Números 26 - Bible in Tzotzil de Chamula

Ti ach' tsacob-biil yu'un ti israeletique

¹ C'alal ech' xa ox ti c'usitic chopol c'ot ta pasele, ti Diose xi laj yalbe ti Moisese xchi'uc ti Eleazar ti ja' xnich'on ti pale Aarone:

² “Liquesic ta stsaquel jun tsacob-biil ta jujuchop scotol ti israeletique, ti buch'utic yich'ojic jtob (20) jabile, xchi'uc ti x'ech' ta jtob (20) jabile, ti lec xa'iic ti ac'-letoe.”

³ Ta stenlej Moab ti ta sts'el uc'um Jordane, ti oy ta yeloval Jericoe, ti Moisese xchi'uc ti Eleazare laj yalbeic mantal ti israeletique

⁴ ti ac'o stsacbeic sbi scotol ti buch'utic yich'ojic jtob (20) jabile, xchi'uc ti buch'u x'ech' xa ta jtob jabile jech c'u cha'al albat mantal ti Moisés yu'un ti Diose. Ti israeletique xi s'elan ma' ti buch'utic loq'uic talel ta Egiptoe:

^5-6 Ta jujuchop snitilultac ti Rubén ti ja' sbanquilal nich'on ti Israel ti ayan talel yu'une, ja' ti buch'utic ayanic talel ta sventa ti Enoque, ti Falue, ti Hezrone, ti Carmie.

⁷ C'alal laj yich' tsacbel sbiic snitilultac ti Rubene, ja' loc' ta chapel oxib yoxvinic ta mil xchi'uc vucub ciento xchi'uc lajuneb xcha'vinic (43,730) ta vo' viniquetic.

⁸ Xnich'on ti Falue, ja' ti Eliabe.

⁹ Xnich'nab ti Eliabe, ja'ic ti Nemuele, ti Datane, xchi'uc ti Abirame. Ti Datane xchi'uc ti Abirame, ja'ic ti buch'utic jmoj yo'ntonic xchi'uc ti jvoc' jtojobtasvanej totiletic ti buch'utic jmoj yo'ntonic xchi'uc ti Coree, ti laj stoy sbaic ta stojolic ti Moisese xchi'uc ti Aarone, ti c'alal laj stoy sbaic ta stojol ti Diose.

¹⁰ Ja' no'ox un, jav ti banomile, bajic yalel ti xchibalique xchi'uc ti Coree. Yu'un scotol ti c'u yepal tsobolique cham ta c'oc', lajuneb yoxlajunvinic (250) ta vo' viniquetic. Ti jech taje, ja' c'ot ti tun ta sventa sbijubtaselic ti yane.

¹¹ Manchuc mi jech taj une, ja' no'ox un, ti xnich'nab ti Coree mu'yuc xchamic.

^12-13 Ti jujuchop snitilultac ti Simeón ti ayan talel yu'une, ja'ic ti buch'utic ayanic talel ta sventa ti Nemuele, ti Jamine, ti Jaquine, ti Zerae, ti Saule.

¹⁴ C'alal laj yich' tsacanbel ti sbiique, ja' loc' ta chapel chib xcha'vinic ta mil xchi'uc lajunvinic (22,200) ta vo' viniquetic.

^15-17 Ti jujuchop snitilultac ti Gad ti ayan talel yu'une, ja'ic ti buch'utic ayanic talel ta sventa Zefone, ti Haguie, ti Sunie, ti Oznie, ti Erie, ti Arode, ti Arelie.

¹⁸ C'alal laj yich' tsacanbel ti sbiique, ja' loc' ta chapel cha'vinic ta mil xchi'uc vo'ob ciento (40,500) ta vo' viniquetic.

¹⁹ Oy jlom xnich'nab ti Judae, ja'ic ti Ere, ti Onane, ti chamic ta jteclum Canaane.

²⁰ Ja' yu'un un, ti jujuchop snitilultac ti Judá ti ayan talel yu'une, ja'ic ti buch'utic ayanic talel ta sventa ti Selae, ti Farese, xchi'uc ti Zarae.

²¹ Ti jujuchop snitilultac ti Fares ti ayan talel yu'une, ja'ic ti buch'utic ayanic talel ta sventa ti Hezrone xchi'uc ti Hamule.

²² C'alal laj yich' tsacanbel sbiic ti snitilultac ti Judae, ja' loc' ta chapel vaclajuneb xchanvinic ta mil xchi'uc vo'ob ciento (76,500) ta vo' viniquetic.

