Proverbios 12 - Bible in Tzotzil de Chamula

¹ Ti buch'u lec ta xa'i ti tojobtasele, oy ta yo'nton ti bijubele; ti buch'u mu sc'anic ti vulele, ch'ayem snopbenal.

² Mi lec ono'ox ti buch'ue, lec ta x'ile yu'un ti Diose, ja'uc ti buch'u yac'oj sjol ta spasel ti chopole, mu ono'ox xcol yu'un.

³ Ti chopolile, laj to ta alel ma' ti oy buch'u cajal ta xc'ot xchi'uque, ja'uc ti buch'u oy stuq'uile, yich'oj lec yip xchi'uc.

⁴ Ti baxbol antse, ajvalil xa xa'i sba yu'un ma' ti smalal une, ja'uc ti ants ti mu x'ac'van ta ventae, yac' o ta j'ech'el unbi.

⁵ Vinic ti oy stuq'uilique, oy ta snopel ti c'usi tuq'ue, ja'uc ti buch'u mu'yuc xch'ulel xa'i sbaique, yabtelinojic ti lo'lavaneje.

⁶ Ti buch'u mu'yuc xch'ulel xa'i sbae, chamebal pets' xal o ti c'usi ta xloq'uilan ta yee; coltael xal ye sti' ti buch'u oy stuq'uil sjole.

⁷ Ti buch'u mu'yuc xch'ulel xa'i sbaique, tsalbil ta xc'otic, slajeb o xchi'uquic, ja'uc ti buch'utic oy stuq'uilique, mu'yuc stijelic ta c'op ti c'u yepal oy ta nae.

⁸ Ta xlequil-c'optaat ti vinic ti bu c'alal c'otem xchi'uc ti snopbenal yu'une, ja'uc ti buch'u mu'yuc lec snopbenal yu'une, xtun o ti chopol c'optabile.

⁹ Ac'o mi xi yuni e'lan ta x'ilee, ipaluc mi bal to x'a'yie yu'un ti yane; mu ch'ayel xal o mi ja' no'ox xnupulet yajval mi xmich'mun xch'ut ta vi'nale.

¹⁰ Ti buch'u oy stuq'uile, sna' ti c'usi ta xtun yu'un ti xchon sbolomtaque, ja'uc ti buch'u mu'yuc xch'ulel xa'i sbae, mu xc'uxubaj yo'nton yu'un.

¹¹ Ti buch'u ta xabtelan ti yosil sbanomile, sta no'ox ti sve'el yuch'ome, ja'uc ti buch'u mu sventauc sbae, mu ch'ayob c'ac'al xal ti bu stamoj batele.

¹² Ti c'usi chopol xac' sjolilal ta spasele, syacobilic ti buch'u mu'yuc xch'ulel xa'i sbaique, ja'uc ti buch'u oy stuq'uilique, ja' yip c'otem xchi'uquic.

¹³ Ta sjutbilal c'op stuc ta xyaque yu'un ti buch'u mu'yuc xch'ulel xa'i sbae; xloc' no'ox xchi'uc svocol ma' ti buch'u oy stuq'uile.

¹⁴ Ti c'usi ta xloc' ta alel yu'un ti jujune, yu'un stuc, ta xich'beic stojol ti c'usi ta spasique.

¹⁵ Ti buch'u pimuneb xa'i sbae ta snop ti lec ta xloc' xchi'uc ti c'usi ta spase, ja'uc ti buch'u oy snopbenal yu'une, tac'al ta xc'ot yu'un ti bijubtasele.

¹⁶ Ti buch'u pimuneb xa'i sbae, xojol o xchi'uc ti sc'ac'al yuni o'ntone; ti buch'u yich'oj sba ta c'ac'ale, x'ech' no'ox ta spat ta xocon ti c'usi chopol ta x'albate.

¹⁷ Ti buch'u ta stuq'uil yo'nton ta sva'an sba ta rexticoe, ta xal ti c'usi melele; ti buch'u naca ta spac'ta sba ta rexticoale, jutbil ti c'usi ta xale.

¹⁸ Oy buch'u xmich'et xa ta xcom o'ntonal yu'un ti c'usi ta xale, ja'uc sc'opojel ti buch'u oy sbijile, siquet xa ti banomil yu'une.

¹⁹ Ti buch'u ta xal ti c'usi melele, mu xlaj sbatel osil, ja'uc ti uni jutc'ope, ta jliquel no'ox chab xi yuni c'oplal.

²⁰ Ti c'usi snopoj ta spas ti buch'u mu'yuc xch'ulel xa'i sbaique, naca jutbil c'op oy ta ye ta sti'; ti bijubtasel ta xac' ti buch'u lamajem yo'ntone, muyubajel xal o.

²¹ Ti buch'u oy stuq'uile, mi ja'uc ta xich' svocol xchi'uc ti c'usi chopole, ja'uc ti buch'u mu'yuc xch'ulel xa'i sbae, vulel-vulel ta stojol ti c'usitic chopole.

²² Ti Diose mu ts'icbaj ta xa'i yu'un ti jutc'opetique; lec ta xil ti buch'u yac'ojbeic yipal ta spasel ti c'usi melele.

²³ Ti buch'u oy sbijile, mu yeuc sti'uc xa ta yalel ti oy c'usi sna'e, ja'uc ti buch'u pimuneb xa'i sbae yeinoj ta yalel ti yuni bolile.

²⁴ Ti buch'u sna' x'abteje, c'otem ta jpas-mantal, ja'uc ti buch'u ch'aje, pasbil ta mantal.

²⁵ Ti vocole, xlaj o xa xchi'uc ta xa'i ti vinique; ti xlamamet xa yutsil ti c'ope, sta to smuybajel xchi'uc.

²⁶ Ti buch'u oy stuq'uile ta xc'ot ta jtojobtasvanej yu'un ti xchi'ile, ja'uc ti buch'u mu'yuc xch'ulel xa'i sbaique ta xch'ayvanic ta be.

²⁷ Ti jch'ajil jnutsuvile mu'yuc c'usi ta sta ta nutsel, ja'uc ti buch'u baxbole mu albajuc ta sta ti sc'ulejale.

²⁸ Sbelel ti tuq'uilale, cuxlejal ti bu ta x'ic'van batele; ti pimubele, chamebal ti bu ta x'ic'van batele.