Números 7 - Bible in Tzotzil de Chamula

Matanal sventa sts'uiltasel ti ch'ulnae

¹ Ti sc'ac'alil c'alal tsuts yu'un smeltsanel Axibalna ti Moisese, laj svaj ta jtunel aceite sventa ich'ob abtele jmoj xchi'uc scotol ti c'usitic ta xtun ta Axibalnae, xchi'uc ti c'usitic ta xtun yu'un ti altare.

² Va'i un, ti banquilaletic yu'un ti jujuvoc' ta jujuchope, ti buch'utic coltavanic ta stsaquel ti biile, batic,

³ bat yaq'uic ta matanal ta stojol Dios vaquib carreta ti lec macbile xchi'uc lajcha'cot vacax. Ti xcaltique, ja' laj yaq'uic jun carreta ta cha'cha'vo' banquilaletic xchi'uc jujucot vacax yu'unic. Scotol taje, laj yaq'uic ta yeloval ti Axibalnae.

⁴ Va'i un, ti Diose xi laj yalbe ti Moisese:

⁵ “Ch'amo ti carretaetique xchi'uc ti vacaxetique. Ac'bo jelavel ti levitaetique, ti ac'o tunuc yu'unic ta sventa ti yabtelic ti oy sc'oplal ta Axibalna ti bu ti nupel ta bee, ja' ti c'u s'elan ti yabtelic ta jujun tale.”

⁶ Ti Moisese laj xch'am laj stsac ti carretaetique xchi'uc ti vacaxetique. Laj xch'acanan ta stojol ti levitaetique.

⁷ Chib carreta xchi'uc chancot vacax, laj yac'be yich' snitilultac ti Gersone, ti ja' jech yepal ta xtun yu'unic ta sventa ti yabtelique.

⁸ Chanib carreta xchi'uc vaxac-cot vacax, laj yac'be yich' snitilultac ti Merarie. Yu'un ja' jech yepal ta xtun yu'unic ta sventa ti yabtelic ti ja' tojobtasbilic yu'un ti Itamare, ti ja' xnich'on ti pale Aarone.

⁹ Yan ti snitilultac ti Coate, mu'yuc x'ac'batic ti carretae, mi ja'uc ti vacaxe, yu'un ja' sbainojic ta yich'el batel ti ta scajanic ta snequebic ti c'usitic ac'bil xa jelavel ta ventainele.

¹⁰ C'alal laj yich' ac'bel stunesel ta sventa Dios ti altare, jech ti banquilaletic yu'un ti jujuvoq'ue laj yaq'uic ta sts'el altar ti matanal ti laj yich'ic batele.

¹¹ Va'i un, ti Diose xi laj yalbe ya'i ti Moisese: “Ti jech ta xaq'uic matanal ti banquilaletic yu'un ti jujuvoq'ue, jujun c'ac'al, cajal ta xc'ot sc'oplalic ti ta xaq'uic ti matanal ta sventa ta x'och ta tunel yu'un Dios ti altare.”

¹² Ti sba c'ac'ale, ja' laj yich' batel matanal yu'un ti Naasone, xnich'on ti Aminadabe, banquilal yu'un ti jvoc' yu'un ti Judae.

¹³ Ti matanal ti laj yaq'ue, ja' jun lech-lech plata taq'uin ti ja' yich'oj jmil xchi'uc chanib ciento xchi'uc to lajuneb xcha'vinic (1,430) gramo ti yalale. Laj yac' xtoc jun muc' ta taza ti meltsanbil ta plata ti ja' yich'oj vucub ciento xchi'uc lajuneb xchanvinic (770) gramo ti yalale, (ja' ti c'u s'elan, liquem sbisel yalal yu'unic ta Axibalnae). Ti chib taje, nojic lec bat ta t'ujbil harina ti vots'bil ta aceitee, ti ja' jun matanal ta sventa ti sat ts'unubile.

¹⁴ Ma'uc no'ox taje, yu'un laj yac' ta matanal jun lech ti meltsanbil ta oroe, ti yich'oj lajuneb svacvinic (110) gramo ti yalale, ti noj ta pome.

