Números 36 - Bible in Tzotzil de Chamula

Ti xich'ic xrextoic ti antsetique

¹ Ti jujuchop banquilaletic yu'un snitilultac ti Galaade, ti ja' sbats'i nitilultac ti Maquire, ti Manasese, xchi'uc ti Josee, xi laj yalic ti c'alal bat sc'oponic ti Moisese xchi'uc ti banquilaletic yu'un ti israeletique:

² —Ti vo'ote, Moisés, la'albat mantal yu'un ti Diose ti ta yorail ta xich' q'uelel ti c'u s'elan ta xach'acbe banomil ti jujuchop israeletic ti bu ta xc'ot ta yu'unique. Jech xtoc laj yalbot mantal ti banomil ti oy sc'oplal ta xich' ti Zelofehad ti ja' cuts' calalcutique, ti ja' ac'o avac'be yich'ic ti yantsiquil nich'nabe.

³ Ja'uc le' une, mi malijic ta jvoc' xa snitilul ti Israele, ti sbanomil ti laj yich'ic ta jventacutique, ta xjelav ta sc'ob ti yan nitilulil ti bu batic ta malijele. Ti jech taj une, ta xispojbuncutic batel ti naca ta yorail laj quich'cutic ac'bele.

⁴ Capaluc un, ti c'alal ta xc'ot sjabilal ti pojel colel ti oy sc'oplal ta xc'ot ta stojol ti Israele, j'ech'el ta xosilinic banomil ti jvoc' yan nitilulile, laj o sc'oplal ti ja' to cu'untic ti banomile.

⁵ Ta sventa ti c'u s'elan tojobtasat ta bijubtasel yu'un ti Dios ti Moisés, xi xcholet lic yalbe ya'iic mantal ti israeletique: —Ti viniquetic nitiluletic yu'un ti Josee, jech xal ya'uquic.

⁶ Ti Diose ta xac' ye sti' ti ac'o malijicuc yantsiquil nich'nab ti Zelofehade ti buch'u xc'ot ta o'ntonal ta xilique, ipaluc mi ja' ti jvoc' nitiluletic ti liquem talel ta sventa snitilul ti stot sme'ique.

⁷ Ti banomil ti ta xich'ic jujusep ti israeletique, sc'an ti mu stiq'uic ochel yan nitiluletique. Yu'un scotol ti israeletique, sc'an ti ac'o tojobicuc ta xchabiel ti xrextoic ta sventa ti snitilulique.

⁸ Buuc nitilulil ti jun ants mi yich'oj xrexto banomile, tsots sc'oplal ti ac'o malijuc ta stojol jun vinic ti ja' xchapalul sbaic ta nitilulile. Ti mi jech taj une, staoj yav xtojob ta sq'uelel lec xrextoic ti jujun israeletic ti ac'bat xrextoic yu'un ti stot sme'ique.

⁹ Yu'un tsots sc'oplal ti mu me xjelav ech'el ta yan nitilulil ti rextoile. Tsots sc'oplal ti jujuvoc' snitilul ti Israele, tojobuc lec ta stuc'ulanel sq'uelel lec ti sbanomilic ti bu c'ot ta xrextoe.

¹⁰ Jech c'u cha'al albat mantal yu'un Dios ti Moisese, ja' jech laj spasic yantsiquil nich'nab ti Zelofehade.

¹¹ Va'i un, ti Maalae, ti Tirsae, ti Hoglae, ti Milcae, xchi'uc ti Noae, yantsiquil nich'nab ti Zelofehade, laj yic'beic squerem sjuntotic ta sventa ti stot sme'ique.

¹² Taje, ja' snitilultac ti Manasés xnich'on ti Josee. Va'i un, ti rextoile com ta stojol ti jvoc' nitilulil ti bu liquem talel sts'unubal ti stot sme'ique.

¹³ Taje, ja' jech s'elan ti mantaletique, ti razonetic ti laj yal ti Dios ta stojol ti israeletic ta sventa ti Moisese, ti albat ta stenlejal yu'un Moab ta sti'il uc'um Jordán ta yeloval Jericoe.