^23-24 Ti jujuchop snitilultac ti Isacar ti ayan talel yu'une, ja'ic ti buch'utic ayanic talel ta sventa ti Tolae, ti Fúae, ti Jasube, xchi'uc ti Simrone.

²⁵ C'alal laj yich' tsacanbel sbiic ti snitilultac ti Isacare, ja' loc' ta chapel chanib xchanvinic ta mil xchi'uc vo'lajunvinic (64,300) ta vo' viniquetic.

²⁶ Ti jujuchop snitilultac ti Zabulón ti ayan talel yu'une, ja'ic ti buch'utic ayanic talel ta sventa ti Sérede, ti Elone, xchi'uc ti Jahleele.

²⁷ C'alal laj yich' tsacanbel sbiic snitilultac ti Zabulone, ja' loc' ta chapel oxvinic ta mil xchi'uc vo'ob ciento (60,500) ta vo' viniquetic.

²⁸ Ti jujuchop snitilultac ti José ti ayan talel yu'une, ja'ic ti buch'utic ayanic talel ta sventa ti Manasese, xchi'uc ti Efraine.

²⁹ Ti jujuchop snitilultac ti Manasés ti ayan talel yu'une, ja'ic ti buch'utic ayanic talel ta sventa ti Maquire. Ti jujuchop snitilultac ti Maquir ti ayan talel yu'une, ja'ic ti buch'utic ayan talel ta sventa ti Galaade.

^30-32 Ta jujuchop snitilultac ti Galaad ti ayan talel yu'une, ja'ic ti buch'utic ayanic talel ta sventa ti Jezere, ti Heleque, ti Asriele, ti Siqueme, ti Semidae, xchi'uc ti Hefere.

³³ Ti Zelofehad xnich'on ti Hefere, mu'yuc laj yil squeremtac. Ja' no'ox laj yil stsebtac ti xi s'elan ti sbiique: ti Mahlae, ti Noae, ti Hoglae, ti Milcae, xchi'uc ti Tirsae.

³⁴ C'alal laj yich' tsacanbel sbiic snitilultac ti Manasese, ja' loc' ta chapel lajcheb yoxvinic ta mil xchi'uc vucub ciento (52,700) ta vo' viniquetic.

³⁵ Ti jujuchop snitilultac ti Efraín ti ayan talel yu'une, ja'ic ti buch'utic ayanic talel ta sventa ti Sutelae, ti Bequere, ti Tahane.

³⁶ Ti snitilultac ti Sutela ti ayan talel yu'une, ja'ic ti buch'utic ayanic talel ta sventa ti Erane.

³⁷ C'alal laj yich' tsacanbel sbiic snitilultac ti Efraine, ja' loc' ta chapel lajcheb xcha'vinic ta mil xchi'uc vo'ob ciento (32,500) ta vo' viniquetic. Taje, ja' snitilultac ti José ta sventa ti jujuvoq'ue.

^38-39 Ti jujuchop snitilultac ti Benjamín ti ayan talel yu'une, ja'ic ti buch'utic ayanic talel ta sventa ti Belae, ti Asbele, ti Ahirame, ti Sufame, ti Hufame.

⁴⁰ Ti jujuchop snitilultac ti Bela ti ayan talel yu'une, ja'ic ti buch'utic ayanic talel ta sventa ti Arde, ti Naamane. Taje, ja'ic xnich'nab ti Belae.

⁴¹ C'alal laj yich' tsacbel sbiic snitilultac ti Benjamine, ja' loc' ta chapel vo'ob yoxvinic ta mil xchi'uc vaquib ciento (45,600) ta vo' viniquetic.

⁴² Ti snitilultac ti Dan ti ayan talel yu'une, ja' ti buch'utic ayanic talel ta sventa ti Suhame.

⁴³ C'alal laj yich' tsacanbel sbiic snitilultac ti Suhame, ja' loc' ta chapel chanib xchanvinic ta mil xchi'uc chanib ciento (64,400) ta vo' viniquetic.

⁴⁴ Ti jujuchop snitilultac ti Aser ti ayan talel yu'une, ja'ic ti buch'utic ayanic talel ta sventa ti Imnae, ti Isvie, xchi'uc ti Beriae.

⁴⁵ Ti jujuchop snitilultac ti Bería ti ayan talel yu'une, ja'ic ti buch'utic ayanic talel ta sventa ti Hebere xchi'uc ti Malquiele.

⁴⁶ Ti Asere laj yil jun yantsil nich'on ti laj yac'be sbi Sérae.

⁴⁷ C'alal laj yich' tsacanbel sbiic snitilultac ti Asere, ja' loc' ta chapel oxlajuneb yoxvinic ta mil xchi'uc chanib ciento (53,400) ta vo' viniquetic.

