Números 24 - Bible in Tzotzil de Chamula

¹ Ti c'alal laj yil ti Balaam ti lec ta xa'i ti Dios ti ta sva'an sba ta stojol ti Israele, mi ja'uc xa bat yich'be talel ye ti Ajvalil jech c'u cha'al laj spasolan talele. Yu'un c'ajomal no'ox laj sq'uel batel ti sbajtical banomile.

² Ti c'alal laj yil ti Balaam ti lamalic ta jujuvoc' ti Israele, tal uninatuc yu'un xcuxlejal ti Diose.

³ Va'i un, ti Balaame xi s'elan xcholet lic scaj'ale: “Ta xal slo'il ya'yej ti Balaam xnich'on ti Beore, ti lec tsots ts'ililic sat ta xq'uelvane.

⁴ C'alal ta xbat ti xch'ulele, x'ech' to xvinaj ti c'usi ta sta ta q'uelel talele, ep ti c'usi ta x'ac'bat sna'e, oy c'usi jchop o ta x'ac'bat yil ta sventa ti Dios ti scotol xu' yu'une.

⁵ Toj jun no'ox yutsiquil ti axibalnaetic avu'une, Jacob. Ti bu lamalote, Israel, toj jun yutsil ta j'ech'el.

⁶ Yu'un co'ol s'elan xan ti jilil ta q'uelel xbate, yu'un co'ol s'elan jun yavil nichim ti oy ta ti' uc'ume, yu'un co'ol s'elan smomolal poxil ti ts'unbil yu'un ti Diose, yu'un co'ol s'elan junuc ch'ut te' ti teq'uel ta ti' vo'e.

⁷ Mu no'ox albajuc yepal vo' oy yu'un ti Israele yo' ta xuch'ic xchi'uc ta smaltaic ti sts'unubique. Ti Dios yu'unique ta stsal ti Agage, ti mu no'ox albajuc yepal ti ta svol ta maquele.

⁸ Yu'un ti Dios ti laj sloq'ues talel ta Egiptoe, ja' c'otem ta jpojvanej yu'unic ta xa'iic jech c'u cha'al ta spoj sba xchi'uc xulub ti te'tical vacaxe, ja' ti bufalo sbie. Yu'un ti israeletique ta stsalic ti muc'tiquil lum ti ja' scontraique, ta sc'asbeic ti sbaquile, ta syayijesic ta syolobic xtoc.

⁹ Yu'un xi s'elan ti c'alal xach'al ta xcuxique, co'ol to s'elan junuc jti'oval león yilel: mu'yuc buch'u uni xit'an no'ox xa'i sba ta xnopaj ta stijbel ti svayele. C'uxubinbiluc ec ti buch'u ta xc'uxubinote. Bisatuc ta cotol chaval ya'i ti buch'u ta sbisot ta cotol chavale.”

Slo'il ya'yej ti Balaam ta scaj'alolane

¹⁰ C'alal jech laj ya'i ti Balac ti va'i s'elan taje, ep soc sjol ta j'ech'el. Xt'axolan xa ta majel liquel sc'ob ti xi laj yalbee: —Laj quic'ot talel li'e yo' jech ta xac'anbe slajel stubel ti jcontrae. Yu'un avi tana le' une, yoxibal xa velta ti laj ac'anbe ti slequilal yutsilale.

¹¹ ¡Ta lec no'ox loc'an batel li'e, sutan ech'el ta ana! Laj ox cal jc'op ti mu albajuc ta xcac'ot ta ich'el ta muq'ue, yu'un ja' laj smac ta be ti Diose.

¹² Ti Balaame xi laj stac'bee: —Yu'un laj ono'ox calbeic ya'iic ti j'al-mantal j'ich'-c'opetic avu'une,

¹³ yu'un ac'o mi ta xiyac'bun ti noj ta oro ta plata sbejel ti na yu'une, mu xu' jtselbun comel smantal ti Diose, mi ja'uc ta spasel ti c'usi leque, mi ja'uc ta spasel ti c'usi chopole, ti ja' no'ox ta xcal ti c'u s'elan ta xac' ta na'el ti Diose.

¹⁴ Ta xca'ibe xchiquinal, ta xisut ech'el ta jlumal. C'alal mu to ta xiloc' batel li'e, ta xcalbot ava'i sc'oplal ti c'usi ta spas ti jteclum le'e xchi'uc ti ateclumal le' ech'ele.

¹⁵ Va'i un, ti Balaame xi lic scaj'al ti c'usi ta xc'ot ta pasele: “Slo'il ya'yej ti Balaame, xnich'on ti Beore, ti ja' jun vinic ti tsots lec ts'ililic ti sat ta xq'uelvane.

¹⁶ C'alal ta xbat ti xch'ulele, x'ech' to ta xvinaj ti c'usi ta sta ta q'uelel talele, ta yojtiquinel ti c'usi xojtiquin ti Dios ti oy ta toyol cajale, ti oy c'usi ta x'ac'bat sna' ta yalel ti c'usi sna'e, ti oy c'usi jchop o ta xil ta sventa ti Dios ti scotol xu' yu'une.

¹⁷ Ta xquil ti oy c'usi ta xc'ot ta pasel le' to ech'ele, ti nom to xvayet ta q'uelel ti xi s'elan ta xc'ot ta pasele: Yu'un co'ol s'elan jbej c'anal ta xloc' talel ta stojol ti Jacobe, ti ta xc'ot ta ajvalil yu'un ti Israele. Ta xpech'be ta teq'uel sjol ti Moabe; ta xpech' ta teq'uel scotol snitilultac ti Sete.

¹⁸ Ta stsal ti Edome, ta xu'nin xtoc ti Seir ti ja' yajcontrae. Yu'un muc'tic no'ox ta j'ech'el ti c'usitic ta xc'ot ta pasel yu'un ti Israele.

¹⁹ Yu'un ta stojol ti Jacobe, ta xloc' talel jun jtsalvanej ti ta j'ech'el ta stubbe sc'oplal ti buch'utic ta xcomic ta jteclume.”

²⁰ Ts'acal to un, ti Balaame laj yil ti Amaleque, ti xi laj scaj'albe ti sc'oplale: “Ti Amaleque ja' jun jteclum ti tsots sc'oplale, ja' no'ox un, ta sta sc'ac'alil ti ts'ij xi ti sc'oplal ta j'ech'ele.”

²¹ Ja' jech xtoc laj yil ti quenitaetique, ti xi laj scaj-albe ti sc'oplalique: “Snitilultac Caín, manchuc mi lec meltsanbil ti anac'obbailique, manchuc mi avac'ojan ta tontic ti atase, ja' no'ox un, ta xlaj ta c'oc'.

²² Yu'un ti atas taje, ta xich' lilinel ta c'oc' ti c'alal chucbil ta xabatic yu'un ti asirioetique.”

²³ Ta slajeb xa un, xi laj scaj'al xtoc jech c'u cha'al li'e: “Mu xa ono'ox cha'beluc un, ¿mi oy to la buch'u ta xcuxi xana' c'alal ta xc'ot ta pasel yu'un Dios ti va'i s'elan taje?

²⁴ Yu'un ta Chipre, ta xvul ta loq'uel barcoetic ti ta x'ech' slilinic ti Asiriae xchi'uc ti Hebere. Yu'un ti Heber xtoque ts'ij xi sc'oplal ta j'ech'el.”

²⁵ Laj ti va'i s'elan taj une, jech ti Balaame laj stam batel sbe, sut ech'el ta sna. Jech ti Balac eque laj stam ech'el sbe.