Números 3 - Bible in Tzotzil de Chamula

Ti yabtelic ti tsots sc'oplal sc'an spasic ti levitaetique

¹ Ti yorail ti c'alal c'opoj ti Dios ta stojol ti Moisés ta vits Sinaie, ti snitilultac ti Aarone xchi'uc ti Moisese, xi s'elan oy jech c'u cha'al li'e:

² Ti xnich'nab ti Aarone, xi s'elan oye: ti Nadabe, ja' banquilal. Tal un ti Abiue, ti Eleazare, xchi'uc ti Itamare.

³ Ti xchanibalic taje laj yich'ic t'ujel ti ac'bat yabtelic yo' jech ta xtunic ta paleale.

⁴ C'u stu un, ti Nadabe xchi'uc ti Abiue chamic ta stojol ti Diose ta scoj ti c'alal oyic ta sbajtical banomil yu'un ti Sinaie, laj yaq'uic yan c'oc' ti ma'uc albil sc'oplale. Va'i un, ti stuquique mu'yuc xnich'najic. Ja' yu'un un, ti Eleazare xchi'uc ti Itamare laj sliques yabtelic ta paleal ti q'uelbilic yu'un ti Aarón ti ja' stotique.

⁵ Jech ti Diose xi laj yalbe ti Moisés ti c'alal laj sc'opon talele:

⁶ “Ic'o talel ti jvoc' snitilultac ti Levie, ti ac'o taluc sva'an sbaic ta stojol ti pale Aarone yo' jech ta xac' sbaic ta tunel yu'un.

⁷ C'oticuc ta jtunel ta stojol ti Aarone xchi'uc ta stojol ti jteclume, ta sventa ti c'usi sc'an pasel ta Axibalna ti bu nupel ta bee, xchi'uc ta sbainic ta spasel ti c'usi sc'an ta Axibalnae.

⁸ Ja' ta xchabiic xtoc ti c'usitic oy x'ayan ta Axibalna ti bu nupel ta bee. Ta xac' sbaic ta tunel ta stojol ti israeletic ta scotol ti c'usi sc'an pasel yu'un ti Axibalnae.

⁹ Bevbiluc loq'uel avu'un ti levitaetic xchi'uc ti snitilulic ta stojol ti israeletique yo' jech ta xac' sbaic ta tunel ta j'ech'el ta stojol ti Aarone.

¹⁰ Va'i un, ac'bo comel ta yoc ta sc'ob yabtel ta paleal ti Aarone xchi'uc ti xnich'nabe. Mi oy buch'u ta stic' sba ta abtel ta paleal ti c'alal ma'uque, chapal sc'oplal ta xich' milel.”

Ti levitaetique c'otemic ta yu'untac ti Diose

¹¹ Ti Diose xi laj yalbe ti Moisés ti c'alal laj sc'opon talele:

¹² “Ti ta stojol ti israeletique, ja' laj xa jt'uj loq'uel ti levitaetic ta sventa ti mu'yuc stijel ta c'op xchi'uc ti sba xnich'nabique, yu'un cu'untac ti stuquique.

¹³ Yu'un scotol ti ba ololetique, ja' cu'untac. Yu'un laj jva'an jba ta stojol sbanquilal nich'nabic xchi'uc sba yol xchon sbolomic ti israeletic ti c'alal laj cac' chamicuc sbanquilal nich'nabic ti egipcioetique. Jech o xal un, ja' cu'untac. Yu'un vu'unun ti Ajvalile.”

Ta xich' tsacbel sbiic ti levitaetique

¹⁴ Ti Diose xi laj yalbe ti Moisés ti c'alal laj sc'opon talel ta sbajtical banomil yu'un ti Sinaie:

¹⁵ “Paso junuc tsacob-biil yu'unic ti jvoc' ta jujuchop ti nitiluletic yu'un ti levitaetique. Tsacbo lec ta bejtsanbel sbiic scotol ti queremetic ti jun u yich'ojique xchi'uc ti x'ech' xa ta jun u yich'ojique.”

¹⁶ Ti Moisese laj spas ti tsacob-biile jech c'u cha'al albat mantal yu'un ti Diose.

¹⁷ Ti xnich'nab ti Levie, ja'ic ti Gersone, ti Coate, xchi'uc ti Merarie.

¹⁸ Ti jvoc' snitilultac ti Gersón ta sventa ti jujuchop totil me'il yu'une, ja' ayan talel yu'un ti Libnie xchi'uc ti Simeie.

