Números 5 - Bible in Tzotzil de Chamula

Oy sc'oplal ta xich' jipel loq'uel ti buch'u soquesoj sba xchi'uc jtosuc ti albil sc'oplal mu staq'ue

¹ Ti Diose xi laj yalbe ti Moisés ti c'alal laj sc'opon talele:

² “Albo ya'i mantal ti israeletique ti ac'o sjipic loq'uel c'alal to sti'il jteclum scotol ti buch'utic ti c'usiuc no'ox chamelal ti ch'iem ta snuculilique, mi ja' ti buch'u oy c'usi xmalmun yu'unique, mi ja' ti buch'u laj soques sba xchi'uc ta scoj ti laj spic ti c'usi chamemique.

³ Yu'un mu'yuc ta alel c'usiuc no'ox yabtel mi vinic mi ants, ac'o sloq'uesic batel c'alal to sti'il jteclum. Ja' to jech mu'yuc buch'u ta soques ti jteclum ti bu ta xinaqui ta stojolique.”

⁴ Jech ti israeletique laj xch'unbeic smantal Dios ti albatic yu'un ti Moisese. Laj sloq'uesic batel c'alal to sti'il jteclum ti buch'utic oy svocolic yu'un ti va'i s'elan taje.

Oy jbel c'usi tsots albil ti ta soquesvan xchi'uque

⁵ Ti Diose xi laj yalbe ya'i ti Moisés ti c'alal laj sc'opon talele:

⁶ “Xi xcholet xavalbe ya'i ti israeletic jech c'u cha'al li'e: C'alal mi oy jun vinic mi jun ants, ti mu'yuc stuq'uil ta stojol ti Dios ti ta soques ta sts'i'le'el ti c'usi oy yu'un ti xchi'ile, ti jech ta spas taje, ta sta smul.

⁷ Ja' yu'un un, tsots sc'oplal, ac'o ya'i sba. Ma'uc no'ox taje, ac'o stojbe sutel ti buch'u oy c'usi laj soquesbe ta sts'i'le'ele. Yu'un ja' jech yepal ta stoj ti c'u yepal laj soques ta sts'i'le'ele, xchi'uc ta to xac' jch'ac ta vo'ch'ac ti c'u yepale.

⁸ Yan ti mi chamem xa ti buch'u oy c'usi laj yich' soquesbele, ti mi mu'yuc yuts' yalal ti xu' ta xich' ti c'usi ta xich'be stojole, ja' xa ta xcom ta yu'un ti Diose yo' jech ta xtun yu'un ti palee. Ma'uc no'ox me un, yu'un ti palee, ac'o ono'ox me yac' ti chij ti ta xjelav ta xch'ayobil smul ti buch'u taje.

⁹ “Scotol ti jtunel matanaletic ti ta xaq'uic ti israeletic ta stojol ti Dios ti ta xich'ic ac'bel ti palee, ja' ta xc'ot ta yu'un ti palee.

¹⁰ Scotol ti c'usi loc' xa sc'oplal yu'unic ti ta xc'ot ta yu'un ti Diose, ac'o yich' batel ta stojol ti palee yo' ta xc'ot ta yu'un.”

Oy jbel ti c'usi tsots albil sc'oplal ta sventa ti it'ixale

¹¹ Ti Diose xi laj yalbe ti Moisés ti c'alal laj sc'opon talele:

¹² “Xi xcholet xavalbe ya'iic ti israeletic jech c'u cha'al li'e: Xu' nan ti ta xc'ot ta pasel ti oy jun ants ta smucul sati ti smalale,

¹³ ti ta xmulivaj xchi'uc yan vinic ti mu ja'uc sna' ti smalal ti c'alal oy sc'oplale. Ac'o mi jech ta spas ti ants ti ta soques ti sc'oplal ti ta soques sbae, mucul ta xcom ta scoj ti mu'yuc xvinaj ti yacal ta spas taje.

¹⁴ Ti jech taj une, ta xlic it'ixajuc ti vinic yu'un ti yajnile. Xu' nan xtoc ta xlic it'ixajuc ti vinic c'alal mu jechuc ta spas ti antse.

