrain ti naca jutbilal c'ope; sc'op ti buch'u mu'yuc xch'ulel xa'i sbae, naca q'uexlal ta xac', mu'yuc ich'bil ta muc'.

⁶ Ti tuq'uilale c'otem ta spojobbail ti buch'u oy stuq'uil stamoj batele; j'ech'el ta xch'aybat sc'oplal ti jsa'mulil yu'un ti c'usi chopole.

⁷ Oy buch'u sbisoj sbaic ta jc'ulej yilel, mu'yuc c'usi x'ayan yu'unic; oy buch'u sbisoj sbaic ta me'un mu'nat yilel, oy scotol c'usi x'ayan yu'un.

⁸ Yo' ta spoj sba ti jc'uleje, tsots sc'oplal ta stunes ti sc'ulejale, ja'uc ti me'un mu'nate mu'yuc stijel ta c'op yu'un ti sibtasele.

⁹ Xojobin no'ox yutsil ti buch'u oy stuq'uil sjol yo'ntone, ja'uc ti buch'u mu'yuc xch'ulel xa'i sbae, co'ol s'elan lampara ti ta xa xtube.

¹⁰ Naca leto ta sliques ma' ti toyobbaile, ja'uc ti bijilile oy ta stojol ti buch'u biq'uit yac'oj sbae.

¹¹ Ti c'ulejal ti ma'uc ta lubel chamel laj yich' taele, ta jech yepal ta xch'ay, ja'uc ti buch'u ta jujuti' ta stsobe, yacal ta epajel batel yu'un.

¹² Ti mu'yuc xc'ot ta pasel ti patobil o'ntonal ta xich' taele, ta x'ac'van ta vul-o'ntonal, ja'uc ti ta xc'ot ta pasel ti c'usi juteb ta o'ntonal ta xich' taele, co'ol s'elan jpets te' ti xcuxet o'ntonal yu'un ti squeovale.

¹³ Ti buch'u ta sjip ta spat ta xocon ti c'usi ta x'albate, xcha'na' xa liquel, ja'uc ti buch'u tac'al ta xc'ot yu'un ti c'usi ta x'albate, oy c'usi ta x'ac'bat.

¹⁴ Ti c'u s'elan ta xchanubtasvan ti buch'u oy sbijile, cuxlejal xal o yo' jech mu xich' tamel ech'el sbelel ti lajebale.

¹⁵ Oy ich'el ta muc' mi oy stuq'uil ti snopbenale, ja'uc ti jpayc'ope stamoj xa sbelel ti lajel tsutsele.

¹⁶ Ti buch'u stuc'ulanoj sbae yich'oj sbijil ti c'usi ta spase, ja'uc ti buch'u pimuneb xa'i sbae xtoyet no'ox xchi'uc ti spimubele.

¹⁷ Ti j'al-mantal j'ich'-c'op mu'yuc xch'ulel xa'i sbae, muc'ul c'op ta sliques, ja'uc ti lequil j'al-mantal j'ich'-c'ope, xpatet ono'ox o'ntonal yu'un.

¹⁸ Ti buch'u ta sbaj ti bijubtasele, xjoybij ta me'un mu'nat, mu'yuc ich'el ta muc' xc'ot, ja'uc ti buch'u ta xich' ta muc' ti tojobtasele, ta sta ich'el ta muc'.

¹⁹ Ti c'ot ta pasel ti c'usi juteb ta o'ntonale, ta xac' muyubajel. ja'uc ti buch'u pimuneb xa'i sbae, mu xu' ta xa'i mi ta xicta ta spasel ti chopole.

²⁰ tsobetan xchi'uc ti buch'u oy sbijilique, ta xata abijil ec un; mi ja' xatsobet xchi'uc ti buch'u pimuneb xa'i sbaique, ch'ayel xal un.

²¹ Ti jsa'muliletique, nabal ta stojolic ti c'usi chopole, ja'uc ti buch'u oy stuq'uilique, matantasbil ta xc'ot ta sventa ti oy c'usi lec ta spasique.

²² Ti vinic oy yutsil slequile oy xrexto ta xictabe comel ti smamobtaque; ti c'u yepal sbusanoj sc'ulejal ti jsa'mulile, ta xc'ot ta yu'un ti buch'u oy stuq'uil yo'ntone.

²³ Ta yosil sbanomil ti me'un mu'nate, xloc' x'ayan no'ox yu'un ti c'usi stac' tunel lajesele; ti bu mu'yuc pojel chapanele, yepal no'ox ta xch'ay.

²⁴ Ti buch'u mu stojobtas ti xnich'one, mu tsotsuc sc'oplal ta xa'i, ja'uc ti buch'u mu tuch'baj ta yo'nton ta xa'i ti xnich'one, ta stojobtas.

²⁵ Ti buch'u oy stuq'uilale ta snojes lec xch'ut ti bu xa c'alal xu' yu'une, ja'uc ti buch'u mu'yuc xch'ulel xa'i sbae, mu sta o ta xa'i ti c'u yepal ta slajese.