Números 35 - Bible in Tzotzil de Chamula

Ta xich' xrextoic ti levitaetique

¹ Ti Diose xi laj yalbe ti Moisés ti oy ta stenlej yosil Moab ta sts'el uc'um yu'un Jordán ti oy ta yeloval Jericoe:

² “Albo ya'i mantal ti israeletique ti bu ta xc'ot ta sbanomilic ta yich'ele, ac'o yac'beic jteclumetic ti levitaetique yo' jech xu' ta xnaquiic. Ac'o yac'beic xtoc osil ta spat xocon ti jteclume yo' ta xve' ti xvacaxique.

³ Yu'un ti levitaetique ta xnaquiic ta jteclum taje, ti oy yavil sve'eb xvacaxic xchi'uc yan chon bolometic yu'unic ta osiletique.

⁴ Ti osil ti tsots sc'oplal ta xavac'beic ta sventa sve'eb ti chon bolometic yu'unique, ja' o'lol yo'obal ciento metro yiloj ti bu ta xlic smocal ti jteclume.

⁵ Yu'un ta scotol ti banomile, co'ol sjamlej ti xchanjotale, yu'un yich'oj baluneb ciento (900) metro ta jujujote. Yu'un ti lec xcaltique, co'ol sbisol yich'oj ti oy ta sloq'ueb c'ac'ale, ti oy ta smaleb c'ac'ale, ti oy ta yolon ti yolon xocon sloq'ueb c'ac'ale, xchi'uc ta yolon ti yac'ol xocon smaleb c'ac'ale. Yu'un ta o'lol setel ta xcom ti jteclume xchi'uc ti yavil sve'eb ti chon bolometique.

⁶ “Ti jteclumetic ta xavac'beic sventain ti levitaetique, vaquib (6) jteclumetic sventa nac'obbail yo' oy bu xu' ta snac' sba mi oy buch'u laj smile. Ma'uc no'ox ti jech yepal taje, ta to xavac'beic chib yoxvinic (42) ta lum.

⁷ Ti ta xc'ot ta sventaic ta scotol lum ti tsots sc'oplal ta xavac'beic yich' ti levitaetique, ja' vaxaquib yoxvinic (48) ta chop lum xchi'uc yosilal ti bu xu' ta xve' ti xchon sbolomique.

⁸ Ti c'alal ja' yosil sbanomil stuquic ti israeletic ti ta xac'beic jteclumetic ti jvoc' levitaetique, yu'un ti jujuvoc' nitiluletique, xi s'elan sc'an ta spase: Ja' ep jteclumetic ta xac' ti buch'u smacoj epal osiletique. Jutuc no'ox jteclumetic ta xac' ti buch'u juteb smacoje.”

Ti pojobbail jteclumetique

⁹ Ti Diose xi laj yalbe ti Moisés ti c'alal laj sc'opon talele:

¹⁰ “Xi xcholet xavalbe ya'iic ti israeletic jech c'u cha'al li'e: C'alal mi laj atuch'ic jelavel ti uc'um Jordán yo' ta xa'ochic ech'el ta Canaane,

¹¹ tsots sc'oplal sc'an xat'ujic jayibuc lumetic ti ta xtun ta sventa pojobbaile yo' jech oy bu xu' ta snac' sba ti buch'u mu yaleluc ta xmilvane.

¹² Yu'un ti bu taje, xu' ta spoj sba yo' jech mu xlaj ta milel yu'un yuts' yalal ti buch'u laj smile, ja' to ti mi chapanat ba'yel yu'un ti jteclume.

¹³ Ti vaquib jteclumetic ti c'otem ta sventa pojobbaile, xi s'elan oy ti sc'oplale:

¹⁴ Ta xtun oxib ti ta yeloval sloq'ueb c'ac'al yu'un ti uc'um Jordane. Ta xtun oxib xtoc ti oy ta Canaane.

¹⁵ Ti vaquib jteclumetic taje, ja' pojobbail jteclum ti ta xtun yu'un ti israeletique, xchi'uc ti jyanlumetic ti nacalic ta atojolique, mi naca no'ox j'ech'el-be x'ech' ta alumalique. Ti bu taje, xu' ta snac' sba ti buch'uticuc ti mu yaleluc ta xmilvane.

¹⁶ “Mi oy buch'u yayijesvan xchi'uc c'usiuc no'ox taq'uinale, mi cham o xchi'uc ti buch'u yayijeme, ja' xa milbil c'ot unbi. Ti jmilvaneje chapal xa sc'oplal ta xich' milel.

¹⁷ “Mi oy buch'u laj sc'ojbe ton xchi'il ti naca xa mu cham o yu'une, ti cham ono'ox xtoc ti jlajel tone, ja' xa milbil c'ot unbi. Ti jmilvaneje chapal xa sc'oplal ta xich' milel.

¹⁸ “Mi oy buch'u ta sc'ojbe te' xchi'il ti naca xa mu xcham o yu'une, ti cham ono'ox xtoc ti jc'ojel ta te'e, ja' xa milbil c'ot unbi. Ti jmilvaneje chapal xa sc'oplal ta xich' milel.

