Números 12 - Bible in Tzotzil de Chamula

Ti Moisese ta xbaba-c'optaat yu'un ti Mariae xchi'uc ti Aarone

¹ Ti Mariae xchi'uc ti Aarone chopol ti c'usi ta xalolanic ta stojol ti Moisese, yu'un ti stuque laj yic' jun etiope ants.

² Ma'uc no'ox taje, yu'un xi laj yalique: “Yu'un ti Diose ma'uc no'ox ta sc'opon ti Moisese, yu'un ta xisc'oponotic ec” Ti va'i s'elan taje, laj ya'i ti Diose.

³ Ta melel ti Moisese, ja' stuc no'ox jun vinic ti peq'uel yac'oj sba ti li' ta banomile.

⁴ Jech o xal ti Moisese, ti Aarone, xchi'uc ti Mariae, xi albatic yu'un ti Diose: “Batanic avoxibalic ta Axibalna ti bu nupel ta bee.” Va'i un, batic yoxibalic.

⁵ Ja' yu'un un, yal talel ta jun pimil toc ti Diose. C'ot ta ochebal sti' ti Axibalnae. Ts'acal un, ic'atic batel ti Aarone, ti Mariae. Ti c'alal c'ot sva'an sbaique,

⁶ xi albatic yu'un ti Diose: “A'yio ava'iic ti xi ta xcalboxuque: C'alal oy jun j'alc'op ti vu'un ta jva'an ta atojolique, jchop o ti c'u s'elan ta xcac' jba iluc ta stojole, xchi'uc ta jc'opon ta xvaich.

⁷ Ja'uc ti cajtunel Moisese, mu jechuc ta jpas ta stojol. Yu'un ti stuque, c'ajomal no'ox jun ti tuc' sjol yo'nton ta scotol ti cajtuneltaque.

⁸ Yu'un ti stuque, quilojbe jba jsatcutic ti c'alal ta jc'opone. Jamal que jti'cutic. Ta xil ti jba jsate, ¿c'u cha'al ya'yel un cha'e ti chopol ta xac'opojic ta stojole?”

⁹ Ilin ep ti Dios ta stojolique, ti ta jech yepal bate.

¹⁰ C'alal tots batel ti toc ta Axibalnae, ti Mariae bolol liquel ta c'a'emal chamel ti sac lo'an xa liquel ti snuculil ta sjunule. C'alal joybij ti Aaróne, toj c'otel ta sat ti bolol xa ta c'a'emal chamel ti Mariae.

¹¹ Xi laj yalbe ti Moisese: “Avocoluc, jch'ul ajval, mu xatsitsuncutic yu'un ti jmulcutic ti ta jbolilcutic no'ox laj jsa'cutique.

¹² Mu xavac' ave ti jech ta xcom jech c'u cha'al junuc olol ti chamem xa ti c'alal mu to xvoc' talele, ti xlo'et xa snuculil ta xvul ta banomile.”

¹³ Va'i un, ti Moisese xi xvocolet laj yalbe ti Diose: “Avocoluc, Ch'ul Dios, ta jc'anbot ti abolajan ta xpoxtaele.”

¹⁴ Xi tac'bat talel yu'un ti Diose: “Ti mi ta scoj ti q'uexlal sba sat c'ot yu'un ti stote, vucub c'ac'al (7) nel satibil ta xcom. Ja' yu'un un, jipic loq'uel vucub (7) c'ac'al ti bu vololoxuque. Ts'acal to un, xu' ta sut talel.”

¹⁵ Ti Mariae vucub (7) c'ac'al sjalil ti tenbil loc' ti bu vololique. Jech o xal ti jteclume mu'yuc stotsic batel ti bu oyique.

¹⁶ C'alal sut xa talel ti María ta stojolique, laj stam loq'uel sbeic ti jech oyic ta Hazerote. C'ot slaman sbaic ta naclej ta sbajtical banomil yu'un Parán.