Números 20 - Bible in Tzotzil de Chamula

Ti vo' loc' talel ta tone

¹ Ti sliquebal u yu'un ti jabile, ti israeletique c'otic ta sbajtical banomil yu'un Zin, comic c'uc sjaliluc ta Cades. Ti bu taje, cham ti Mariae. Laj yich' muquel ti bu taje.

² Ti jech ch'abal vo' yo' ta xuch'ic ti c'u yepal svoloj sbaic batele, xvoletic no'ox batel laj stsob sbaic yo' ta svulic ya'i ti Moisese xchi'uc ti Aarone.

³ Va'i un, xi laj yalbeic: —¿C'u xa ono'ox cha'al ti mu jmojuc capal lichamcutic xchi'uc ti israeletic ti c'alal chamesatic yu'un ti Diose?

⁴ ¿C'u xa ono'ox cha'al ti vo'oxuc laj aviq'uic talel ti xnich'nab Dios ti li' ta sbajtical banomile? ¿Mi yu'un oy ta o'ntonal avu'unic ta xichamcutic jmoj xchi'uc ti jchon jbolomcutique?

⁵ ¿C'u cha'al laj aloq'uesuncutic talel ta Egipto, ti laj avic'uncutic talel li' ta jun banomil ti toj chopol ta j'ech'ele? Yu'un ti li'e, mu'yuc c'usi stac' ts'unel ta j'ech'el, mi ja'uc ti icuxe, mi ja'uc ti uvae, mi ja'uc ti granadae. ¡Mi ja'uc oy vo' ta uch'el ta j'ech'el jset'uc!

⁶ Jech ti Moisese xchi'uc ti Aarone laj yictaic comel ti jteclume, batic ta ochebal sti' ti Axibalna ti bu nupel ta bee. Snupilanic xa banomil c'ot spatan sbaic ta lumtic ti bu taje. Va'i un, laj svinajes yutsilal slequilal ti Dios ta stojolique.

⁷ Jech ti Moisese, xi albat yu'un ti Diose:

⁸ —Tsaco ti vaxtone, ac'o stsob talel ta volel jnaclejetic ti achi'il ta voq'uel Aarón ta scoltaelote. Mi laj taj une, ta sba ta satic scotolic, albo mantal ti tone ti ac'o ac'baticuc talel ti vo'e. Ta xavil xtoc ti ta xloc' talel ti vo' ta tone yo' jech ta xuch'ic ti stuquique xchi'uc ti chon bolometic yu'unique.

⁹ Jech ti Moisese laj stam ti vaxton ti oy ta stojol ti Diose jech c'u cha'al albat mantal yu'une.

¹⁰ Va'i un, ti Moisese xchi'uc ti Aarone laj stsobic ech'el ti jteclum ta sts'el ti bu oy ti tone. Ti Moisese xi laj yalbe ti jteclume: —A'yio ava'iic lec li'e, toyobbaetic, ¿mi yu'un ta xavac'toicuc ti xu' ta xt'om talel vo' ti ta ton li'e yo' jech ta xcac'cutic avuch'ic?

¹¹ C'alal jech laj yal ti Moisés ti va'i s'elan taje, laj stoy ti sc'obe. Chib velta laj smaj ti ton xchi'uc ti svaxtone. Ta jech to yepal, toj ech'em no'ox xchipluj vulel ta t'omel talel ti vo'e. Jech ti jteclume xchi'uc ti chon bolometique yochelic ta yuch'el ta j'ech'el.

¹² Ja'uc ti Dios une xi laj yalbe ti Moisese xchi'uc ti Aarone: —Ti jech mu'yuc teq'uelun ta avo'ntonique, ti mi ja'uc jutebuc laj avaq'uicun ta ich'el ta muc' ta sba ta satic ti israeletique, mu xa'ochic batel xchi'uc ti lum li'e ti ta jteclum ti laj xa cac'beic yich'ique.

¹³ Ti taje, ja' sat vo' Meriba sbi. Yu'un ti israeletique, ja' ti bu laj stsaquic ta c'op ti Diose, xchi'uc laj yac' ta ilel ti slequilal yutsilale.

Ti ajvalil yu'un ti jteclum Edome mu xac' jelavuc ech'el ti israeletique

¹⁴ Ta Cades to, ti Moisese laj stac jelavel j'al-mantal j'ich'-c'opetic ta stojol ti ajvalil yu'un ti jteclum Edome, ti xi ta xalbeique: “Ti avinquileltac israeletique xi ta xalbot ava'i ti laj stac talel ti mantale: ‘Ti vo'ote xana' lec ti c'u s'elan laj quich' talel ti jvocolcutique.

