Números 31 - Bible in Tzotzil de Chamula

Ta xch'ay stub sc'oplal ti madianitaetique

¹ Ti Diose xi laj yalbe ti Moisés ti c'alal laj sc'opon talele:

² “Va'ano aba yu'un ti israeletique. Pacbo ya'i ti madianitaetique. Mi laj taj une, ts'acal to un, ta xacham.”

³ Ti Moisese xi laj yalbe ti jteclume: —Chapano abaic xchi'uc avabtejebic jlomuc ta yaq'uel ti letoe. Batanic ta yac'bel ya'i ti madianitaetique, ti ch'aybil c'otuc sc'oplal avu'unic ta sventa ti Diose.

⁴ Ti jujuchop nitiluletique, ac'o sloq'ues batel jmiluc (1,000) ta vo' viniquetic ta yaq'uel ti letoe.

⁵ Ja' yu'un un, ti jujuchop yu'un ti nitiluletique laj st'ujic jmil (1,000) ta vo' viniquetic ti c'otic ta soldadoetique. Lajcha'mil (12,000) laj stsob sba ta scotol ti chapalic lec xchi'uc ti yabtejebic ta yaq'uel ti letoe.

⁶ Tacatic batel ta ac'-leto yu'un ti Moisese, ti chi'inbilic batel yu'un ti Fineese, xnich'on ti pale Eleazare. Yich'oj batel xtoc ti c'usitic ac'bil xa jelavel ta ventainele, xchi'uc ti oq'ues yac'obil ta na'el ti ac'-letoe.

⁷ Letovajic xchi'uc ti madianitaetique. Laj smilic scotol jech c'u cha'al albat mantal yu'un Dios ti Moisese.

⁸ Laj smilic ti Evie, ti Requeme, ti Zure, ti Hure, xchi'uc ti Rebae. Taje, ja'ic ti vo'ob ajvaliletic yu'un ti madianitaetic xcaltique. Laj smilic xtoc ti Balaame, xnich'on ti Beore.

⁹ Ti israeletique xchucojic batel ti madianita antsetique, xchi'uc ti yalabic ti biq'uitic toe. Laj spojbeic ech'el ti ep ta tos chon bolometic yu'unique, ti vacaxetique, xchi'uc ti c'usitic toyajtic stojole.

¹⁰ Ma'uc no'ox taje, yu'un laj xchic'beic comel ti muc' ta lume, ti bic'tal lume, mi jbejuc na com yu'unic.

¹¹ Scotol ti c'usi laj spojic batele, ja' ti jnaclejetic yu'un ti lume, ti chon bolometique,

¹² ta xac'beic ta yoc ta sc'ob ti Moisese xchi'uc ti pale Eleazare, xchi'uc ta stojol scotol ti lum Israel ti lamalic ta stenlej Moab ta sts'el uc'um Jordán ti oy ta yeloval Jericoe.

¹³ Ti Moisese, ti pale Eleazare, xchi'uc ti banquilaletic yu'un ti jteclume, loq'uic batel ti bu lamalic ta nacleje. Bat nupvanicuc talel ta be.

¹⁴ Ja'uc le' une, ti Moisese soc sjol ta stojol ti banquilaletic ti buch'utic oy ta sventaic mil ta vo'e, ti vo'vinic ta vo' ti soldadoetic ti c'alal laj xa talel yo'ntonic ta ac'-letoe,

¹⁵ ti xi laj yalbee: —¿C'u cha'al mu'yuc xamilic ti antsetique?

¹⁶ Le'e, yu'un ja' me ta scojic jech c'u ch'al ti oy sc'oplal ti Balaam ti laj stoy sbaic ti israeletic yu'un ta stojol ti Diose, ti laj snijan xchiman sbaic ta yich'el ta muc' ta xrioxinel ti Baal-peore. Jech o xal oy c'usi chopol c'ot ta pasel ti laj stsits steclumal ti Dios yu'une.

¹⁷ Ta jech no'ox yepal, milic ta ora no'ox scotol ti bic'tal queremetique, xchi'uc ti antsetic ti ma'uc xa tojol tsebe.

¹⁸ Ja'uc ti tojol tsebetique, mu xamilic, ch'an utic, cuxluc comuc avu'unic.

