Números 32 - Bible in Tzotzil de Chamula

Snitilultac ti Rubene, ti Gade com nacliicuc ta sti'il uc'um Jordán ta yeloval sloq'ueb c'ac'al

¹ Snitilultac ti Rubene xchi'uc ti Gade ep ta jmec ti chon bolometic yu'unique. C'alal laj staic ta q'uelel ech'el ti slumal Jazere xchi'uc ti Galaade ti sc'oteb o ta yavil ts'unob vacaxe,

² jech o xal un, batic ta stojol ti Moisese, ta stojol ti pale Eleazare, xchi'uc ta stojol ti banquilaletic yu'un ti jteclume, ti xi laj yalbeique:

³ —Chiquintao ava'iic ti xi ta xcalcutique. Ti banomiletic ti ja' smacoj ti Atarote, ti Dibone, ti Jazere, ti Nimrae, ti Hesbone, ti Elalee, ti Sebame, ti Neboe, xchi'uc ti Beone,

⁴ ti c'ot ta pasel laj spoj ti Dios ta sventa ti lum Israele, ja' jun osil ti sc'oteb o ta yavil ts'unob vacaxetique, ti c'alal ja' jech oy cu'uncutic ti avajtuneluncutique.

⁵ Ja' yu'un un, mi lec ta xava'iique, ac'buncutic ti banomil taje yo' jech mu xatacuncutic jelavel ta jot uc'um Jordane.

⁶ Ja' no'ox un, xi tac'batic yu'un ti Moisese: —Ti xcaltic une ¿mi yu'un oy ta avo'ntonic ta xacom ava'iic li'e, c'alal ta xbatic ta ac'-leto ti avinquilelique?

⁷ ¿C'u cha'al ta xatsiq'uesbe yo'nton ti israeletic ti mu xavaq'uic jelavuc ech'el ta jteclum ti bu ac'bilic xa yu'un ti Diose?

⁸ Ti va'i s'elan ta xapasique, ja' ono'ox jech laj spasic ti atotic ame'ic ti c'alal laj jtac jelavel ta smucul xchajel ta sq'uelel ti banomil ti c'alal oyic to ox ta Cades-barneae.

⁹ Yu'un c'otic c'alal to ta uc'um Escol ti laj smucul xchajel ta sq'uelel scotol taje. Ts'acal to un, lic xchibajesbeic yo'nton ti israeletique yo' jech mu x'ochic batel ta banomil ti bu ac'bilic yu'un ti Diose.

¹⁰ Ilin ti Dios ti jech c'ac'al taje, ti xi laj yal ti laj sva'an sba ta rextico ti c'opoje:

¹¹ “Yu'un scotol ti querem viniquetic ti yich'ojic jtob jabile xchi'uc ti x'ech' xa ti c'alal loq'uic talel ta Egiptoe, mu x'ochic batel ta banomil ti caloj ta xcac'beic ti Abrahame, ti Isaaque, ti Jacobe, ta scoj ti yan ti sjol yo'ntonic ta jtojole.”

¹² Ja' no'ox ti Caleb xnich'on ti Jefone, ja' ti quenizitae, xchi'uc ti Josué xnich'on ti Nune, staoj yav jun sjol yo'ntonic ta stojol ti Diose.

¹³ Ti Diose soc sjol ta stojol ti israeletique. Yu'un cha'vinic (40) jabil xjoyetic yu'un ta sbajtical banomil ja' to ti c'uxi laj scotolic ti buch'utic laj soquesbeic yo'nton ti Dios ta scoj ti c'usitic chopol laj spasique.

¹⁴ Avi tana ec une, xnich'nab jsa'mulil totil me'il, ja' ta xachan ava'iic ti c'u s'elan laj spas ti atotique yo' ta xaliquesbeic sc'ac'al yo'nton ti Dios yan velta ti ta sta svocol yu'un ti israeletique.

