Números 34 - Bible in Tzotzil de Chamula

Ti bu c'alal ta xc'ot sts'ac ti muc' ta lume

¹ Ti Diose xi laj yalbe ti Moisés ti c'alal laj sc'opon talele:

² “Xi xcholet xavalbe ya'i ti israeletic jech c'u cha'al li'e: Yu'un ta xa xa'ochic ech'el ta muc' ta lum Canaane. Yu'un ja' ti muc' ta lum taje, ta xc'ot ta arextoic, ti xi s'elan ti ts'aquetic xc'ot yu'une:

³ “Ti ts'ac ti oy ta stuq'uil yolon ti yac'ol xocon sloq'ueb c'ac'ale, ja' sti'il ti sbajtical banomil yu'un ti Zine, xchi'uc yosilal ti Edome. Ta stuq'uil sloq'ueb c'ac'ale, ta xlic ti sts'aquil ta stuq'uil yolon ti yac'ol xocon sloq'ueb c'ac'al ti oy ta Sts'ijlajan Nabe.

⁴ Ta stam ech'el ta stuq'uil yolon ti yac'ol xocon sloq'ueb c'ac'ale. Ta x'ech' ta stselej vits yu'un Acrabim. Ta x'ech' batel ta Zin. Ta xc'ot xtoc c'alal to Cades-barnea. Va'i un, ta x'ech' ta Hasar-adar c'alal to Asmón ta xc'ot.

⁵ Ti ta Asmone, ta stam batel c'alal to ta biq'uit uc'um ti ja' sts'aquinoj sbaic xchi'uc ti Egiptoe. Ta xc'ot ta tsutsel ta muc' ta nab ti Mediterráneo sbie.

⁶ “Ti ts'ac ti oy ta stuq'uil ta smaleb c'ac'ale, ta xc'ot snup sba ta be xchi'uc ti muc' ta nab ti Mediterráneo sbie.

⁷ “Ti ts'ac ti oy ta stuq'uil ta yolon ti yolon xocon sloq'ueb c'ac'ale, ta xlic ta muc' ta nab ti Mediterráneo sbie, ta xc'ot c'alal to ta vits yu'un Hore.

⁸ Ti ta xlic batel ta vits yu'un ti Hore, ta xc'ot c'alal to ochebal yu'un ti Hamate. Ta x'ech' c'alal to ta Zedade.

⁹ Ti ts'ac ti oy ta yolon ti yolon xocon sloq'ueb c'ac'ale, ti ta xlic ech'el ta Zedade, ta x'ech' c'alal to ta Zifrón, ta xc'ot ta tsutsel ta Hazar-enán.

¹⁰ “Ti ts'ac ti oy ta stuq'uil ta smaleb c'ac'ale, ta xlic ech'el ta stuq'uil ti Hazar-enane, ta xc'ot c'alal to Sefam.

¹¹ Ta xlic ech'el ta Sefam, ta x'ech' ta Ribla ti oy ta sloq'ueb c'ac'al yu'un ti Aine. Ti bu taje, ta xjoybij yalel ti ts'ac ta stuq'uil sloq'ueb c'ac'ale, ta xc'ot ta nab yu'un ti Quinérete.

¹² Ta stam ech'el ta uc'um Jordán, ti ta xc'ot ta tsutsel ta Sts'ijlajan Nabe. “Ti ts'aquetic taje, ja' me sts'aquil ti yosilal ti alumalique.”

Ta xich' ch'aquel ti banomile

¹³ Ti Moisese xi xcholet laj stojobtas ta sbijubtasel ti israeletique: “Ti lum li'e, ja' ti ta xach'acbe abaic ta sventa ti c'u s'elan ta xc'ot ti yorail avu'unique, ti ta sventa smantal ti Dios ti ta xich'ic ch'acbel ti balunvoq'ue xchi'uc ti o'lol jvoc' nitiluletic ti mu'yuc to yich'ojique.

^14-15 Yu'un ti jvoc' snitilultac ti Rubén ti ayan talel yu'un ti stot sme'ique, ti snitilultac ti Gad ti ayan talel yu'un ti stot sme'ique, ti o'lol jvoc' ti ja' snitilultac ti Manasés ti ayan talel yu'un ti stot sme'ique, laj xa yich' ti xrextoic ti xi oy ta jot sti'il uc'um Jordán ta sloq'ueb c'ac'al ti oy ta yeloval Jericoe.”

¹⁶ Ti Diose xi laj yalbe ti Moisés ti c'alal laj sc'opon talele:

¹⁷ “Ti ta xc'ot ta jch'ac-banomil avu'unique, ja' ti pale Eleazare, xchi'uc ti Josuee, xnich'on ti Nune.

¹⁸ Ja' jech xtoc ta xava'anic jujunuc banquilaletic yu'un ti jujuvoc' nitiluletique yo' jech ta xich' xch'aquel ti banomile.

¹⁹ Ti viniquetic ti buch'utic ta xava'anic talele, xi s'elan jech c'u cha'al li'e: “Ta sventa snitilul ti Judae, ta xava'anic talel ti Calebe, xnich'on ti Jefone.

²⁰ “Ta sventa snitilul ti Simeone, ta xava'anic talel ti Samuele, xnich'on ti Amiude.

²¹ “Ta sventa snitilul ti Benjamine, ta xava'anic talel ti Elidade, xnich'on ti Quislone.

²² “Ta sventa snitilul ti Dane, ta xava'anic talel ti jpas-mantal Buquie, xnich'on ti Joglie.

²³ “Ta sventa snitilul xnich'nab ti Josee, ta xava'anic talel ti jpas-mantal Haniele, xnich'on ti Efode, ta sventa ti Manasese.

²⁴ Ta sventa ti Efraine, ta xava'anic talel ti banquilal jpas-mantal Kemuele, xnich'on ti Siftane.

²⁵ “Ta sventa snitilultac ti Zabulone, ta xava'anic talel ti banquilal jpas-mantal Elizafane, xnich'on ti Parnaque.

²⁶ “Ta sventa ti Isacare, ta xava'anic talel ti banquilal jpas-mantal Paltiele, xnich'on ti Azane.

²⁷ “Ta sventa ti Asere, ta xava'anic talel ti banquilal jpas-mantal Ahihude, xnich'on ti Selomie.

²⁸ “Ta sventa ti Neftalie, ta xava'anic talel ti banquilal jpas-mantal Pedaele, xnich'on ti Amiude.”

²⁹ Taje, ja'ic ti buch'utic c'ubanbatic yu'un Dios ta xch'aquel ti muc' ta lum Canaán ta stojol ti israeletique.