¹⁵ Ti c'uc s'elan ti xcha'tosal taje, ti vinique ta xic' batel ti yajnil ta stojol ti palee. Ta xac' chib kilo matanal juch'bil jchop o ta trigo ta sventa ti yajnile. Ja' no'ox un, mu'yuc ta smalbe ti aceite ta sba ti harinae. Mi ja'uc ta xac'be pom. Yu'un ja' jun matanal ta scoj ti it'ixale, ti ja' jun matanal ta svinajesel ti mulile.

¹⁶ “Jech ti pale une ta xalbe ti ants ti ac'o nopajuque. Ta xac' va'luc ta stojol ti Diose.

¹⁷ Ts'acal to un, ta slup loq'uel jutebuc ts'uiltasbil vo' ti ta xch'am ta lumal bine, ti ta scap ochel jutebuc spucuquil banomil yu'un ti Axibalnae.

¹⁸ Ta xac' va'luc xtoc ti ants ta stojol ti Diose. Ta sjitunbe ti sjole. Ta xac'be ta sc'ob ti matanal yu'un ti it'ixale yo' jech ta xvinaj ti mulile. Jech ti stuc une ta stsac ti ch'ail vo' ti ta xac' bac vocole.

¹⁹ Va'i un, ti palee xi ta sva'an sba ta yalbel ti antse: ‘Mi mu'yuc alo'laoj yan vinique, mi mu'yuc amucul-satioj ti amalale, mi mu'yuc c'usi apasoj xchi'uc yan vinic ti ja' ta soquesote, mu'yuc c'usi chopol ta spasbot c'alal ta xavuch' ti ch'ail vo' ti ta xac' bac vocole.

²⁰ Yan ti mi amucul-satioj ti amalal ta scoj mi alo'laoj yan vinique, ti c'ot ta pasel avu'un ti ja' ta xa asoques aba xchi'uque,

²¹ va'i unbi, ti Diose ta xac' ta ilel ti ta xac'bot bac vocol ta sba ta sat ti jteclum ti jech asoquesoj abae. Ta xc'ot ta pasel yu'un ti ta situb ti ach'ute, ti ta soques ti yav avole.

²² Ti stojol ta xlic avich' taje, ja' o ta xlic avich' avocol yu'un ti c'alal ta xavuch' ti j'ac'-bac-vocol vo'e.’ ‘Jechuc, ja' xitun o’, xi ta stac' ti antse.

²³ “Va'i un, ti palee ta sts'ibta ta vun sc'oplal ti bac vocole, ti ta stubbe sc'oplal ta sventa ti ch'ail vo'e.

²⁴ Ja' yu'un un, ta xlic yac'be yuch' ti antse yo' ta xlic c'uxubtasbat ti xch'ute.

²⁵ Ta stsacbe ta sc'ob ti matanal yu'un ti it'ixale yo' jech ta xac' ta stojol ti Diose. Mi laj une, ta xbat yac' ti matanal ta sba ti altare.

²⁶ Ta stsac no'ox xtoc jopuc matanal sat ts'unubil ti jchop o ta trigoe, ti ta xchic' ta sba altar ti ja' jun matanal ti vulesel ta o'ntonale. “Mi laj xa yac'be yuch' ch'ail vo' ants ti pale une,

²⁷ yu'un mi smucul-satioj ti smalale, jech ti j'ac'-vocol ch'ail vo' taje, ta xc'uxubtasbat xch'ut yu'un. Ta xlic situb ti xch'ute. Ta xlic socuc ti yav yole. Ta xjoybij lec ta bac vocol yu'un ta sba ta satic ti jteclume.

²⁸ Yan ti mi mu jechuc spasoj ti antse, mu'yuc c'usi ta spasbat yu'un ti ch'ail vo'e, ta x'alaj lec.

²⁹ “Ti va'i s'elan ti oy c'usi tsots albile, ja' jech snupin sba xchi'uc ti buch'u ta smucul-sati ti smalale, xchi'uc ti buch'u ta xlic it'ixajuque.

³⁰ Mi mo'oje, ja' ta sventa ti buch'u ja' no'ox ta xit'ixta ti yajnile. Ja' yu'un un, ti vinique, tsots sc'oplal ac'o sva'an ta stojol Dios ti yajnile. Jech ti palee jech ta spas jech c'u cha'al yaloj ti oy c'usi jbel tsots albile.

³¹ Ja'uc ti malalile ch'abal smul ta xc'ot. Yan mi jech ono'ox smul ti ants une, ta me sta svocol xchi'uc un.”