Oseas 12 - Bible in Tzotzil de Chamula

¹ Ti Efraine, xi s'elan ti xvilet no'ox ti xch'i o ta xa'ie: Scotol c'ac'al, snutslioj ti jumetel ic' yu'un ti sloq'ueb c'ac'ale. Yac'ojbe yipal ta sbolesel ti jutbil c'ope, ti joybijem ta j'ilbajinvaneje. Ta spas strateic xchi'uc ti jteclum Asiriae. Ja' jech xtoc ta stac batel matanal aceite ti ta jteclum Egiptoe.”

² Ti Diose laj xa yac' licuc letovajel ta stojol ti Israele. Ta stsits ta scoj ti chopol stalel steclumal ti Jacobe. Ja' jech ta stojic, yu'un xc'ot o jech ta xich'ic ti c'usi loc' ta nopel yu'unique.

³ C'alal mu to ox ta xvoc' ti Jacobe, naca tsalobba xchi'uc ti xchi'il ta voq'uele. Ja' jech ti c'alal vinic xae, laj stsal sbaic ta leto xchi'uc ti Diose.

⁴ Tsal yu'un ti jun ánjel ti c'alal laj stsac sbaic ta leto xchi'uque. Laj yoq'uita sba, laj sc'an ti c'uxubinatuque. Yu'un ti stuque lo'ilaj xchi'uc ti Dios c'alal c'ot snup sbaic ta be ta Betele.

⁵ Ti Ajvalil Dios scotol xu' yu'un ti xi sc'oplale, mu'yuc xa yan ta tael ma' ti Ajvalil une.

⁶ Ja' yu'un un cha'e, Israel, cha'ac'o aba ta ventainel yu'un ti Dios avu'une. Ja' nopo ta spasel ti slequil o'ntonale, ti stuq'uil o'ntonale. J'ech'el ja'uc pato o avo'nton ta stojol ti Dios avu'une.

⁷ Xi ta xal ti Diose: “Ti jteclum Canaane, mu'yuc ts'acal sbisoltac yu'un ti c'usi ta sbisane. Toj lec xa'i ti ta x'elc'anvan xchi'uque.

⁸ Xi ta xal ti Efraine: ‘Lic'ot xa ta jun muc'ul jc'ulej. Laj xa jta ti cajal lic'ot xchi'uque. Mu'yuc buch'u xu' ta sa'bun jmul ti jech laj yac' jol ta stsobel ti c'usitic x'ayan cu'un ti laj jta ta slubel xchamel ti yane.’

⁹ Ti vu'un Ajvalilune, ti ja' Diosun avu'un ti c'alal oyot to ox ta Egiptoe, caloj ono'ox ti ta jpas ta atojol ti ta xlic naquian yan velta ta axibalnae, jech c'u cha'al ti sc'ac'alil ti c'alal laj jta jbatic ta nupel ta be ta sbajtical banomile.

¹⁰ “Lic'opoj ta stojol ti j'alc'opetique. Epaj cu'un ti c'usitic laj yilic ti c'alal jam ti sba satique. Naca ta joyob c'op laj jc'oponic ti c'usi laj cac'be yilic ti j'alc'opetique.

¹¹ Ti ta jteclum Galaade, oy epal diosetic liquem yu'unic. C'u stu un, naca jeche' va'anbil diosetic. Ti ta Gilgale, ta xaq'uic ta matanal ti milbil tot vacaxe, co'ol s'elan epal lats tonetic ti altaretic yu'unique, ti cholol no'ox yu'unic ti ta osiltique.”

¹² Ti Jacobe jatav loq'uel. Bat snac' sba ta yosilal Aram. Ti bu taje, laj sta yajnil, abtej ta sq'uelel chijetic.

¹³ Ta sventa ti jun j'alc'ope, ti Diose laj sloq'ues talel ta Egipto ti jteclum Israele. Ta sventa ti jun j'alc'ope, chabiatic yu'un ti Diose.

¹⁴ Ti steclumal ti Efraine laj sliquesbeic sc'ac'al yo'nton ti Diose. Laj xa stic'beic chon ta yo'nton ti mu stac' ts'iquel ta xa'ie. Jech o xal un, ta xcajanbat ta sbaic yu'un Dios ti ja' chamebal ti c'usitic laj spasique. Cajal ta xc'ot ta sbaic ta stojel ti smul scolo'ique.