Números 15 - Bible in Tzotzil de Chamula

Ti jbel c'usi tsots albil ta sventa ti c'usi ta xich' svocol ta milele

¹ Ti Diose xi laj yalbe ti Moisés ti c'alal bat sc'opon talele:

² “Xi xcholet xavalbe ya'i ti israeletic jech c'u cha'al li'e: C'alal ta xa'ochic ta jteclum ti bu ta xcac'boxuc yo' ta xanaquiic teye,

³ xu' ta xac'beicun jcotuc tot vacax, mi ja' jcotuc chij ti ta xich' svocol ta chiq'uel sventa quich'el ta muq'ue, ti jun yutsil smuil ta xich' chiq'uele, mi ja' ic'ot ta pasel ti oy c'usi yaloj ta xaq'ue, mi ja' ti c'usi loq'uem ayanem ta o'ntonal ta xich' aq'uel ta matanale, mi ja' ta sventa ti ta xtun ta jujun q'uine.

⁴ Ti buch'u ta xac' ti matanale, ac'o yac'be ech'el xchi'il chibuc kilo t'ujbil harina ti vots'bil ta jun litro aceitee.

⁵ Ja' jech xtoc ti c'usi ta xich' svocol ti albil sc'oplale, ac'o to yac'be ech'el xchi'il junuc litro vino ti jujucot ch'iom chije.

⁶ Yan ti mi ja' jcot chij ti ta xich' svocole, ac'o yac'be ech'el xchi'il chanibuc kilo harina ti x'ech' ta jun litro aceite ti vots'bil xchi'uque,

⁷ xchi'uc x'ech' ta jun litro vino, ti ja' jun matanal ti jun yutsil smuil ta xquich'e.

⁸ Ti mi ja' jcot ch'iom tot vacax ta xich' svocol sventa ta xich' chiq'uele, mi ja' sventa ta xich' svocol yu'un ti lajesobil o'ntonale, mi ja' sventa ti yaloj ti c'usi ta xaq'ue,

⁹ ac'o yac'be talel sts'aqueb vaquibuc (6) kilo harina ti vots'bil ta chibuc (2) litro aceitee,

¹⁰ xchi'uc yan chib litro vino, ti ja' jun matanal ti jun yutsil smuil ta xquich' chic'bele.

¹¹ Taje, ja' jech tsots sc'oplal ta xich' pasel ti c'alal ta xich' aq'uel ti jujucot tot vacaxe, ti jujucot tot chije, ti jujucot ch'iom tot chije, ti jujucot ch'iom tot tentsun ti ta xich' aq'uel ta matanale.

¹² C'alal ta xich' aq'uel ti jujucot chon bolome, ta xich' ac'bel ti c'usi snup o xc'ot ta matanal xchi'uque, co'ol yepal ta xich' ti c'u yepal oy ti chon bolometique.

¹³ Scotol ti israeletique, ti c'alal ta xaq'uic ti chic'bil matanal ti jun smuil ta a'yiele, tsots sc'oplal ti ac'o xch'unic ti va'i s'elan ti smantalile.

¹⁴ “Mi j'ech'el-be jyanlum achi'uquic ta naclej ti ta xac' ya'i ec ti jun smuil chic'bil matanale, tsots sc'oplal ti ac'o xch'un ti smantalil jech c'u cha'al ta xapasic acotolique.

¹⁵ Yu'un jun no'ox smantalil ti tsots sc'oplal ta atojolique, xchi'uc ta stojol ti jyanlumetique, ti ja' j'ech'el ch'unbil ta xcom o ti jbel c'usi tsots albile ti ta x'ech' ta stojolic ti totil me'iletique xchi'uc ti alab nich'nabe.

¹⁶ Yu'un ti oy c'usi jbel tsots albile, xchi'uc ti mantale, jun no'ox oy ta atojolic xchi'uc ti jyanlumetique.”

¹⁷ Ti Diose xi laj yalbe ti Moisés ti c'alal laj sc'opon talele:

¹⁸ “Xi xcholet xavalbe ya'i ti israeletique: C'alal mi la'ochic ech'el ta jteclum ti bu ta xquic'oxuc batele,

¹⁹ c'alal ta xac'upinic xtoc ta sve'el ti trigo ti ta xloc' teye, ch'aquic jvoc'uc yo' ta xavac'beicun.

²⁰ Jech c'u cha'al ta xachic'beicun jopuc ti sba sat majbil trigoe, ja' jech ta xapasic xtoc ti sba svots'elal ti ninal harinae, meltsanbeicun ta jbejuc pan yo' ta xc'ot ta matanal.

²¹ Ti matanal taje, tsots sc'oplal ti mu xch'ay ta be avu'unic ta yaq'uele.

²² “C'alal mu yolobajuc laj apajes abaic ta spasel jtosuc mantal ti laj calbe ya'i ti Moisese,

²³ xi s'elan ti tsots sc'oplal ti ja' tey lic talel ti oy ta abaic ta yaq'uel xchi'uc ti anitilultaque:

²⁴ “Mi mu yolobajuc laj spas ti c'usi mu lecuc c'ot ta pasel yu'un scotol ti jteclume, ac'o yac'beicun jcotuc ch'iom tot vacax ti jun yutsil ta xich' chiq'uele, xchi'uc ti jujutos matanal yu'une, ja' ti sat ts'unubaltique, ti vinoe, jech c'u cha'al laj yal mantal ti Diose. Ja' jech xtoc, ac'o yac'beicun jcotuc tot tentsun ti ta xich' svocol ta scoj ti mulile.