¹⁵ Ti mi mu xac'an xats'acliic ti Diose, ta xc'ot ta pasel ti ta xjalij yu'un ti israeletic ta sbajtical banomile, yu'un ja' ta acojic, ti cajal ta xc'ot ta abaic ti ta xtub xlaj sc'oplal ti israeletique.

¹⁶ Va'i un, xi laj yalic ti c'alal nopajic ech'el ta sts'el ti Moisese: —Ti c'usi ta jc'ancutique, ja' no'ox sc'an ac'o yich' pasbel scorral ti jchijcutique, xchi'uc ti jvacaxcutique, xchi'uc slumal sbanomil ta sventa ti calab jnich'nabcutique.

¹⁷ Mi laj une, ta xlic jchapan jbacutic xchi'uc cabtejebcutic ta anil ti jba'beuncutic ech'el yu'un ti yan israeletique ja' to ti c'uxi ta x'ochic comel cu'uncutic ta yosilique. Mu'yuc ta xich'ic xi'el ti cantsilelcutique, ti calab jnich'nabcutique, ipaluc ti lec bajalic ta xcomic ti jteclumetique yo' jech mu'yuc c'usi xu' ta spasbatic yu'un ti jnaclejetic li'e.

¹⁸ Yu'un mu xisutcutic talel ta jnacutic ti mi mu'yuc to ta xu'ninic ta yich'el yosilic scotol ti israeletique.

¹⁹ Ta sventa ti ja' ta xc'ot ta cosilcutic ti banomil ti li' ta jot sti'il uc'um Jordán ti oy ta yeloval sloq'ueb c'ac'ale, mu xa ta jliquescutic c'op ta sc'anel yan banomil ti oy ta jot uc'um Jordane, mi ja'uc ti le' to x'ech' batele.

²⁰ Xi tac'batic xtoc yu'un ti Moisese: —Ti mi ta xc'ot ta pasel avu'un ti ac'opique, mi ta xachapan abaic xchi'uc ti avabtejebic ta yaq'uel ti leto ti c'u s'elan ta spasvan ta mantal stuc ti Diose,

²¹ mi acotolic achapanoj abaic ta x'ech' atuch'ic ti uc'um Jordane, ti ja' ta xach'unbeic ti c'u s'elan ta spasvan ta mantal ti Diose, ti ja' to ta xasutic talel mi laj xa ox snutsan loq'uel scotol ti yajcontratac ti Diose,

²² mi laj xa ox anet'ic comel ta stsalel ti jteclume, ja' yu'un unbi, xu' xa xasutic talel. Yu'un mu'yuc xa cajal ta xcom ta abaic ti c'usi sc'an pasbel ti Dios xchi'uc ti israeletique. Jech ti banomil li'e, ja' ta xc'ot ta avu'unic, yu'un lec laj yil ti Diose.

²³ Yan ti mi mu jechuc ta xapasic une, na'ic lec ti ta xata amulic ta stojol ti Diose, ti oy bu jun c'ac'al ta xavich'ic tsitsel ta scoj ti amulique.

²⁴ Meltsanic un cha'e ti naetic yu'un ti avalab anich'nabique, xchi'uc ti corraletic yu'un ti achijique. C'otuc me ta pasel avu'unic ti ac'opic une.

²⁵ Xi laj staq'uic snitilultac ti Gade xchi'uc ti Rubene: —Ti avajtuneltac li'e ta spasic ti va'i s'elan laj aval ti mantale.

²⁶ Ti cantsilelcutique, ti bic'tal ololetic cu'uncutique, xchi'uc ti jchon jbolomcutique, ti jvacaxcutique, ta xcomic scotol li' ta jteclum yu'un ti Galaade.

²⁷ Ja'uc ti avajtuneluncutique ta jchapancutic ti cabtejebcutique yo' jech ta xibatcutic ta ac'-leto ti pasbiluncutic ta mantal yu'un ti Dios jech c'u cha'al laj avalbuncutic ti mantale.