¹⁵ Ti jmolmuc'totcutic ta vo'nee bat nacliicuc ta Egipto, ti bu jalijic ta nacleje. Ti egipcioetic xtoc une laj yilbajinuncutic jech c'u cha'al laj yilbajinic ti jmolmuc'totcutic ta vo'nee.

¹⁶ Va'i un, laj jc'anbecutic coltael yu'un ti Diose. Laj ya'i ti jc'opojel jti'inelcutique. Yu'un laj stac talel yaj'ánjel ti laj sloq'uesuncutic talel ta Egiptoe. Avi tana li' une, li' xa oyuncutic ta sbanomil Cades ti sts'aquinoj sbaic xchi'uc ti avosilale.

¹⁷ Ta xajc'anbecutic ti ta xavac' ave ati' ti jech ta xi'ech'cutic ta avosilale. Mi ja'uc ta xi'ech'cutic ta osil ti oy sts'unubale, ti yavil a'uvaique. Yu'un mi ja'uc ta x'ech' cuch'cutic ti ava'alic ti ts'anal ta joq'uetique. Tuc' ta xi'ech'cutic ta tuq'uil be. Mi ja'uc jutebuc jq'uej jbacutic ti mi mu to ta x'ech' jbascutic ti abanomile.’ ”

¹⁸ Ti ajvalil yu'un ti Edome xi laj stac' sutel ti c'ope: —¡Mu stac' xa'ech'ic ta jbanomil! Yan mi mu jechuque, ¡xu' xba jnupot ta be xchi'uc ti cajsoldadotaque!

¹⁹ Ti israeletique xi lic yalbeic lec ti smelole: —Tuc' ta jtamcutic ech'el ti muc' ta bee. Mi ja' ti vu'uncutique, mi ja' ti jchon jbolomcutic mi x'ech' yuch' ti ava'alic ti ts'anal ta joq'uetic avu'unique, ta jtojcutic. Yu'un ja' no'ox ta xajc'anbecutic ti ta xi'ech'cutic ta coccutic ta abanomile.

²⁰ Ja'uc ti ajvalil yu'un ti Edome xi laj stac' sutel ti c'ope: —¡Mi ja'uc stac' xa'ech'ic! Loc' batel ta snupel ta be xchi'uc yajsoldadotac ti chapalic lec xchi'uc yabtejebic ta stojol ti israeletique.

²¹ Yu'un ta j'ech'el sva'anoj sba ti mu xac' jelavuc ti israeletic ta yosile. Jech o xal ti israeletique laj sa'ic yan be bu ta x'ech'ic.

Ta xcham ti Aarone

²² Scotol ti jteclum Israele loq'uic ech'el ti ta Cadese, batic ta stuq'uil vits yu'un Hor.

²³ Ti bu sts'aquinoj sbanomilic xchi'uc ti Edome, xi albat yu'un Dios ti Moisés xchi'uc ti Aarone:

²⁴ “Ti Aarone ta xcham, mi ja'uc ta x'och batel ta jteclum ti bu caloj ti cac'ojbeic ti israeletique. Yu'un ti ta sti'il sat vo' Meribae, mu'yuc laj ach'unic ta spasel ti jmantaltaque.

²⁵ Ti vo'ote, Moisés, ic'o batel ta jol vits Hor ti Aarone xchi'uc ti Eleazar ti ja' xnich'one.

²⁶ Ti bu taje, xaloc'be sc'u' ti Aarón sventa paleale. Yu'un ja' ta xavac'be slap ti Eleazare. Yu'un ta xcham ti Aarón ti bu taje.”

²⁷ Ti Moisese jech laj spas jech c'u cha'al albat mantal yu'un ti Diose. Yu'un ta sba ta sat scotol ti israeletique muyic batel ti ta jol vits Hore.

²⁸ Ti bu taje, loc'bat sc'u' ta sventa paleal yu'un ti Moisese, yu'un ja' laj yac'be slap ti Eleazare. Ta jol vits no'ox, cham laj ti Aarone. Ja'uc ti Moisese xchi'uc ti Eleazare yalic talel ti ta jol vitse.

²⁹ C'alal laj yilic ti israeletic ti cham xa ti Aarone, lajuneb xcha'vinic (30) c'ac'al laj yoq'uitaic.