Oseas 2 - Bible in Tzotzil de Chamula

¹ Va'i un, xachi ta xavalic ta stojol ti avinquileltac ti ants viniquetique: “Steclumalotic ti Diose, c'uxubinbilotic.”

Yanijem sjol yo'nton ti jteclum Israele

² Ti Diose xi laj yale: “Tic'beic ya'i smul ti ame'ique, tic'beic ya'i smul. Ma'uc xa cajnil. Mi ja'uc xa smalalun. Lajuc sc'oplal ti vinajem ti sbolomalinoj sbae. Lajuc sc'oplal ti ta xmeyilanat yu'un ti xch'ayobil sjol yo'ntone.

³ Mi mu xicta sbae, xi s'elan ti t'anal ta jcomes ta j'ech'ele. Jech me ta xcom cu'un jech c'u cha'al ti c'alal voq'ue. Ta xjoybij cu'un ta jun sts'ijlajan banomil. Co'ol s'elan staquinal banomil ta xcom. Lajuc ya'i ta taqui ti'il.

⁴ Mi ja'uc jutebuc ta xc'uxubaj co'nton yu'un ti yalabe, yu'un ayanic talel ti bu laj yac' sba ta c'upinele.

⁵ Yu'un ti sme'e laj yac' sba ta c'upinel ta yan. Laj soquesbe sba sc'oplal stuc c'alal xi yaloje: ‘Xba jsa' ti buch'utic xitun to yu'unique, ti buch'utic ta xiyac'beicun ti jve'el cuch'ome, ti ta xiyac'bun ti jc'u' jpoq'ue, ti lequil saquil c'u'ile, ti aceitee, ti cuch'bole.’

⁶ “Ja' yu'un un, ta jmacbe ta ch'ix ti be ti bu ta stam batele. Ta joy lec ta jun moc ti bu oye yo' jech mu sta loq'uel ti sbe xanebe.

⁷ Batem sjol yo'nton xchi'uc ti buch'utic lec xile. Ja' no'ox un, j'ech'el ch'ay o ta sat. Ac'o mi ta sa'ilan, mi ja'uc xa ta sta. Va'i un, xi ta xlic yale: ‘Ja' lec ta xisut batel ta stojol ti sba jmalale, yu'un ti c'alal quic'oje, mu'yuc c'usi jna'. Avi tana li'e, mu xa jechuc.’

⁸ “Ja' no'ox un, ti stuque mu'yuc laj stuc'ulan lec ti vu'un ta xcac'be ti trigoe, ti vinoe, ti aceitee, ti vu'un ta jbolesbe ti platae, ti oro ti ja' lic smeltsan o ti sloc'tabil sdiostaque.

⁹ Avi tana le'e, ta jtsob sutel ti jtrigoe, ti jvino c'alal yorail ta xich' tsobele. Ta xquich' sutel xtoc ti jtsotse, ti lequil saquil c'u'iletic cu'un ti laj cac'be yo' ta slape.

¹⁰ Ta sba ta satic ti buch'utic lec sc'ananoje, ta jvinajes ta q'uelel ti bu nac'ale. Mu'yuc buch'u xu' ta spojbun ta coc ta jc'ob ti c'usi ta jc'an ta jpas ta stojole.

¹¹ Ta xc'ot ta tsutsel cu'un ti xmuyubajic no'oxe, ti mu no'ox xnatij ta spas ti q'uinetique, ti c'u s'elan liquem yu'unic ta jujun ach' ue, ti sc'ac'alil cuxob o'ntonaletique, ti yan q'uinetic ta spasique.

¹² Ta jsoquesbe ti uvaetic yu'une, xchi'uc ti icuxetic yu'une, ti c'alal xi laj yalbe sba xchi'uque: ‘Ti vi yepal oy cu'un avie, ja' jtojol yu'unic ti laj yac'beicun ti buch'utic batem jol co'nton yu'une.’ Ta xlic joybinbe ta uninal te'tic, ti ta slo'ic ti te'tical chon bolometic ti c'usi ts'unbile.

¹³ Ta xcac'be ya'i stoj ti c'usi laj xa spasilan talele, ti laj yac'be chic'bil pom ti meltsanbil loc'obbail diosetique, ti c'alal xch'alet no'ox ta ixtolal c'abale, xchi'uc uiletic ta sts'acliel ti slo'labil sjol yo'ntone, ti laj xa svalopatinun comele. Ti vu'un Diosune, mu me lo'iluc no'ox ta xcal.

Ti Diose c'ux ta xa'i ti Israel ti ja' steclumale

¹⁴ “Ta xlic jlecomin ya'i. Ta xquic' batel ta sbajtical banomil. Ta jchi'inbe ta lo'il ti sjol yo'ntone.

¹⁵ Va'i un, ta jcha'ac'be ti s'uvataque. Ta xc'ot ta spatobil yo'nton ti stenlejal Acore,, ti oy sc'oplal smalaoj ta stae. Ti bu taje, ta spas liquel jech c'u cha'al c'alal stsebal to oxe, jech c'u cha'al laj spas ti sc'ac'alil c'alal loc' talel ta Egiptoe.

¹⁶ Va'i un, ta xlic yalbun, ‘Jnup Jchi'il’, ti c'alal ja' to ox ta xiyalbun, ‘Cuni Baal’, ti xie. Ti vu'un Diosune, mu me lo'iluc no'ox ta xcal.

¹⁷ Ta jch'aybe ta ye ta sti' ta yalilanel sbitac ti baaletique. J'ech'el ta xch'ay o yu'un ta yalilanel.

¹⁸ “Ta yorail ti jech c'ac'al taje, ta jtic' jba ta spojelic ti Israele. Ta xcac' jtrate ti oy c'usi ta jpas ta stojol ti te'tical chon bolometique, ti c'usitic ta xvilic ta vinajele, ti quiletel muc'tiquil chonetique. Ti ta muc' ta lume, ta jch'aybe sc'oplal ti yolobe, ti espadae, ti letovajele yo' jech jun yo'ntonic mu'yuc sna' ta xcuxiic ti jteclumale.

¹⁹ Jteclum Israel, ta jpas ta atojol ti jnup jchi'il ta xacom o ta j'ech'ele. Bats'i jnup jchi'ilot ta xac'ot jech c'u cha'al ta xal ta jbel ti oy c'usi tsots albile, yu'un ta sjunul jch'ulel canima c'ux ta xca'iot.

²⁰ Ta xajbisot lec ta jnup jchi'il, ti tuc' jol co'nton ta atojole, jech ti vo'ot une ta xlic avojtiquinun ti Avajvalune.

²¹ Ti vu'un Diosune, mu me lo'iluc no'ox ti xi ta xcale: Ti jech yorail taje, vu'un ta jtac'be sc'opojel sti'inel ti jteclumale. Jech o xal ti vinajele ta xac' taluc vo' ta banomil.

²² Jech ti banomile ta xac' ch'iuc ti trigoe, ti uvae, ti olivoe. Scotol taje, loq'uemic talel ti bu sbiinoj Jezreele.

²³ Ta jnacanic ta ch'iel c'opojel ti jteclumal ta banomil taje yo' jech ta sc'upinic liquel. Yu'un ta xlic c'uxubajuc co'nton ta stojol ti Lo-ruhamae xchi'uc ti Lo-amie, ti xi ta xcalbeique: ‘Vo'ot ti jteclumalote.’ Jech ti stuque xi ta xalbune: ‘Vo'ot Diosot cu'un.’ ”