Nehemías 5 - Bible in Tzotzil de Chamula

Lic c'op yu'unic

¹ Ti jech yorail taje, c'ot ta pasel ti liquic ta muc'ul voch voch c'op ti jteclum xchi'uc ti yajnilic ti ta svul sbaic ti co'ol svinquilel sbaic ta judaetique.

² Ti jlome ta xalic ti ep ti squerem stsebique ti vocol xa ta staic ta sa'el ti trigoe yo' jech mu xchamic ta vi'nal.

³ Ti yane ta xalic ti ta scoj ti mu xa staic ta stunel ta slajesele, laj xa yaq'uic ta rental ti yosilique, ti sbanomilal sts'unub uvaique, xchi'uc ti snaique.

⁴ Ti yane ta xalic ti xch'amunojic taq'uin yo' jech ta stojbeic patan ti ajvalile, ti scaj'ac'ojic xa ta rental ti yosilique, xchi'uc yavil ti sts'unub uvaique, ti xi to lic yalolanique:

⁵ “Ti vu'uncutique, xchi'uc ti jvinquilelcutique, mu yanuc ti jts'unubalcutique. Mu yanuc sts'unubal ti calab jnich'nabcutic xchi'uc ti yalab xnich'nabique. Manchuc mi jech un, ochem ta mosovil ti jquerem jtsebcutique. Ti c'ot xa ta pasel ti tiq'uil ta mosovil ti jtsebcutique, mu'yuc xa c'usi xu' stac' ta jpascutic yu'une, ti va'i xa yan yajval ti cosil jbanomilcutique, ti yavil cuvacutique.”

⁶ C'alal laj ca'i ti c'u s'elan ti svocolique, xchi'uc ti slo'il ya'yejique, ep chopol laj ca'i.

⁷ Lic jnop lec ta ts'acal to un, laj jvul ya'iic ti buch'utic ich'bil ye sti'ique, xchi'uc ti j'opisialetique ta scoj ti ta xilbeic svocol ti svinquilelique. Laj jvol ta tsobel scotolic ta xchapel ti c'op taje.

⁸ Xichi laj cale: “Bu xa c'alal xu' cu'uncutic ti vu'uncutique laj cac'becutic yipal ta spojel ti jvinquileltic judaetic ti chonbil batic ta stojol ti jyanlumetic ti yan yajvalique. ¿C'u cha'al ya'yel avi tana ta xachonvanic yo' yan velta sc'an ta jpojcutic loq'uele?” Ts'ijil comic, ti mu stac' a'yeluc ta xa'iic c'uxi ta staq'uique.

⁹ Xi laj jts'ac batel ti jlo'ile: “Mu lecuc ti c'usi ta xapasique. Tsots sc'oplal vinajuc ti nijil chimiloxuc ta stojol Dios cu'untic ma' ti jechuque yo' jech ta xmac yeic ta labanvanej ti cajcontra ti yan o ti c'usi ta xch'unique.

¹⁰ Ti cuts' calaltaque, ti jchi'iltac ta abtele, cac'ojbecutic xch'amunic ti taq'uine, ta xq'uexel ti trigoe, ¡ch'ab laj xi sc'oplal ti yilic taje!

¹¹ Ta jc'anboxuc vocol ti c'ac'al avi tana li'e, sutesbeic ti yosilique, ti yavil sts'unub uvaique, ti yavil sts'unub olivo yu'unique, xchi'uc ti snaique, ti tubuc sc'oplal ti yilic oy ta atojolique, mi ja' ti taq'uine, mi ja' ti sat ts'unubaletique, mi ja' ti vinoe, mi ja' ti aceitee.”

¹² Xi laj staq'uique: “Ta jsutesbecutic scotol. Mi jutebuc ta jsa'cutic c'op xchi'uc. Jech ta jpascutic scotol jech c'u cha'al laj avale.” Va'i un, laj jta ta iq'uel ti paleetique, ti yilicuc ta sba ta satic ti laj jsuj ta yalel ti c'otuc ta pasel yu'un ti sc'opique.

¹³ Ma'uc no'ox taje, laj jlilin ti jc'u' ti xichi laj cale: “Ja' jech lilinbatuc loq'uel yu'un Dios ti c'usi oy ta snae, ta yosile, scotol ti buch'u mu xc'ot ta pasel yu'un ti c'usi loc' ta yee, ti jechuc pojbatuc loq'uel ti c'usi oy yu'un avi tanae.” Xi laj yalic scotol ti jteclume: “Jechuc c'otuc ta pasel.” Laj slequil-c'optaic ti Diose. Ti jnaclejetic une c'ot ta pasel yu'unic ti c'usi laj yalique.

Slequilal yo'nton ti Nehemiase

¹⁴ Ta xlajchebal (12) xa jabil un, ti xcaltique, ti jtob (20) xa jabil laj quich' va'anel ta ajvalilal ta Judá yu'un ti ajvalil Artajerjese, ti ta xlajchebal xcha'vinic (32) jabil stic'lej ta ajvalile, mi ja'uc ti vu'une, mi ja'uc ti jchi'il ta abtele, ti laj jtunescutic jutebuc ti c'usi oy sc'oplal ta xquich' jtojol ti ochemun ta its'inal ajvalilune.

¹⁵ Ja'uc ti ajvaliletic laj ech'uc ta ba'yele, bainatic ta j'ech'el yu'un ti jteclume, ti ta sc'anic cha'vinic (40) ta sep plata taq'uin sventa ti sve'ele, ti svino ti jujun c'ac'ale. Ma'uc no'ox taje, ti xchi'iltac ta abtele laj yilbeic svocol ti jteclume. Mu jechuc laj jpas ti vu'une, ta sventa ti jna' jxi'ta ti Diose.

¹⁶ Ti yane, c'ot ta pasel cu'un ti c'u yepal jbainoj ta xcha'meltsanel smocal ti jteclume. Mu ja'uc laj quich' ta rental ti osiletique. Ja'uc ti cajtuneltaque, c'ajomal no'ox abtejic scotolic.

¹⁷ Xchotiic ta jmexa lajuneb xvaxacvinic (150) ta vo' viniquetic jech c'u cha'al ti judaetique, xchi'uc ti j'opsialetic yu'un ti jteclume. Mu'yuc tsacbil ta atel ti c'u yepal ta xtal svu'lanicun ta xliquic talel ta yan jteclum ti nopol xil sbaic xchi'uc ti jlumale.

¹⁸ Xi s'elan ma' ti c'otem ta jventa ta chapanel ti jujun c'ac'ale: jcot vacax, xchi'uc vac-cot (6) t'ujom chijetic, xchi'uc ve'lilal mutetic, ti yepal no'ox ti vino ta xc'ot ta jujun lajlajuneb c'ac'ale. Ac'o mi jech un, mu'yuc ma' ti cajal xa que jti' ta sc'anel ti c'usi oy sc'oplal ta xi'ac'bat ti ochemun ta its'inal ajvalile, ti yepal no'ox staoj svocol ti jteclume.

¹⁹ ¡Ich'bilucun c'otcun ta venta un, Ch'ul Dios, ta sventa slequilal ti jteclum ti oy c'usi laj jpas ta stojole!