Oseas 11 - Bible in Tzotzil de Chamula

Ac'o mi jelavem stoyobbail steclumal ti Diose, c'ux ono'ox ta xa'i

¹ “C'alal ololic to ox ti jteclum Israele, jc'uxubinoj ta j'ech'el. Ti stuque, ti ja' jnich'one, laj quic' loq'uel talel ti ta Egiptoe.

² Ja' no'ox un, c'alal cac'ojbe yipal ta xquic' loq'uel talele, c'ajomal no'ox yantic xch'ac sba ta jtojol. Ti jteclumale, ja' xa bat yo'ntonic ta yac'bel milbil matanaletic ti c'usitic va'anbil ta diosetique. Ta xac'beic chic'bil pom ti c'usitic va'ajtic sloc'obbaile.

³ Manchuc mi jech scotol ti va'i s'elan taje, vu'un laj jbeiltas ti steclumal Efraine. Laj jchanubtas c'u s'elan ta xanavic batel, c'u stu un, ti stuquique mi ja'uc laj ya'ibeic smelol ti vu'un jbainojic ta xchabielique.

⁴ Ic'bil co'nton yu'un, mu xtuch' ta co'nton ta xc'uxubinel, laj quiq'uic talel ta jtojol. Laj jnabanic ta xocon jsat jech c'u cha'al jchu'nel olol, xye'elet coc jc'ob ta yac'bel ti sve'elique.

⁵ “C'u stu un, ti stuquique jbel yo'ntonic mu sutic talel ta jtojol. Jech o xal un, tsots sc'oplal ta sutic batel ta jteclum Egipto. Ta spasatic ta mantal yu'un ti jteclum Asiria xtoque.

⁶ Espada xa'i xcham xlajic ti jteclumetic yu'une. Ta xc'ot ta tsutsel xchi'uc ti nac'obbailetic yu'une. Ta xtub sc'oplal ta scoj ti c'usi ta snopic ta spasele.

⁷ Ti jteclumale ta xac'beic yipal ti ta xnamaj ta jtojole. Ac'o mi ta xalic ti oyun ta toyole, j'ech'el mu xaq'uic ta cajal ti jc'oplale.

⁸ “¿C'usi ta xcut ta jipot comel ta co'nton, Efraín? ¿C'usi ta xcut ta jtenot comel, Israel? ¿Mi yu'un xu' ta jlilinot jech c'u cha'al laj jtsutses ti jteclum Admae? ¿Mi yu'un xu' jech ta jpas ta atojol ec jech c'u cha'al laj jpasbe ti jteclum Zeboime? Xtal xbat ti co'nton avu'un ta xca'ie. Yu'un mu'yuc spajeb ti syail xc'uxul co'nton ta atojole.

⁹ Mu'yuc ta jpas ta atojol ti xi s'elan ta xac'ot yu'un ti sc'ac'al co'ntone: Mu'yuc xa ta jtubbot ac'oplal yan velta, Efraín, yu'un Diosun ti vu'une, ma'uc jeche' vinic no'ox, yu'un vu'un ch'ul Diosun ti oyun ta atojole. Ma'uc lital yo' ta jtubbot ac'oplal.”

¹⁰ Ti stuquique ta sts'acliic ti Diose. Jech ti stuque xloquet no'ox liquel snuc' jech c'u cha'al jcot león ta stojol ti yajcontraique. Ti jech xloquet no'ox ti snuq'ue, jech ti yu'untaque, xniclajetic xa ta xi'el ta xvulic ti ta xliquic talel ta smaleb c'ac'ale. p

¹¹ Xi ta xal xtoc ti Diose: “Co'ol xa s'elanic mutetic xniclajetic ta xi'el ta xvulic ti ta xliquic talel ta Egiptoe. Co'ol s'elan palomaetic ta xvulic ti ta xliquic talel ta jteclum Asiriae. Vu'un ta jpas ti ta xcha'lic naquiicuc ta snaique. Ti vu'un Diosune, mu me lo'iluc no'ox ta xcal.

Xchopolal steclumal ti Diose

¹² “Ti Efraine, jun spimil ti jutbil c'op oy yu'un ta jtojole. Ti jteclum Israele, busul no'ox yu'un ta jtojol ti naca lo'laele. Ti Judá eque laj xa xch'ac sba ta stojol ti Diose. Avi tana une, ja' xa sbic'tajesoj sba ta stojol ti meltsanbil loc'obbailetique.