¹⁹ Scotol ti buch'utic milvanemic xae, ti buch'u laj stic' sbaic ta spiquel ti animae, comic vucub c'ac'al ta spat ti bu lamaloxuc ta nacleje. Ja'uc ti vo'oxuc xchi'uc ti jchuqueletique ta xapoc abaic ta mesel ta tusel ti c'alal ta xc'ot ti yoxibal c'ac'ale, xchi'uc ti c'alal xc'ot sc'ac'alil ti yucubal c'ac'ale.

²⁰ Tusic ta mesel xtoc ti c'u'iletique, xchi'uc scotol ti c'usitic meltsanbil ta nucule, ti meltsanbil ta tsotsil tentsune, ti meltsanbil ta te'etic xtoque.

²¹ Ti pale Eleazare xi laj yalbe ya'i scotol ti soldadoetic ti ayic ta ac'-letoe: —Ti mantaletic ti va'i s'elan taje, ja' ti xi s'elan albat comel ti Moisés yu'un ti Diose:

²² Yu'un scotol ti c'usitic meltsanbil ta oroe, ti ta platae, ti ta c'anal taq'uine, ti c'usiuc no'ox taq'uinale, ti spac'obil taq'uine, mi ja' ti plomoe,

²³ ti xcaltique, ja' scotol ti c'usiuc no'ox xcuch yu'un ti c'oq'ue, tsots sc'oplal ta xich' tiq'uel ochel ta c'oc' yo' ta stam stuq'uil, xchi'uc ta xich' poquel ta jtunel vo'. Ja'uc ti bu mu xcuch yu'un ti c'oq'ue, ja' no'ox ta xich' poquel ta jtunel vo'.

²⁴ Ta yucubal c'ac'al un, ta xachuc' lec ac'u'ic. Yu'un ja' to jech mesbil tusbil ta xac'otic. Ts'acal to un, xu' xa'ochic batel ti bu lamaloxuc ta nacleje.

Ta xich' ch'aquel ti c'usitic laj yich' tael talele

²⁵ Ti Diose xi laj yalbe ti Moisese:

²⁶ “Ta sventa ta scoltaot ti pale Eleazare, ti banquilaletic yu'unic ti jujuchop yu'un ti jteclume, lic chapo xchi'uc ti c'u yepal laj xchuquic talel ti jteclume, xchi'uc ti chon bolometic ti laj spojbeic talel ti madianitaetique.

²⁷ Pasic ta cha'ch'ac ti co'ol yepale. Tey pucbo ta stojol ti buch'utic ayic ta letovajele. Ti jch'ac xtoque, pucbo ta stojol ti c'u yepal oy ti lume.

²⁸ Ma'uc no'ox taje, yu'un xi s'elan sc'an xach'ac loq'uel ti ta xc'ot ta cu'un ec ti c'u yepal ta xich' ti soldadoetique: Jcot ta xaloq'ues ta jujun vo'ob ciento, jech c'u cha'al ti jchuqueletique, ti vacaxe, ti burroe, ti chije.

²⁹ Va'i un, ta xavac'be ta yoc ta sc'ob ti pale Eleazar ti jpatane.

³⁰ Ti jch'ac ti c'otem ta yu'unic ti israeletique, ta xaloq'ues jun ta jujun lajuneb yoxvinic, jech c'u cha'al ti jchuqueletique, ti vacaxetique, ti burroetique, ti chijetique, ti xcaltique, ja' sc'oplal scotol ti c'usiuc no'ox chon bolomale, ti ja' ta xavac'be yich' ti levitaetic ti sbainojic ti abtel ta Axibalnae.”

³¹ Ti Moisese xchi'uc ti Eleazare jech laj spasic jech c'u cha'al albat mantal yu'un Dios ti Moisese.

³² Ta scotol ti c'usitic laj spojbeic ti yajcontraique, ti ma'uc tsacbil ta venta ti c'usitic laj stamanic ti soldadoetique, ja' vaquib ciento xchi'uc vo'lajuneb xchanvinic ta mil (675,000) ta cot ti chijetique,

³³ lajcheb xchanvinic ta mil (72,000) ta cot ti vacaxetique,

³⁴ jun xchanvinic ta mil (61,000) ta cot ti burroetique,

³⁵ lajcheb xcha'vinic ta mil (32,000) ti tojol tsebetique.

³⁶ Ja' yu'un un, ti jch'ac ti laj staic ta ich'el ti soldadoetique, ja' vuclajuneb yuclajunvinic ta mil xchi'uc vo'ob ciento (337,500) ta cot ti chijetique.

