Nehemías 6 - Bible in Tzotzil de Chamula

Ta xpaybat yajval ti Nehemiase

¹ Ti Sanbalate, ti Tobiase, ti arabe Geseme, xchi'uc ti yan jcontracutique, c'alal laj ya'iic ti tsuts xa cu'un ta xcha'meltsanel ti moque, ti mu'yuc bu jamal laj jcomtsancutic jutebuque, (ac'o mi sc'an to ta jchotanbecutic ti sti'tac ta yaviltaque),

² ti Sanbalate, xchi'uc ti Geseme laj stacbuncutic talel mantal ti ac'o xba jtsob jbacutic ta junuc biq'uit jteclum ti oy ta stenlej yu'un Onoe. Ja'uc le' une, c'ajomal no'ox ta xil ya'i ti jvocole.

³ Va'i ti vu'un une, laj jtac batel j'al-mantal j'ich'-c'op ta yalbel ya'i ti oy bu tsots sc'oplal ta xch'ay co'nton ta abtele, ti mu xu' xibate, ti mu stsuts ti abtel mi ta jquechan comel yo' xbat jq'uele.

⁴ Chanib velta ti mu yanuc ti c'u s'elan ti smantal laj staun ta iq'uele, ti mu yanuc ti c'u s'elan laj jtac' sutel ti c'ope.

⁵ Va'i un, ta sventa jun yajtunel ti Sanbalate, ta yo'obal xa velta laj stacbun talel mantal ti ts'ibabil ta jlic vun ti mu'yuc bajale,

⁶ ti xi ta xal une: “Xpuquet lo'il yu'un ti jnaclejetique, xchi'uc ta xal ec ti Geseme, ti vo'ot xchi'uc ti judaetique, yacal xa la ta xavol avinictac ta contrainvaneje, ti jech o la xal yacaloxuc ta xacha'meltsanic ti moque. Ti jech xpuquet ti c'op taje, vo'ot la ta xa'och ava'i ta ajvalil yu'unic,

⁷ ti laj xa la ava'anan j'alc'opetic yo' ta xalic ac'oplal ta xa'och ta ajvalil ta Jerusalén ta yalel ti oy xa la ajvalil ta Judae. Ti xpuquet ti c'op taje, xu' ta xc'ot ta sni' ta xchiquin ti ajvalil Artajerjese. Lo'ilajcutic ca'tic yu'un taje.”

⁸ Va'i laj jtac sutel ti stac'obil ti ma'uc melel ti va'i s'elan xpuquet ti lo'ile, ti naca no'ox yesomal sjole.

⁹ Ti stuquique oy ta yo'nton ta xisibtasuncutic ti ta snopic ta xischibajesuncutic yo' jech quechel ta jcomtsancutic ti abtele. C'ajomal no'ox toyel laj ca'i ta yac'bel yipal ti abtele.

¹⁰ Ta ts'acal to un, libat ta sna ti Semaías xnich'on ti Delaiase, smom ti Mehetabele, ti sbajoj xa sba ta na ti xi laj yalbune: “Ba jtsob jbatic ta xch'ulna ti Dios ta yut ti ch'ul cuartoe. Ta jmacbetic lec ti sti'taque. Ti ac'ubal tanae, ta snopic ta xtal smilicot.”

¹¹ Ja'uc le' une, xichi laj jtac'bee: “Viniquetic jech c'u cha'al ti vu'une, mu xjatav batel xba stic' sba ta ch'ulna yo' jech ta spoj sba yo' mu xlaj. Mu xba jnac' jba ma' ti vu'un xcaltic une.”

¹² Ma'uc no'ox taje, laj quil ti ma'uc liquem talel ta stojol Dios ti c'u s'elan ta xale. Ti jech xal scotol taje, vinaj ti ta xispaybun ti cajvale, stsacoj xa smac ye yu'un ti Sanbalate, xchi'uc ti Tobiase.

¹³ Tojbil xa ta sibtaselun yo' jech ta jta jmul yu'un. Ja' to jech xu' ta soquesic ti jc'oplale, xchi'uc ta xvinaj batel ti laj xa jyanijes jbae.

¹⁴ ¡Xichie, Ch'ul Dios, mu teyuc no'ox aq'ueloj c'usi ta spas ti Sanbalate xchi'uc ti Tobiase! ¡Mu teyuc no'ox aq'ueloj xtoc ti Noadias ti me' j'alc'ope, xchi'uc ti yan j'alc'opetic ti oy ta yo'nton ta xisibtasicune!

¹⁵ Ta vo'ob xcha'vinic (25) yual ti Elule, tsutsem com ti moque, ti jalij lajcheb yoxvinic (52) c'ac'al ti abtele.

¹⁶ C'alal laj ya'iic ti cajcontracutique, xchi'uc scotol ti muc'tic lumetic ti joyol ta jpat ta jxoconcutique, lic xi'el yu'unic ta j'ech'el xchi'uc nom to c'ot ti cajal xa'i sbaique, laj sna'ic ti coltabiluncutic yu'un ti Dios cu'uncutic ti c'ot ta tsutsel ti abtele.

¹⁷ Ta yorail taj une, sjel sts'ac no'ox sba ts'ibabil vunetic yu'un ti Tobías xchi'uc ti buch'u ich'bil ye sti'ic ta Judae.

¹⁸ Ep buch'utic oy ta Judá sva'anoj sbaic ta yalel ti jun sjol yo'ntonic xchi'uc ti Tobiase ta sventa sni'inoj ti Secanías xnich'on ti Arae, ti squerem nich'on ti Johanán sbie, yu'un laj yic'be yantsil nich'on ti Mesulam xnich'on ti Berequiase.

¹⁹ Yaleluc no'ox yu'unic ta jtojol ti jun yutsil ti yabtel ta spase, xchi'uc naca yich'el batel yu'unic ti c'u s'elan ta xcale. Ti Tobías ec une, staqueluc no'ox batel ts'ibabil vun yo' ta xisibtasun.