^48-49 Ti jujuchop snitilultac ti Neftali ti ayan talel yu'une, ja'ic ti buch'utic ayanic talel ta sventa ti Jahseele, ti Gunie, ti Jezere, ti Sileme.

⁵⁰ C'alal laj yich' tsacanbel sbiic snitilultac ti Neftalie, ja' loc' ta chapel vo'ob yoxvinic ta mil xchi'uc chanib ciento (45,400) ta vo' viniquetic.

⁵¹ Ti loc' ta chapel ti c'u yepal ti israeletique, ja' jun yucubal ciento ta mil xchi'uc lajuneb xchanvinic sc'an ta vaxaquib ciento (601,730) ta vo' ti ta scotol ti viniquetique.

Smantalil ti c'u s'elan ta xich' ch'aquel ti banomile

⁵² Ti Diose xi laj yalbe ti Moisés ti c'alal laj sc'opon talele:

⁵³ “Ti va'i yepal ta scotol ti viniquetic taje, ja' me ta xich'ic sparte osilic ti buch'utic laj yich' tsacanbel ti sbiique.

⁵⁴ Ti bu vololic ta jujuchope, ja' ep ta xich'ic. Yan ti bu mu epicuc ta jujuchope, ja' mu sta ta xich'ic. Yu'un ti c'u yepal tsacal sbiic ta jujuchope, ja' jech yepal ta xich' ti sbanomilique.

⁵⁵ Ti c'alal ta xch'acluj ti banomile, ja' ti c'u s'elan ta xc'ot ti yorail yu'unique. Ti jujunique ta xich' sparteic ti bu c'ot sparte ti stotic ta jujuchope.

⁵⁶ Ti ta xich'ic ti sparte osilique, ja' ti c'u s'elan c'ot yorail yu'unic ta jujuchop ti buch'u epique, xchi'uc bu mu epicuque.”

Ta xich' tsacbel sbiic ti levitaetique

⁵⁷ Ti jujuchop snitilultac ti Levi ti ayan talel yu'un ti laj yich'ic tsacanbel ti sbiique, ja'ic ti buch'utic ayan talel ta sventa ti Gersone, ti Coate, xchi'uc ti Merarie.

⁵⁸ Ti libnitaetique, ti hebronitaetique, ti mahlitaetique, ti musitaetique, xchi'uc ti coreítaetique, ja' snitilultac ti Levie. Ti Amrame, ja' xnich'on ti Coate.

⁵⁹ Ti Amrame laj yic'be yantsil nich'on ti Levi ti Jocabed sbie, ti ja' o voc' c'alal oyic to ox ta Egipto ti Levie. Ti Aarone, ti Moisese, xchi'uc ti Mariae, ja' stot sme'ic ti Amrame, ti Jocabede.

⁶⁰ Ti xnich'nabtac ti Aarone, ja'ic ti Nadabe, ti Abiue, ti Eleazare, xchi'uc ti Itamare.

⁶¹ Ja' no'ox un, ti Nadabe xchi'uc ti Abiue chamic ti c'alal laj yaq'uic c'oc' ta stojol ti Dios ti ma'uc albil sc'oplale.

⁶² Ta scotol squerem nich'nab snitilultac ti Levie, ja' loc' ta chapel oxib xcha'vinic ta mil (23,000) ti yich'oj jun ue, xchi'uc ti x'ech' xae. Ti va'i yepalic taje, mu'yuc stsacbat sbiic jech c'u cha'al ti yan israeletique, ja' ti mu'yuc sc'oplal ta x'ac'bat ti xrexto osilique.

⁶³ Taje, ja' jech yepal loc' ta chapel sbiic ti israeletic ti c'alal laj stsaquic biil ti Moisese xchi'uc ti pale Eleazare, ti ic'ot ta pasel ta stenlejal yu'un Moab ti oy ta nopol uc'um Jordane, ti ta yeloval Jericoe.

⁶⁴ Ta scotol taje, mu xa junuc oy ti capalic xchi'uc ti c'alal laj to ox yich' tsacbel sbiic yu'un ti Moisese, ti Aarone, ti ta sbajtical banomil yu'un ti Sinaie.

⁶⁵ Yu'un albatic ono'ox yu'un Dios ti ta xchamic ta sbajtical banomile. Ja' no'ox cuxul ta xcom ti Caleb xnich'on ti Jefonee, xchi'uc ti Josue xnich'on ti Nune. Ja'uc ti yantique, mu junuc com.