¹⁹ Ti jvoc' snitilultac ti Coat ta sventa ti jujuchop totil me'il yu'une, ja' ayan talel yu'un ti Amrame, ti Izhare, ti Hebrone, xchi'uc ti Uziele.

²⁰ Ti jvoc' snitilultac ti Merari ta sventa ti jujuchop totil me'il yu'une, ja' ayan talel yu'un ti Mahlie xchi'uc ti Musie. Scotolic taje, ja' snitilultac ti Levi ta sventa ti jvoc' yu'un ti jujuchop totil me'il yu'une.

²¹ Ti jvoc' snitilultac ti Gersón ta sventa ti jujuchop totil me'il yu'une, ja' ayan talel yu'un ti Libnie xchi'uc ti Simeie.

²² Ta scotol ti queremetic ti laj yich' tsacbel ti sbiic ti yich'ojic jun ue, xchi'uc ti yich'ojic x'ech' ta jun ue, ja' loc' ta chapel vucub mil xchi'uc vo'ob ciento (7,500) ta vo'.

²³ Ti jayvoc' taje, svoloj sbaic ta naclej ta yeloval c'ac'al ti oy ta spat ti Axibalnae.

²⁴ Ti banquilal jvolvanej yu'un snitilultac ti Gersone, ja' ti Eliasafe, xnich'on ti Laele.

²⁵ Ti Axibalna ti bu nupel ta bee, ja' sbainojic ta sq'uelel ti c'usi oy yu'une, ti nuculetic ti ja' yaxibe, ti muc' ta poc' ti lich'il ta sti' ti Axibalnae.

²⁶ Ja' sbainojic xtoc ta sq'uelel ti poq'uetic ti lich'ajtic ta amaq'ue, ti poq'uetic ti lich'ajtic ta ochebal amac' ti smacoj ta joyob ti Axibalna ti bu oy ti altare, xchi'uc ti jujutos yaq'uiltaque.

²⁷ Ti jvoc' snitilultac ti Coat ta sventa ti jujuchop totil me'il yu'une, ja' ayan talel yu'un ti Amrame, ti Izhare, ti Hebrone, xchi'uc ti Uziele.

²⁸ Ti ta scotol ti queremetic ti laj yich' tsacbel sbiic ti yich'oj jun ue, xchi'uc ti x'ech' ta jun u yich'oje, ja' loc' ta chapel vaxacmil xchi'uc oxib ciento (8,300) ta vo'. Ti jvoq'uic taje, ja' sbainojic ta sq'uelel ti Axibalnae.

²⁹ Svoloj sbaic xtoc ta naclej ta yolon ti yac'ol xocon sloq'ueb c'ac'al yu'un ti Axibalnae.

³⁰ Ti banquilal yu'unic ti jvoc' nitiluletic taje, ja' ti Elizafane, xnich'on ti Uziele.

³¹ Ti jvoc' taje, ja' sbainojic ta xchabiel xcaxail ti tratee, ti mexae, ti co'ol s'elan spajleb cantilae, ti altaretique, ti c'usitic t'ujbil ti tsots sc'oplal ta xtun ta sventa ti c'usi ch'unbile, ti poq'uetique, xchi'uc scotol ti c'usitic jujutos stunele.

³² Ti banquilal yu'unic ti levitaetique, ja' ti Eleazare, xnich'on ti pale Aarone, ti ta sbain ta sq'uelel ti buch'utic sbainojic ta sq'uelel ti Axibalnae.

³³ Ti jvoc' snitilultac ti Merari ta sventa ti jujuchop ti totil me'il yu'une, ja' ayan talel yu'un ti Mahlie xchi'uc ti Musie.

³⁴ Ta scotol ti queremetic ti laj yich' bejanbel ta tsacbel ti sbiic ti xlic ta jun u svoq'uelique, xchi'uc ti x'ech' ta jun u svoq'uelique, ja' loc' ta chapel vaquib ciento ta mil xchi'uc lajunvinic (6,200) ta vo'.

³⁵ Ti banquilal yu'unique, ja' ti Zuriele, xnich'on ti Abihaile, ti svoloj sbaic ta naclej ta yeloval ti yolon xocon sloq'ueb c'ac'al yu'un ti ch'ulnae.

³⁶ Ja'uc snitilultac ti Merarie, ja' ta sbainic ta sq'uelel ti stenel-te'altac ti ch'ulnae xchi'uc scotol ti c'usitic ta xtune.

