Nehemías 4 - Bible in Tzotzil de Chamula

Ti jlabanvanej jcontrainvanejetique

¹ C'alal laj ya'i ti Sanbalat yacaluncutic ta xcha'meltsanel ti moque, lic pucujibuc, ti soquemal xa sjol ta j'ech'ele, ti xbet'bun liquel ye ta labanvanej ta stojol ti judaetique.

² Xi lic yalilan ta stojol ti xchi'iltac ta abtele, xchi'uc ta stojol ti soldadoetic yu'un ti Samariae: “¿C'u xa ya'yel ta xa'iic ti jlajel ta vi'nal judaetic le'e? ¿Mi yu'un xac'toicuc ch'an x'utatic ta yaq'uel ti milbil matanal yan veltae? ¿Mi xac'toicuc la ta stsuts yu'unic ta jun c'ac'al ti abtel le'e? ¿Mi yu'un xac'toicuc la ta ach' tonetic ta staic loq'uel ti busul slilijemal tonetic ti laj yich' chiq'uele?”

³ Ti ta sts'ele, va'al ec ti amonita Tobías ti xi laj sts'ac ti lo'ile: “Q'uelo avil ti xi s'elan stailej muyel yu'unic ti moque: ta xjin yalel ta lum yu'un jcot vet mi muy ech'el une.”

C'opoj ti'in ti Nehemiase

⁴ Va'i un, xichi lic c'opoj ti'incune: “Ti Diosot cu'uncutique, a'yio ava'i c'u s'elan ta xquich'cutic labanele. C'otuc ta pasel avu'un ti joybijuc ta sbaic ti c'u s'elan ta xna'levanique, ti ochicuc ta c'abal yu'un ti scontraique, ti chucbil baticuc yu'un ta yan muc'tiquil lumetique.

⁵ Mu xach'aybe ti c'usi chopol ta spasique. Mi ja'uc xach'ay ta aba ta asat ti smule. Laj xa sna'leic ti buch'utic liquemic ta abtel ta xcha'meltsanel ti moque.”

Ta sibtsavanic ti jcontrainvanejetique

⁶ Och yipal cu'uncutic ec un ta xcha'meltsanel ti moque, ti o'lol xa xloc' batel ti staileje. Jun no'ox yo'ntonic ta x'abtejic ti jnaclejetique.

⁷ Ja'uc le' une, c'alal laj ya'i ti Sanbalate, ti Tobiase, ti árabeetique, ti buch'u oyic ta Amone, ti ta Asdode, ep cap sjolic ta j'ech'el ti xyaquet no'ox ech'el scajtsaj muyel ti smocal ti Jerusalén ta xich' cha'meltsanele, xchi'uc ti laj yich' maquel ti bu jamajtique.

⁸ Jun sc'opic laj scomon-nop scotolic ti ta xbat stsaquic ta leto ti Jerusalene yo' jech ta soquesic comel.

⁹ Va'i un, lic'opoj liti'incutic ta stojol ti Dios cu'uncutique. Laj jva'ancutic jchabivanejetic c'ac'al ac'ubal yo' jech ta jpoj jbacutic.

¹⁰ Ti jnaclejetic yu'un ti Judá une xi laj yalique: “Ti spajebal xa busul ta j'ech'el slilijemal ti moque, ch'abal xa yipal yu'unic ti buch'utic ta xeanic loq'uele. Mi ja'uc xu' cu'uncutic ta xcha'meltsanel ti moc li'e.”

¹¹ Ti cajcontracutique laj snopic ti xac'toicuc ti ch'ayal co'ntoncutique, ti mu xvinaj ta xch'ic sba ochel ta jtojolcutic yo' ta xismiluncutic ti ta spajesel ti abtele.

¹² Ti judaetic ti nopol xil sbaic ta nacleje, ti talel yu'unic ta yalel ti c'op ti ta xtal svoliuncutic stsaqueluncutic ta jujujot ti jnaclejetic taje,

¹³ laj calbeic ya'i mantal ti jnaclejetique, ti svoluc sbaic ta pat moc ta jujuchope, ti chapalicuc xchi'uc yespadaique, ti slanzaique, ti syolobique, ti comicuc jlom ta olone, xchi'uc ti bu jamajtique.

¹⁴ C'alal laj quil ti ta xi'ique, lic jva'an jba ti xichi laj cal ta stojol ti buch'utic ich'bil ye sti'ique, ti j'opisialetique, xchi'uc c'u yepal ti jteclume: “Mu xaxi'ic yu'un. Vuleso ta ajolic ti xi'bal sba jelavem smuc'ul stsatsal ti Diose. Va'ano abaic ta spojel ti avinquilelique, ti aquerem atsebique, ti avantsilelique, ti anaique.”

¹⁵ C'alal laj ya'i ti cajcontracutic ti chapaluncutic leque, ti ch'aybatic ta be yu'un Dios ti c'usi snopojique, jcotolcutic lisutcutic ech'el ti bu oy ti moque. Ta jujun tal lic jtam ti cabtelcutique.

¹⁶ Ta yorail taj une, ti o'lol jvoc' jvinictaque ochic ta abtel. Ti o'lol jvoq'ue chapalic xchi'uc ti slanzaique, ti smacobbailique, ti syolobique, ti slapojic ti staq'uin c'u'ique. Sva'anoj sbaic ta xchabiel svinictac Judá ti banquilaletique,

¹⁷ ti yacalic ta abtel ta xcha'meltsanel ti moque. Ti buch'utic sbainoj ta yeanel batel ti c'usitic ta xtune, ta jun sc'ob yicoj batel ti yicatse, ta jun sc'ob stsacoj batel ti yabtejebe.

¹⁸ Scotolic ti ta x'abtejic ta stsutsesel ti abtele, xchuquinoj ti yespadaique, xchi'uc nabal ta xocon ti buch'u sbainoj ta yoq'uisanel ti oq'uese,

¹⁹ yu'un xi xa ono'ox calojbe ya'iic ti buch'utic ich'bil ye sti'ique, ti j'opisialetique, xchi'uc ti jlom jteclume: “Tsots ta j'ech'el, jamal ti abtel jmacojtique. Tan puc oyuncutic ta moc. Nomtic xquilan jbacutic ti jujuchope.

²⁰ Ja' yu'un un cha'e, mi oy bu ta xava'iic ta xich' oq'uisanel ti oq'uese, volo abaic talel ta jtojolcutic. Ta stic' sba ta letovajel ti Dios ta jtojoltique.”

²¹ Ti jech taj une, naca ta sacub ta xi'ochcutic ta abtele, ti yich'oj ta xmal ti c'ac'ale. Ti jvoc' jchi'ilcutique chapalic xchi'uc ti slanzaique.

²² Ti jech yorail taj une, laj calbeic ya'iic scotolic xchi'uc ti yajcoltaobbaique, ti tsotsuc sc'oplal ech'uc yu'unic ac'ubal ta yutil ti Jerusalene yo' jech ta xischabiuncutic ta ac'ubaltic xchi'uc ti abtejicuc ta c'ac'altique.

²³ Ma'uc no'ox taje, ti vu'une, ti cuts' calaltaque, ti cajcoltavaneje, ti jchabivanejetic ti oyic ta jtojole, mi ja'uc laj jloc' ti jc'u'cutique. Chapal ta jc'obcutic ti jlanzacutic ta jujune.