³⁷ Ti laj sloq'uesic ti laj yaq'uic ta sventa smoton ti Dios yu'unique, ja' vaquib ciento xchi'uc vo'lajuneb xchanvinic (675) ta cot.

³⁸ Ti vaclajuneb xcha'vinic mil (36,000) ta cot ti vacax ti laj yich'ique, laj yaq'uic ta patan ta sventa ti Diose, chib xchanvinic (62) ta cot.

³⁹ Ti lajuneb xcha'vinic ta mil xchi'uc vo'ob ciento (30,500) ta cot ti burro ti laj yich'ique, laj yaq'uic ta matanal ta sventa Dios, ja' jun xchanvinic (61) ta cot.

⁴⁰ Ti vaclajunmil (16,000) tojol tsebetic ti laj yich'ique, laj yaq'uic ta matanal ta sventa ti Diose, ja' lajcheb xcha'vinic (32) ta vo'.

⁴¹ Ti matanal ti ja' xc'ot ta sventa ti Diose, ti Moisese laj yac'be jelavel ta stojol ti pale Eleazare, jech c'u cha'al albil ono'ox yu'un ti Diose.

⁴² Ti jch'ac xtoque ti ja' xa ta xc'ot ta yu'unic ti c'u to yepal oy ti israeletique, ti laj xch'ac loq'uel ti Moisese, ti ja' sc'oplal yu'unic ti soldadoetique,

⁴³ yu'un co'ol sba loc' ta chapel, yu'un xi s'elan jech c'u cha'al li'e: Ja' oxib ciento xchi'uc vuclajuneb xcha'vinic ta mil xchi'uc vo'ob ciento (337,500) ta cot ti chijetique,

⁴⁴ vaclajuneb xcha'vinic ta mil (36,000) ta cot ti vacaxe,

⁴⁵ lajuneb xcha'vinic ta mil xchi'uc vo'ob ciento (30,500) ta cot ti burroe,

⁴⁶ vaclajunmil (16,000) ti tojol tsebetique.

⁴⁷ Ti jch'ac taje, laj sloq'ues ti Moisese jun ta jujun lajuneb yoxvinic (50) jech c'u cha'al ti jchuqueletique, ti chon bolometique, ti laj yac'be yich'ic ti levitaetic ti ta x'abtejic ta Axibalna yu'un ti Diose, co'ol s'elan jech c'u cha'al yaloj ono'ox mantal ti Diose.

⁴⁸ Ja' yu'un un, ti banquilaletic ti buch'utic sbainojic ta lajuneb ciento (1,000) ta vo'e, ti vo'vinic (100) ta vo' ti soldadoetique, bat sc'oponic ti Moisese,

⁴⁹ ti xi bat yalbeique: “Ti avajtuneluncutique laj xa jchapcutic lec ti ts'acal vul cu'uncutic ti cajsoldadocutic ti c'u yepal jbainojcutic ta jujun tale.

⁵⁰ Yu'un li' quich'ojcutic talel scotol ti xi s'elan ti c'usitic pasbil ta oro ti laj staic talel ti jujune: ti xoj-c'obile, ti chuc-c'obile, ti yixtolal ni'-c'obile, ti staq'uinal chiquinale, ti c'usitic c'upil sba pasbile. Scotol taje, ta xcac'becutic ti Diose, ja' ta xc'ot ta jpatancutic ta sventa ti jpojobbailcutique.”

⁵¹ Ti Moisese xchi'uc ti Eleazare laj yich'beic scotol ti c'u s'elan meltsanbil ta oro ti yich'ojic talele.

⁵² Ti matanal oro ti laj yaq'uic ti jujun banquilaletic ti yich'ojic ta sventaic ti lajuneb ciento (1,000) ta vo' soldadoetique, xchi'uc ti buch'utic yich'ojic ta sventaic vo'vinic (100) ta vo' soldadoetique, ti yalal ta scotole, ech' ta chanib yo'lajunvinic (184) kilo.

⁵³ Yu'un ti jujun soldadoe yich'oj talel jujuti' ti c'usitic laj spojbeic talel ti scontraique.

⁵⁴ Ja' yu'un un, ti Moisese, ti Eleazare laj yich'ic ti oro ti ac'batic yu'un ti banquilaletique. Laj yich'ic batel ta Axibalna ti bu nupel ta bee yo' jech ta xvulesatic ta o'ntonal ti israeletic yu'un ti Diose.