¹⁵ Ma'uc no'ox taje, yu'un laj yac' ta matanal jcot ch'iom tot vacax, xchi'uc jcot ch'iom tot chij ti yich'oj jun jabile, ta sventa ti jun yutsil smuil ta xich' chiq'uele.

¹⁶ Ma'uc no'ox taje, yu'un laj yac' ta matanal jcot tot tentsun ti ta xich' svocol ta scoj ti mulile.

¹⁷ Ti ta xich' svocol ta sventa lajesobil o'ntonale, laj yac' ta matanal cha'cot tot vacax, vo'cot ch'iom tot chij, vo'cot tot tentsun, xchi'uc vo'cot ch'iom tot chij ti yich'oj jun jabile. Taje, ja' matanal yu'un ti Naasone, xnich'on ti Aminadabe.

¹⁸ Ti ta xchibal c'ac'al une, laj yich' batel matanal yu'un ti Natanael xnich'on ti Zuare, banquilal yu'un ti jvoc' yu'un ti Isacare.

^19-23 Ti matanal laj yaq'ue, ja' jech yepal laj yac' jech c'u cha'al laj yac' ti Naasone.

²⁴ Ti ta yoxibal c'ac'ale, laj yich' batel matanal yu'un ti Eliab xnich'on ti Helone, banquilal yu'un ti jvoc' yu'un ti Zabulone.

^25-29 Ti matanal laj yaq'ue, ja' jech yepal laj yac' jech c'u cha'al ti buch'utic laj yaq'uic ta ba'yele.

³⁰ Ti ta xchanibal c'ac'ale, ja' laj yich' batel matanal yu'un ti Elisur xnich'on ti Sedeure, banquilal yu'un ti jvoc' yu'un ti Rubene.

^31-35 Ti matanal laj yaq'ue, ja' jech yepal laj yac' jech c'u cha'al ti buch'utic laj yaq'uic ta ba'yele.

³⁶ Ti ta yo'obal c'ac'al une, ja' laj yich' batel matanal yu'un ti Selumiel xnich'on ti Zurisadaie, banquilal yu'un ti jvoc' yu'un ti Simeone.

^37-41 Ti matanal laj yaq'ue, ja' jech yepal laj yac' jech c'u cha'al ti buch'utic laj yaq'uic ta ba'yele.

⁴² Ti ta svaquibal c'ac'ale, laj yich' batel matanal yu'un ti Eliasaf xnich'on ti Reuele, banquilal yu'un ti jvoc' yu'un ti Gade.

^43-47 Ti matanal laj yaq'ue, ja' jech yepal laj yac' jech c'u cha'al ti buch'utic laj yaq'uic ta ba'yele.

⁴⁸ Ti ta yucubal c'ac'al une, laj yich' batel matanal yu'un ti Elisama xnich'on ti Amiude, banquilal yu'un ti jvoc' yu'un ti Efraine.

^49-53 Ti matanal laj yaq'ue, ja' jech yepal laj yac' jech c'u cha'al ti buch'utic laj yaq'uic ta ba'yele.

⁵⁴ Ti ta xvaxaquibal c'ac'al une, laj yich' batel matanal yu'un ti Gamaliel xnich'on ti Pedasure, banquilal yu'un ti jvoc' yu'un ti Manasese.

^55-59 Ti matanal laj yaq'ue, ja' jech yepal laj yac' jech c'u cha'al ti buch'utic laj yaq'uic ta ba'yele.

⁶⁰ Ti ta sbalunebal c'ac'al une, laj yich' batel matanal yu'un ti Abidan xnich'on ti Guidonie, banquilal yu'un ti jvoc' yu'un ti Benjamine.

^61-65 Ti matanal laj yaq'ue, ja' jech yepal laj yac' jech c'u cha'al ti buch'utic laj yaq'uic ta ba'yele.