¹⁹ Ti yuts' yalal ti jmilele, ja' xa ta sva'an sba ta smilel ti matarol ti mi oy bu laj snup ta bee.

²⁰ “Mi oy buch'u ta sc'ac'al yo'nton ta xtacoltavane, mi yalel oy c'usi ta sjipbe ech'ele,

²¹ mi laj sc'abbe majel ta scoj ti mu lecuc xil sbaic xchi'uque, ti mi cham o ta j'ech'el ti june, ti buch'u yalel sa'sune, chapal xa sc'oplal ta xich' milel. Yu'un ja' jun jti'oval. Ti yuts' yalal ti animae, ti mi sta ti jmilvaneje, ja' xa ta sbain ta smilel.

²² “Xu' van ti oy buch'u mu yaleluc laj spas ti tacoltavane, ti ma'uc scontra sbaique, ti oy c'usi laj sjip batel ti mu yaleluc laj sjip ech'ele.

²³ Xu' van ti jip xut no'ox ech'el ti ton ti xu' ta xmilvan oe, ti mu'yuc laj stuc'ulan leque, ti oy buch'u lec laj sc'ojbe c'otel ti tone, ti cham o yu'une, ti ma'uc scontra sbaique, ti mu ja'uc jutebuc oy ta yo'nton ti oy c'usi chopol ta sc'an ta spasbee.

²⁴ Va'i un, ti jteclum une ta xc'otic ta jun jchapanvanejetic ti ta sva'an sbaic ta xchapanbel sc'oplal ti buch'u laj sta ti svocole yo' jech mu xlaj ta milel yu'un yuts' yalal ti anima ti ta spacbeic sc'oplal jech c'u cha'al liquem yu'unic ti mantale.

²⁵ Ti jteclume, tsots sc'oplal ac'o spojic ti buch'u laj sta ti svocole yo' jech mu xmilat yu'un yuts' yalel ti buch'u chame. Tsots sc'oplal ac'o sutuc batel yu'unic ta pojobbail jteclum ti bu to ox snac'oj sbae. Ja'uc ti buch'u laj sta ti svocole, tsots sc'oplal ta xcom o ti c'u sjalile, ja' to ti mi c'ot ta pasel cham ti banquilal pale ti buch'u va'anbil lec xchi'uc ti yabtele.

²⁶ Yan ti mi loc' batel ta jteclum ti bu snac'oj sba une,

²⁷ mi loq'uem xa batel ti bu xva'vun taat yu'un yuts' yalal ti animae, ma'uc xa smulic mi laj smilique, yu'un sa'bil xa yu'un.

²⁸ Ti buch'u milvane, tsots sc'oplal nac'al ta xcom ta pojobbail jteclume ja' to ti mi c'ot ta pasel cham ti banquilal palee. Ts'acal to un, xu' ta sut batel ta slumal.

²⁹ “Ti va'i s'elan c'ot ta nopele, ti buyuc no'ox nacaloxuque, ja' c'ot ta jbel tsots albil ti bejel ta xcom ta stojol ti totil me'ile xchi'uc ti alab nich'nabe.

Ti jbel tsots albil sc'oplal ta sventa ti rexticoile xchi'uc sc'oplal ti pojel colele

³⁰ “Ja' no'ox chapal sc'oplal ta xich' milel jun jmilvanej mi yiloj ep rexticoetic ti c'usi c'ot ta pasele. Yu'un mu xu' chapal xa sc'oplal ta xich' milel mi c'ajomal no'ox jun rextico ta sva'an sba ta yalel ti c'usi c'ot ta pasele.

³¹ “Ta j'ech'el, mi ja'uc xu' ta xich' tsaquel taq'uin ta sventa spojel ti jmilvanej ti buch'u chapal sc'oplal xa ta xich' milele. Yu'un ti vinic taje, jbel sc'oplal ta xich' milel ono'ox.

³² “Ta j'ech'el, mi ja'uc xu' ta xich' aq'uel eil ta xich' tsaquel taq'uin yo' xu' ta sut batel ta slumal ti jun jmilvanej ti c'alal nac'al ta jun pojobbail jteclum ti bu albil sc'oplal c'alal mu to ta xc'ot ta pasel ta xcham ti banquilal palee.

³³ “Mu ta scojuc amilvanejalic xasoquesic ti muc' ta lum ti bu ta xanaquiique. Yu'un ti milbaile ta soques sc'oplal ti muc' ta lume. Mu'yuc xa yan pojobbail xu' ta xich' aq'uel, ja' xa no'ox xpoxil ta xc'ot o ti ta xich' milel ti buch'u milvane.

³⁴ “Mu xasoquesbeic sc'oplal ti banomil ti bu ta xanaquiique, ti bu ta xinaqui eque. Yu'un ti vu'un Ajvalilune nacalun xchi'uc ti israeletique.”