Oseas 9 - Bible in Tzotzil de Chamula

Ti Osease ta scaj'al ti ta xich' tsitsel ti Israele

¹ Altic no'ox ti xlaet ta xava'i, Israel. Ma'uc ti xabit xa ta muyubajel jech c'u cha'al ta spas ti yan jteclumetique. Laj avalopatin comel ti Dios avu'une, ta scoj ti laj avac' aba ta stojol yan ti yepaluc ye'el ac'ob ta yich'el atojol ta majob trigoe.

² Ta stojol ti jteclum Israele, ta xjalaj ti trigo ti vinoe. Ti ach' vino ta spits'e, ta maj ta ic' no'ox ta xbat.

³ Ti Efraine ta sut batel ta jteclum Egipto. Ti ta jteclum Asiriae, ta xlic slajes ti c'usi mu stac' lajesele. Ti israeletique mu'yuc tey xcom naquijicuc o ti ta muc' ta jteclum yu'un ti Diose.

⁴ Ta xch'ay ta ye ta sti' ta yuch'el ti vino ta sventa yich'obil ta muc' ti Diose. Ta xc'ot ta ch'ayel yu'un ta yaq'uel ti milbil matanele. Ti pan ta sve'ique, co'ol s'elan ti c'otem ta sventa ti lajel tubele. Ti buch'utic ta sve'ic taje, laj xa soques ti sc'oplale. Mi ta sve'ic ti pan taje, mu xu' ta x'ochic batel ta xch'ulna ti Diose.

⁵ ¿C'usi xu' ta xapasic c'alal ta xc'ot sc'ac'alil yorail ti q'uine, ti ja' jun q'uin sventa stoyel xi'el ti Diose?

⁶ Ti stuquique jatavic loq'uel ta scoj ti tsots vocole. Ta xtic'atic ta naclej yu'un ti Egiptoe. Jech xtoc un, ta xich'ic muquel ta yosilal ti Menfise. Ja'uc ti plata ti ja' sc'ulejalic ti bu q'uejele, naca laetic ta xlic ch'iuc talel ti smomolale. Ja'uc ti yav snaique, naca ch'ixetic ta xlic ch'iuc.

⁷ C'ot xa sc'ac'alil yorail ti tsitsele. C'ot xa sc'ac'alil yorail ti ja' xtunic o ta stojic ti c'u yepal xu' ta xich'ique. Israel, ta xlic ana'ic ti bu c'alal c'otemoxuque. Ti vo'oxuque xachi ta xavalique: “Ti j'alc'ope, jeche' no'ox bol ti yuni c'ope. Ti vinic ti buch'u ventainbil ta xale, chuvaj no'ox ti yuni c'ope.” Ti va'i s'elan ta xavalic taje, ja' ti epajem ta atojolic ti achopolalique, yu'un mu no'ox albajuc ti sti'emal ajolique.

⁸ Ti yaj'alc'op ti Diose, laj yich' va'anel yu'un Dios ta jchabivanej jq'uel-osil ta sventa ti Efraine. Ja' no'ox un, ti vo'oxuque laj ava'anbeic spets'al ti bu ta x'ech'e. Ma'uc no'ox taje, yu'un liquem sc'ac'al yo'ntonic ec ti jtuneletic ta xch'ulna ti Diose.

⁹ Ta j'ech'el laj asoques abaic jech c'u cha'al c'ot ta pasel ti ta jteclum Gabaae. Jech o xal un, ti Diose ta svules ta yo'nton scotol ti achopolalique. Ta stsitsoxuc ta scoj ti amul acolo'ique.

Ti Israele ta xich'be stojol ti smule

¹⁰ Ti Diose xi ta xale: “C'alal laj jta ta sa'el ti Israele, ximuyubaj xa yu'un, co'ol s'elan jech c'u cha'al ti buch'u oy sat ta sta ti uva ta sbajtical banomile. Ti atot ame'ic ta vo'nee, laj quil ta jba ta jsat ti co'ol s'elanic icux ti sob no'ox ta xac' ti sate. Le' une, c'alal c'otic ta Baal-peore, lic yac' sbaic ta tunel ta stojol ti c'usitic va'anbil ta diosetique. Bajbil tenbil c'otic jech c'u cha'al ti sdiosic ti batem yo'nton xchi'uquique.

¹¹ Yutsilal slequilal ti Efraine, nom ta xc'ot jech c'u cha'al ta xvil batel ti mute. Ta xc'ot ta pasel ti mu'yuc ta xvoc' ti ololetique. Ta xlaj sc'oplal ti ta xvinaj ti xchi'inojan no'ox yol ti antsetique. Ta xlaj sc'oplal ti ta xilbe sat ti yalab xnich'nabique.

¹² Ac'o mi oy to bu ta xch'i yu'unic jujunticuc ti yalab xnich'nabique, ta jpojbeic, ti mu junuc ta xquictabeic comele. Mu xa ono'ox cha'bel un, c'alal mi laj jch'ac jba ta stojol ti jnaclejetique.”

¹³ Quiloj ti xi s'elan ta spas ta stojol yalab xnich'nab ti Efraine, ti ta xc'ot yu'un jech c'u cha'al junuc jnutsel ve'lil yu'un ti jnutsuviletique: Ta xac' loq'uel ta c'abal yo' jech ta xich' milel.

¹⁴ Paso ta stojolic, Cajval, ti c'usi anopoj ta xavac' c'otuc ta stojolique. Paso ta stojolic ti ac'o macuc ti yalajebique, ti taquijuc ti ya'lel xchu'ique.

Ti Diose capem sjol ta stojol ti Efraine

¹⁵ Ti Diose xi ta xale: “Laj spasic scotol c'usi chopol ti c'alal oyic ta Gilgale. Ti bu taje, ja' lic jcontrainic ta sc'ac'al co'nton. Ta scoj ti laj sta smulic xchi'uquic ti c'usi laj snopic ta spasele, ta jtenic loq'uel ta jna. Laj sc'oplal ti ta jc'uxubinique. Scotol ti banquilaletic yu'unique, toj toyobbaic ta j'ech'el.

¹⁶ Ti Efraine ochem xa syayijemal, co'ol s'elan jpets te' ti taquin ti yibele, ti mu xac' ti sate. Ac'o mi oy to ti xnich'nabe, ta xcac' chamicuc.”

¹⁷ Ti jteclumale mu'yuc xloc' x'ayan ta yo'ntonic ta yich'el ta muc' ti Dios cu'une. Jech o xal ti Dios cu'une ta sten batel, ti yalel muyelic ti tan puc batel ta jujun muc'tiquil lumetique.