⁶⁶ Ti ta slajunebal c'ac'al une, laj yich' batel matanal yu'un ti Ahiezer xnich'on ti Amisadaie, banquilal yu'un ti jvoc' yu'un ti Dane.

^67-71 Ti matanal laj yaq'ue, ja' jech yepal laj yac' jech c'u cha'al ti buch'utic laj yaq'uic ta ba'yele.

⁷² Ti ta sbuluchibal (11) c'ac'al une, laj yich' batel matanal yu'un ti Pagiel xnich'on ti Ocrane, banquilal yu'un ti jvoc' yu'un ti Asere.

^73-77 Ti matanal laj yaq'ue, ja' jech yepal laj yac' jech c'u cha'al ti buch'utic laj yaq'uic ta ba'yele.

⁷⁸ Ti ta slajchebal (12) c'ac'al une, laj yich' batel matanal yu'un ti Ahira xnich'on ti Enane, banquilal yu'un ti jvoc' yu'un ti Neftalie.

^79-83 Ti matanal laj yaq'ue, ja' jech yepal laj yac' jech c'u cha'al ti buch'utic laj yaq'uic ta ba'yele.

⁸⁴ C'alal laj yich' aq'uel ta tunel yu'un Dios ti altare, ti banquilaletic yu'un ti jujuvoc' israeletique, xi s'elan ti matanaletic laj yaq'uique: lajcheb lech-lech plata taq'uin, lajcheb muc'tic tazaetic, xchi'uc lajcheb lech ti naca meltsanbil ta oroe.

⁸⁵ Ti jujun lech-lech plata taq'uine, ja' jmil xchi'uc chanib ciento xchi'uc lajuneb xcha'vinic (1,430) gramo ti yalal yich'oje. Ti jujun jarru ti meltsanbil ta platae, ja' vucub ciento xchi'uc lajuneb chanvinic (770) gramo ti yalal yich'oje. Loc' ta chapel scotol yalal ti lech-lech plata taq'uine, xchi'uc ti jarru ti meltsanbil ta platae, ja' vaquib xcha'vinic ta mil xchi'uc chanib ciento (26,400) gramo ti yalal yich'oje, ja' ti c'u s'elan liquem yu'unic sbisel ta ch'ulnae.

⁸⁶ Ja'uc ti lajcheb (12) lech ti naca ta oro meltsanbil ti nojic ta pome, ja' lajuneb svacvinic (110) gramo ti yalal yich'oj ti jujune, ja' ti c'u s'elan liquem sbisel yu'unic ta ch'ulnae. Scotol ti muc'tic lechetic ti naca oro meltsanbile, ja' loc' ta chapel ta scotol, jmil xchi'uc vaclajunvinic (1,320) gramo ti yalal yich'oje.

⁸⁷ Ja'uc ti chon bolometic ti jun yutsil smuil ta xich' chiq'uele, ja' lajcha'cot ch'iom tot vacax, lajcha'cot tot chij, lajcha'cot ch'iom tot chij ti yich'oj jun jabile, xchi'uc ti scap matanal sat ts'unubal yu'unic ti jujune, lajcha'cot tot tentsun ti ta xich' svocol ta scoj ti mulile.

⁸⁸ Ti chon bolometic ti ta xich' svocol ta sventa ti lajesobil o'ntonale, ja' chanib xcha'vinic (24) ta cot ch'iom tot vacax ta scotol, oxvinic (60) ta cot tot chij, oxvinic (60) ta cot tot tentsun, xchi'uc oxvinic (60) ta cot ch'iom tot chij ti yich'oj jun jabile. Ja' jech yepal matanal laj yich' aq'uel ta sc'ac'alil ti c'alal laj yich' aq'uel ta tunel yu'un Dios ti altare.

⁸⁹ C'alal och batel ti Moisés ta Axibalna ti bu nupel ta be yo' jech ta sc'opon sbaic xchi'uc ti Diose, vinaj talel ti ta xc'opoj talel ti Dios ta sba smac sti' xcaxail ti tratee, ta o'lol yu'unic ti c'usi chib ti oy xiq'uique.