³⁷ Ja' ta sbainic ta sq'uelel xtoc ti oyetic ta sjoylej ti amaq'ue, ti spajlebtaque, ti spajob te'altaque, xchi'uc ti yaq'uiltaque.

³⁸ Ti ta yeloval sloq'ueb c'ac'al yu'un ti Axibalnae, ti ja' ta stuq'uil ti Axibalna ti bu nupel ta bee, ja' svol sbaic ta naclej ti Aarone, ti Moisese, xchi'uc xnich'nabtac ti Aarone, ti ja'ic sbainojic ta sq'uelel ti Bats'i Cuxul Ch'ul Cuarto ta sventa ti lum Israele. Mi oy buch'u ta x'abtej ta paleal ti c'alal ma'uc ac'bil yabtele, chapal sc'oplal ta xich' milel.

³⁹ C'alal laj sbejanbe ta vun sbitac levitaetic ti Moisés xchi'uc ti Aarone, jech laj spasic jech c'u cha'al i'albat mantal yu'un ti Diose. C'ot ta chapel ti loc' chib xcha'vinic ta mil (22,000) ti queremetic ti jun u svoq'uelique, xchi'uc ti x'ech' ta jun u svoq'uelique.

Ti banquilal nich'nabiletique ta xac' xq'uexolic

⁴⁰ Ti Diose xi laj yalbe ti Moisese: “Lic Tsacbo sbiic sbanquilal nich'nabic ti israeletique, ti jun u yich'oje xchi'uc ti x'ech' xa ta jun u yich'ojique, ti bejel t'unbo ti sbiique.

⁴¹ Mi laj taj une, bevbun loq'uel ti levitaetique, ti ja' ta xc'ot ta xq'uexol sbanquilal nich'nabtac ti israeletique. Yu'un vu'unun ti Ajvalile. Ja' no'ox jech xtoc, bevbun loq'uel xchon sbolomic ti levitaetique, ti ja' ta xc'ot ta xq'uexol sba yoltac xchon sbolomic ti israeletique.”

⁴² Ti Moisese laj sbejanbe ta vun sbitac sbanquilal xnich'nabtac ti israeletique jech c'u cha'al albil mantal yu'un ti Diose.

⁴³ Va'i un, scotol ti queremetic ti laj yich' bejanbel sbiic ti jun u yich'oje xchi'uc ti x'ech' ta jun u yich'ojique, ja' loc' ta chapel chib xcha'vinic ta mil xchi'uc oxlajuneb xchanlajunvinic (22,273) ta vo'.

⁴⁴ Ti Diose xi laj yalbe ti Moisés ti c'alal laj sc'opon talel xtoque:

⁴⁵ “Bevbun loq'uel ti levitaetique, ja' ta xc'ot ta xq'uexol sbanquilal nich'nabtac ti israeletique. Ti xchon sbolomic xtoc ti levitaetique, ta xc'ot ta xq'uexol xchon sbolomic ti israeletique. Ti levitaetique, ja' cu'untac. Yu'un vu'unun ti Ajvalile.

⁴⁶ Ja'uc ti sbanquilal xnich'nabtac ti israeletique, ja' bolemic ta j'ech'el, ja' mu sta xnich'nabtac ti levitaetique. Ja' yu'un un, yo' jech ta xich' pojel loq'uel ti oxlajuneb xchanlajunebal vinic (273) ta vo' ti sbanquilal xnich'nabic xchi'uc ti oy to yan xtoque,

⁴⁷ c'anbo vo'sep plata taq'uin ti jujunique, ja' ti c'u s'elan liquem yu'unic ta ch'ulna ti yich'oj buluchib gramo ti yalale.

⁴⁸ Ti taq'uin taje, ja' ac'bo yich' ti Aarone xchi'uc ti xnich'nabe, ti c'ot ta q'uexolil pacolil yu'unique.”

⁴⁹ Jech ti Moisese laj stsob ti taq'uin ta sventa q'uexolil pacolil yu'un sbanquilal xnich'nab ti israeletique, ti ja' x'ech' yepalique.

⁵⁰ Laj sta ta tsobel jmil xchi'uc vo'ob sbalunlajunvinic (1,365) ta sep plata taq'uin, co'ol jech c'u cha'al ti sbisobil yalal yu'unic ta ch'ulnae.

⁵¹ Laj taj une, ti taq'uine, ja' laj yac'be yich' ti Aarone xchi'uc ti xnich'nabe jech c'u cha'al albat ono'ox mantal yu'un ti Diose.