Oseas 10 - Bible in Tzotzil de Chamula

Ta xich' lilinel ti altaretic ti oy ta Israele

¹ Ti Israele co'ol s'elan jtec' uva ti vojol no'ox ta xac' ti sate. Ja' no'ox un, ti jech mu albajuc ta xac' ti sate, mu'yuc spajeb, naca sva'anel no'ox yu'un ti altaretic xtoque. C'alal mu no'ox albajuc yutsilal ta q'uelel ti yosilalique, ja' jech xtoc ochem yipal yu'unic ta smeltsanel ti mu no'ox albajuc yutsil ti ts'uiltasbil loc'tabil tonetique.

² Ti Israele, cha'ch'ac yo'ntonic. Avi tana une, ta stoj ya'i ti smulique. Ti Diose ta slilinbe ti altaretic yu'unique. Ta sbutq'uinanbe ti ts'uiltasbil tonetic yu'unique.

³ Va'i un, ti jteclum taje xi ta xlic yalique: “Mu'yuc ajvalil ta jtojoltic, yu'un mu'yuc jnijilul jchimilultic ta stojol ti Diose. Ja' no'ox un, ¿mi yu'un van oy c'usi xu' ta spas jun ajvalil ta jtojoltic?

⁴ Ja' no'ox ti c'usiuc no'ox xloc' ta alilanel yu'une, mu xc'ot ta pasel yu'un. Oy c'usi ta sva'an sba ta yalel, ta xac' spirma ta jun trate yilel. Ti c'u s'elan ta xchapanvane, co'ol s'elan jech c'u cha'al jtec'uc jmilvanej momol ti ta xch'i ti bu xcholet ti ts'unubal ta osile.”

⁵ Ti jnaclejetic ta jteclum Samariae, ta xniquic ta xi'el. X'oq'uic xa ti jech tub sc'oplal ti sloc'obbail ch'in vacax ti oy ta Bet-avene. Ta scoj ti va'i s'elan ch'ay ti yutsilal slequilale, jech o xal ti jteclume xchi'uc ti paleetique, oyic ta me'inal ta xa'iic.

⁶ Ti sloc'obbail ch'in vacaxe ta xich' ich'el batel ta jteclum Asiria yo' jech ta xich' aq'uel ta stojol ti muc'ul ajvalile. Xi s'elan ti q'uexlal ta xcom ti Efraine: Ti Israele nijil ta xcom ta q'uexlal xchi'uc ti sloc'tabil diose.

⁷ Ta xc'ot ta tubel sc'oplal ti ajvalil yu'un ti jteclum Samariae, co'ol s'elan jepel te' ti xcajet ta xch'ay batel ta ba vo'e.

⁸ Ta xc'ot ta pasel ti ta xich' lilinel ti jujun c'opojebaletic yu'unique, ja' ti bu ta sa' smul xchi'uquic ti jteclum Israele. Ta xlic ch'iuc tomal ch'ixetic xchi'uc yan ch'ixetic ta sba ti jinemal altaretique. Jech ti jnaclejetique xi ta xlic yalic ta stojol ti vitsetique: “Nac'uncutic yo' jech mu xi'ilecutic.” Xi ta xalbeic xtoc ti ch'en vitsetique: “Loman talel ta jbacutic.”

Chapanbil yu'un Dios ti j'ech'el ta xich' ti Israele

⁹ Ti Diose xi ta xale: “Ti Israele mu xquechan sba ta sa'el ti smule, lic talel yu'un c'alal oy ta Gabaa. Stsacoj lec yip ti mulil ta stojolique. Jech o xal un, ti buch'utic toj chopolic taje, ta xc'ot ti leto ta stojolic tey ta Gabaae.

¹⁰ Ti jteclume, ta xcac'be ya'i tsitsel ti c'usi ora ta jc'ane. Ta stsob sbaic talel muc'tiquil lumetic ta stojol ti c'alal ta xcac'be tsitsel yu'un ti xchopolalique.

¹¹ “Ti Efraine, jech xa ox c'u cha'al me' vacax ti pasbil ta manxue, ti lec ta xa'i ta xvoch'be loq'uel spat ti trigoe. Ta ora ti vu'une laj jchucbe stsacleb yabtejeb ta spat snuc' ti c'upil sba ta q'uelele yo' jech ta xjoch batel ti carretae. Ti Judá xtoque ta xjoch batel ti slocobil banomile. Ja' jech xtoc ti Jacobe ta xjoch batel ti sbec'obil lume.

¹² Xichi laj calbeique: Licuc ta yabtelanel ti c'usi leque. Jech ta xataic ti syail xc'uxul o'ntonale. Abtelanic lec ti banomil ta sventa ti ach' ts'unubale, ja' xa me yorail ta sa'el ti Diose, ja' to ti c'uxi ta xvul ta loq'uele, ti yich'oj talel ti coltael ti co'ol s'elan chaquilo' ti xlomet no'ox vulel ta atojolique.

¹³ Le' une, laj xa avabtelanic ta spasel ti achopolalique, ti naca mu'yuc smelol ti c'usi laj ataic ta tsobel yu'une. Xbet'bun no'ox ave ta yalel ti c'usi naca jutbile. “Ti laj apat avo'nton yu'un ti acarretatac ta sventa ti ac'ob-letoe, ti mu no'ox albajuc ti j'ac'-letoetic avu'une,

¹⁴ ja' yu'un un, ta xch'ay olajic. Jeche' xa, xvochlajetic liquel ti avinictaque. Ti pojobbailetic avu'une pochajtic ta xcom. Jech ta xc'ot ta pasel jech c'u cha'al laj spas ti ajvalil Salmán ti laj slilin ti Bet-arbel ta sc'ac'alil ti c'alal ech' ti letoe, ti j'ech'el tsalbil c'otic ti me'il xchi'uc ti yalabe.

¹⁵ Ti va'i s'elan taje, mu yanuc jech ta xc'ot ta atojolic, jnaclejetic yu'un jteclum Betel, ta scoj ti mu xa no'ox albajuc ti spimil ti amul acolo'ique. Ti ajvalil yu'un ti Israele ta xc'ot ta chamel c'alal naca ta sacub talel ti osile.