Oseas 8 - Bible in Tzotzil de Chamula

Ti Israele, ta x'ac'bat stoj ti snijanoj xchimanoj sba ta yich'el ta muc' ti c'usi meltsanbil ta c'abale

¹ Xi ta xal xtoc ti Diose: “Oq'uisanic ti oq'ues jech c'u cha'al junuc jchabivanej jq'uel-osil ti sbainoj ta sq'uelel steclumal ti Diose. Yu'un mu'yuc xc'ot ta pasel yu'unic ti jtratee. C'ajomal no'ox laj stoy sbaic ta stojol ti c'u s'elan laj jchanubtase.

² Ac'o mi jech un, xi s'elan x'avlajetic xa talel ta jtojole: ‘Jna'cutic lec ti vo'ot Diosot yu'un ti Israele’, xiic.

³ C'u stu un, ti Israele laj sbaj ti c'usi lec ta stae. Jech o xal un, ta snutsatic yu'un ti scontraique.

⁴ “Mi ja'uc laj yich'bun que jti' ti c'alal laj sva'ananic ti ajvaliletique. Mi ja'uc laj jna' c'alal yac'beic yich' yabtel ti banquilaletic yu'unique. Ti platae xchi'uc ti oro ti oy yu'unique, ja' laj smeltsanic o ta dios yu'unic yo' jech ta soques sba xchi'uquic.

⁵ Ta xac'bun ib-o'nton ti sloc'ol ch'in vacax ti vo'ot ta xavich' ta muq'ue, jteclum Samaria. Lic xa tiluc ti sc'ac'al co'nton ta stojole. ¿C'u to sjalil sc'an ti ta xavac' abaic ta mesel ta tusele, Israel?

⁶ Ti loc'tabil ch'in vacax ti oy ta jteclum Samariae, ma'uc Dios. Meltsajem ta yoc ta sc'ob jun vinic ti sna' lec sloc'taele. Ja' yu'un un, ta xc'ot ta pasel ti ta xlilije.

⁷ Ti c'usi laj spas ti stuquique, mu'yuc c'usi lec laj sta o xchi'uquic. Ja' no'ox laj staic ti co'ol s'elan sutub ic' xchi'uc ya'lel ti vul ta stojolique. Mu'yuc xa c'usi ta staic ta tsobel ti ta yosilique, mi ja'uc xa ta xjuch'ic ti ninal trigoe. Ti mi laj to staique, ja' xa ta stun ta slajesic ti jyanlumetique.

⁸ Tsalatic xa ta j'ech'el ti israeletique. Co'ol xa s'elan mu'yuc xa stu ta x'ilatic yu'un ti jyanlumetique.

⁹ Ti jech taj une, ja' ta scoj ti co'ol xa s'elan jun te'tical pochan burro ti sq'ueloj sba chbat yac' sbaic ta stojol ti jteclum Asiriae. Jech ti Efraín eque sq'uelan xa matanaletic yo' ta xc'upij yo'nton yu'un ti buch'u ta xac' sba ta stojole.

¹⁰ Ac'o mi ta sc'an ya'i ta sta spojelic ti ta xaq'uic matanal ta stojol ti yan muc'tic lumetique, avi tana li'e, tan puquic ta xbatic cu'un. Yu'un oy bu ta xc'ot ta pasel c'uc sjaliluc ti ta xc'ot vocol ta stojolic ta scoj ti ajvaliletique xchi'uc ti banquilal jpas-mantaletique.

¹¹ “Yu'un ti Efraine yac'ojbe yipal ta smeltsanel epal altaretic ti c'alal ja' no'ox ta sta smul xchi'uque.

¹² Ti vu'une, ac'o mi laj jts'iba ep chanubtaseletic ta sventa, jech ti stuque laj sbisic no'ox ta jech mechuc.

¹³ Ti stuquique, ja' toj lec ta xa'iic ta yaq'uel ti milbil matanaletique. Ta smilic ta slajesic ti beq'uet yu'un ti milbil matanaletique. Ja' no'ox un, ti vu'un Diosune xi s'elan ti mu junuc co'nton yu'unique: Ta jvules ta co'nton ti smul scolo' staojique. Ta jtsitsic ya'iic ta scoj smulic yo' jech ta sutic batel cu'un ti ta jteclum Egiptoe.

¹⁴ “Ti Israele ta xlic smeltsan muc'tiquil naetic ti tsots stunele. Ja' no'ox un, ta j'ech'el mu xa sta ta na'el ti Buch'u ac'bun ti xch'ulel yanimae. Ti Judae ta xlic sva'anan epal pojobbail jteclumetic. Ja' no'ox un, ta xc'ot ta pasel ti ta xlic jumbe ti sc'ac'ale, ti ta xtub sc'oplal ti naetic ti tsots stunele.”