²⁵ Ts'acal to un, ti palee ta sliques ti c'u s'elan ta pasele yo' ta xich' tael ti ch'aybil ta xc'ot smul scotol ti jteclum Israele. Jech ti vu'une ta jtubbe ti smulique, ja' ti mu yolobajuc laj spasic ti bu mu lecuc bat yu'unique. Yu'un laj yac'beicun ti matanale xchi'uc stojol ti mulile.

²⁶ Ta jch'aybe scotol smulic ti jteclum Israele xchi'uc ti jyanlumetic ti nacal ta atojolique. Yu'un mu yolobajuc laj spasic ti bu mu lecuc bat yu'un ti jteclume.

²⁷ “Mi ja' no'ox jun ti mu yolobajuc laj spas ti bu mu lecuc bat yu'une, ti buch'u taje, ta xac' jcotuc ch'iom me' tentsun ti yich'oj jun jabil ti ta xich' svocol ta scoj ti smule.

²⁸ Va'i un, ti palee ta sliques ti c'u s'elan ta pasele yo' jech ta xich' tael ti ch'aybil ta xc'ot smul ti buch'u ti mu yolobajuc laj spase. Jech ti vu'une ta jch'aybe ti smul scolo'e.

²⁹ Jun no'ox smantalil ta xtun ta stojol ti israeletique xchi'uc ti jyanlumetic ti nacal ta atojolique, ti mi mu yolobajuc laj spas ti bu mu lecuc bat yu'une.

³⁰ “Yan mi oy jun ti yolobaj laj sa' ti smule, mi ja' israel, mi ja' jyanlum, laj soquesbun ti co'ntone. Va'i un, ti buch'u taje, tenbil ta xloc' ta stojol ti xchi'iltaque.

³¹ Yu'un laj sbaj ti jc'ope, mu'yuc xc'ot ta pasel yu'un ti jmantaltaque. Laj sc'oplal ti oy to c'usi xu' ta stic' sba ta spasel jtosuque, ac'o xcuch ya'i ti smul scolo'e.”

Stojobil ti mu xich' ich'el ta muc' ti sc'ac'alil ti cuxob o'ntonale

³² C'alal oyic ta sbajtical banomil ti israeletique, oy jun vinic ti yacal ta sa' si' c'alal ja' o sc'ac'alil cuxob o'ntonale.

³³ Ti buch'utic tavanique, laj yiq'uic ech'el ta stojol ti Moisese, ti Aarone, xchi'uc ta stojol scotol ti jteclume.

³⁴ Ti mu'yuc to albil sc'oplal c'usi xu' ta xich' pasbele, mu jteq'ueluc yoc ta xaq'uic coluc batel.

³⁵ Jech o xal xi albat ti Moisés yu'un ti Diose: “Ti vinic le'e, chapal sc'oplal ti ja' xtun o ti ac'o yich' milele. Scotol ti israeletique, ac'o xchapan sc'obic ta spujbel ton ta loq'ueltic ti bu lamalic ta nacleje.”

³⁶ Va'i un, ti israeletique laj xjochic loq'uel ti bu lamalic ta nacleje, bat slilinic ta voch'el ta ton ja' to ti c'uxi chame jech c'u cha'al albat mantal ti Moisés yu'un ti Diose.

Ti stsacleb stsitsimaltac ti c'u'il ta sjoylej sti'ile

³⁷ Ti Diose xi laj yalbe ti Moisés ti c'alal laj sc'opon talele:

³⁸ “Xi xcholet xavalbe ya'i ti israeletic jech c'u cha'al li'e: Ti vo'oxuque xchi'uc ti anitilulique, tsots sc'oplal ta xanoch'anic sts'acleb stsitsimaltac sti'il ti c'u'ile. Ti sts'acleb stsitsimaltaque sc'an ti meltsanbil ta ic'losan tsajal noe.

³⁹ Va'i un, ti c'alal ta xavilic noch'ajtic ti sts'acleb stsitsimale, ta xavules ta ajolic scotol ti jmantaltac ti laj cac'boxuque, ti c'otuc ta pasel avu'unique, yo' jech mu staojuc yav ava'binoj abaic ti mu junuc avo'ntonic ta jtojole.

⁴⁰ Ti jech taje, ja' to jech ta xavules ta avo'ntonic scotol ti jmantaltaque. Ta xc'ot ta pasel avu'unic. Va'i un, jbel xa sc'oplal t'ujbil lac'otic cu'un ti vu'un Diosun avu'unique.

⁴¹ Vu'un ti Ajvalile, ti Diosun avu'unique, laj jloq'uesoxuc talel ta Egipto yo' jech ta xic'ot ta Dios avu'unic. Ti vu'une, Ajvalil Dios avu'unic.”