Números 30 - Bible in Tzotzil de Chamula

Smantaliltac ta sventa ti oy c'usi albil sc'oplal ta xich' aq'uele

¹ Ti Moisese xi laj yalbe ya'i ti banquilaletic yu'un ti jujuvoc' snitilultac ti israeletique: “Ti Diose xi laj yalbun ti mantale:

² C'alal mi oy buch'u ta xal ti oy c'usi ta xac'bee, mi ja' ti oy bu ta sva'an sba ta j'ech'el ti xc'ot xc'opoj ta xale, tsots sc'oplal ti c'otuc ta pasel yu'un ti sc'ope, ti c'otuc ta pasel yu'un scotol ti c'u s'elan yac'oj ye yaloj ta spase.

³ “C'alal oy jun tsebal ants ti ventainbil to yu'un ti stote, ti ta xac' ti oy c'usi ta xac'be ti Diose, mi yan ti yaloj ti oy c'usi ta spase,

⁴ mi ts'ijil no'ox ta xcom ti stot ti c'alal ta xa'i ti oy c'usi yac'oj ye ta xaq'ue, mi yan ti c'usi yaloj ta spase, tsots sc'oplal c'otuc ta pasel yu'un ti c'usi yaloj ta spase.

⁵ Yan mi mu xac' ye ti stot ti c'alal laj ya'ie, mu'yuc xa stijel ta c'op ti ac'o yac' ti oy c'usi yaloj ta xaq'ue, mi yan ti c'usi yaloj ta spase. Yu'un mu xac' ye sti' ti stote, mi ja'uc ta sujat yu'un ti Dios ti ac'o spase.

⁶ “C'alal mi oy jun ants ti yaloj ti oy c'usi ta xac'be ti Diose, ti laj yanil-nop no'ox ti laj yac' ye ti oy c'usi ta spase, mi ts'acal to ti malij une,

⁷ mi ts'ijil no'ox ti smalal ti c'alal laj ya'ibe sc'oplale, ti mu'yuc chopol ta xa'ie, tsots sc'oplal ti ac'o c'otuc ta pasel yu'un ti c'usi yaloje, mi yac'oj ye ta spase.

⁸ Yan mi mu xac' ye sti' ti smalal c'alal laj ya'ibe sc'oplale, mu'yuc xa stijel ta c'op ti ac'o yaq'ue, mi yan ti yac'oj ye ta spas ti ta anil no'ox laj snope. Mu sujat yu'un ti Dios ti ac'o c'otuc ta pasel yu'une.

⁹ “Yan mi ja' jun me'unal ants, mi jun sutemal ants ti yac'oj ye ti oy c'usi ta xaq'ue, tsots sc'oplal c'otuc ta pasel yu'un scotol ti yac'oj ye ta spase.

¹⁰ “Mi ja' jun ants ti malijem xa ti laj yac' ye ti oy c'usi ta xaq'ue, ti ta sva'an xa sba ta rextico ti xc'ot xc'opoj ti c'alal nacal xa ta sna ti smalale,

¹¹ mi mu'yuc c'usi ta xal, mi ts'ijil no'ox ti smalal c'alal laj ya'i ti jech ta spase, tsots sc'oplal, c'otuc ta pasel yu'un ti c'usi yaloj ta xaq'ue, ti bu yan yac'oj ye ta spase.

¹² Yan mi ta spajesat yu'un smalal ti c'alal laj ya'ibe ti sc'oplale, mu'yuc xa stijel ta c'op ti ac'o yaq'ue, ja' ti pajesat yu'un ti smalale. Mi ja'uc ta sujat yu'un Dios ti ac'o spase.

¹³ “Ti c'usi yaloj ta spas ti yajnile ti oy sc'oplal ta xicta ti yote, ti malalile xu' ta xalbe sc'oplal mi ta xc'ot ta pasel yu'une, mi ta xch'aybe sc'oplal ti c'usi yaloj ti yajnile.

¹⁴ Mi ts'ijil no'oxe, mi mu'yuc c'usi ta xal ti vinic ti ech' xa ox chib oxibuc c'ac'ale, c'otuc ta pasel yu'un scotol ti oy c'usi yaloj ta xaq'ue, mi yan ti c'usi yac'oj ye ta spase.

¹⁵ Yan mi ta jech no'ox yepal ta xlic xch'aybe sc'oplal ti c'alal ya'binoj xae, va'i unbi, ja' xa tenel ta xc'ot ta sba ti mu'yuc xc'ot ta pasel yu'un ti c'usi yaloj ta spas ti yajnile.”

¹⁶ Taje, ja' mantaletic ti albat ti Moisés yu'un ti Diose ta sventa sc'oplal ti vinic xchi'uc ti yajnile, ta sventa sc'oplal ti totil xchi'uc ti yantsil nich'on ti c'alal stsebal toe, ti ta sventa sc'oplal ti ventainbil to yu'un ti stote.