²⁸ Va'i un, ti Moisese xi s'elan xcholet lic sbijubtas ti pale Eleazare, ti Josuee, xchi'uc ti banquilaletic yu'un ti jujuchop snitilultac ti Israele:

²⁹ —Mi scotol ti viniquetic snitilultac ti Gade, xchi'uc ti Rubene, mi xchapanoj sbaic lec xchi'uc yabtejebic xchi'inojoxuc ta x'ech' atuch'ic ti uc'um Jordán ta yaq'uel leto ti cuch yu'unic ti pasbilic ta mantal yu'un ti Dios ja' to ti c'uxi laj avu'ninic ti muc' ta lume, va'i unbi, ta me xavac'beic yu'ninic ti c'u yepal yosil smacoj ti Galaade.

³⁰ Yan ti mi mu'yuc xchapanoj sbaic xchi'uc ti yabtejebic ta x'ech' xtuch'ique, ta xavac'beic yich' jutebuc ti avosilic ti ta xavich'ic ti ta muc' ta lum Canaane.

³¹ Xi s'elan laj staq'uic snitilultac ti Gade xchi'uc ti Rubene: —Ti c'u s'elan ta spasatic ta mantal yu'un Dios ti avajtuneltac li'e, ja' ta spasic.

³² Jchapanoj jbacutic xchi'uc cabtejebcutic ta xic'otcutic ta muc' ta lum Canaán ti pasbiluncutic ta mantal yu'un ti Diose. Ja' no'ox un, ja' ta jc'an ta xcosilincutic ti banomil ti oy ta sloq'ueb c'ac'al yu'un ti uc'um Jordane.

³³ Jech o xal un, ti jvoc' snitilultac ti Gade, ti Rubene, xchi'uc ti o'lol jvoc' ti ja' snitilultac ti Manasese, ac'batic yu'un Moisés ti yosiltac ti Sehón ti ajvalil to ox yu'un ti amorreoetique, yosiltac ti Og ti ajvalil to ox yu'un ti Basane, xchi'uc ti jteclumetic ti sventainojic to oxe, xchi'uc ti c'u yepal oy yu'une.

³⁴ Jech o xal snitilultac ti Gade lic xcha'meltsanic ta ach' ti jteclumetic yu'un ti Dibone, ti Atarote, ti Aroere,

³⁵ ti Atarot-sofane, ti Jazere, ti Jogbehae,

³⁶ ti Bet-nimrae, ti Bet-arane. Ma'uc no'ox taje, laj smaquic lec, xchi'uc laj spasbeic scorral ti xchijique.

³⁷ Ma'uc no'ox taje, yu'un snitilultac ti Rubene lic xcha'meltsanic ta ach' ti jteclumetic yu'un Hesbone, ti Elalee, ti Quiriataime,

³⁸ ti Neboe, ti Baal-meone, xchi'uc ti Sibmae. Oy bu laj sjeltabeic sbi jun chibuc ti jteclum ti bu laj xa xcha'meltsanic ta ach'e, ti laj yac'beic ta sbi stuquique.

³⁹ Ti snitilultac ti Maquire, xnich'on ti Manasese, laj yu'ninic ta spojel yosilal ti Galaade. Yu'un ja' c'otic ta yajval. Yu'un laj snutsic loq'uel ti amorreoetic ti ja' yajval lume.

⁴⁰ Va'i un ti Moisese ja' laj yac'be yich' Maquir yosilal ti Galaade, ti tey com naquiicuque.

⁴¹ Ti Jaire, snitilultac ti Manasese, laj yu'ninic ta spojel jun chibuc bic'tal jteclumetic ti oy ta yosil ti amorreoetique, ti laj yac'beic sbiin Havot-jaire.

⁴² Ti jvoc' yu'un ti Nobae laj yu'ninic ta spojel ti Kenate xchi'uc ti jteclumetic ti ventainbil to ox yu'une, ti laj yac'be sbiin Nova ti ja' sbi stuque.