Nehemías 2 - Bible in Tzotzil de Chamula

Ti Artajerjese ta xac' ye sti' ti xu' ta xbat ta Jerusalén ti Nehemiase

¹ Ti jech taj une, jbainej bisun to ox yu'un ti ajvalil Artajerjese. Oy jun c'ac'al ti ta yual Nisan ti jtob xa jabil stic'lej ta ajvalilale, c'alal yacal ta jcolbe svino ti ajvalile, laj yilun ti oyun ta at-o'ntone.

² Xi laj sjac'bun une: —¿C'usi laj apas? Oyot ta at-o'nton ta xquil une. Ja' no'ox ti ma'uc chamel stsacojot yilele. Yu'un nan oy avuni c'op jna'. C'alal jech laj ca'i taje, tal xi'el ta co'nton.

³ Xi laj calbe ya'i ti ajvalile: —¡J'ech'el cajal ac'oplal, Jcuch abtel! ¿Bu ono'ox la xata ti oy ta mucul ti oyun ta at-o'ntone, ti c'alal stuc xa slilijemal busul ti jteclume, xchi'uc c'ac' xa ti ti'naetic ti bu oy smucobbail ti jtot jme'taque?

⁴ —¿C'usi xu' ta jpas ta atojol un? —xi laj sjac' ti ajvalile. Va'i un, laj jc'uban jba ta stojol Dios ti oy ta vinajele.

⁵ Xi laj jtac'be ti ajvalil une: —Mi xc'ot ta avo'nton cu'une, Jcuch abtel, mi xa'abolaj cu'un une, ac'o ave ati', Jcuch abtel, ti xu' ta xibat ta Judá ta xcha'va'anel ti bu oy smuquinalic ti jtot jme' ta jteclume.

⁶ Xi laj yalbun ti me' ajvalil ti nabal ta xocon ti bu chotol ti ajvalile: —¿C'u sjalil ta xach'ay taj une? ¿C'usi to ora ta xasut talel un? Laj calbe ya'i ti c'u sjalil ta xich'aye. Lec laj ya'i. Laj yac' batcun.

⁷ Ma'uc no'ox taje, laj calbe ya'i mi c'ux ta xiya'ie, xc'ot o ti ac'o xiyac'bun licuc ts'ibabil vun ti c'usi loq'uem ta ye ta sti' ti ta xc'ot cac' iluc ta stojol ti ajvaliletic ti oyic ta yosilal ti uc'um Eufrates ti oy ta yelov smaleb c'ac'ale, yo' jech ta xiyaq'uic jelavcun batel ti ta xic'ot c'alal to Judae.

⁸ Laj jc'anbe yan ts'ibabil vun xtoc ti ja' ta xich' ti Asafe jchabiej muc'tic te'tic yu'un ti ajvalile, yo' jech ta xiyac'bun ti te'etic ta sventa ta jcha'meltsan ti ti'naetic ta jteclum yu'un ti ch'ulnae, jech c'u cha'al ti ta xtun ta sventa ti ta xich' pasel smocal ti jteclume, xchi'uc ti ta xtun cu'un ta jna ti bu ta xinaquie. Jech ti ajvalile laj yac'bun scotol, ja' ti coltabilun ta sventa yutsil yo'nton ti Dios cu'un ti c'u s'elan laj jchapbe ya'ie.

⁹ C'alal lic'ot ta stojol ti ajvaliletic ti oyic ta smaleb c'ac'al yu'un ti Eufratese, c'ot cac'be ta sc'obic ti vun ti tacbil batel yu'un ti ajvalile. Laj yac'bun jchi'in ech'el jvoc' soldadoetic ti cajalic batel ta ca' ti pasbilic ta mantal yu'un ti banquilal soldadoetique.

¹⁰ Ja'uc le' une, ti c'alal laj ya'i ti Sanbalat ti oy ta Horone, xchi'uc ti Tobías jun j'opisial amonitae, ep soc sjolic ti laj ya'iic ti oy xa buch'u c'ot ta stiq'uel sba ta scoltael ti israeletique.

Ti c'u s'elan nopbil ta xich' cha'meltsanel ti moque

¹¹ Ta jech yepal lic'ot ta Jerusalén un. Ti yoxibal xa ox c'ac'al jc'otele,

¹² liloc' batel ta ac'ubaltic ti jchi'inojan batel jun chib viniquetic ti mi junuc laj calbe ya'i ti c'u s'elan laj yac'bun jna' Dios ti c'usi sc'an pasel ta Jerusalene. Mu'yuc xquic' batel yan cajlebal ca'etic. C'ajomal no'ox ti jca' jtuc ti jcajlebinoj batele.

¹³ Ti ac'ubal taje, liloc' batel ta ti'na ti oy ta yelov stenlej ta stuq'uil sat vo' ti sbiinoj Dragone, ta ti'na yu'un ti Ch'ayob C'a'epe. Lic jxani ta sq'uelel smocal Jerusalén ti jinesbil xae, ti c'aq'uemic xa ti sti'taque.

¹⁴ Laj taj une, lic jtam ech'el ta ti'na yu'un ti Sat Vo'e, xchi'uc ta sts'anleb vo' yu'un ti Ajvalile. Ja'uc le' une, mu xa xu' xjelav batel ti jca' ti bu taje.

¹⁵ Taje, syijil to ac'ubal, limuy batel ti bu ta xyal talel ti uc'ume. C'alal laj jxani ta sq'uelel ti moque, li'och batel ta ti'na ti oy ta yeloval Stenlejal ti lisut ech'ele.

¹⁶ Ti its'inal ajvaliletique mu'yuc xa'iic ti bu libate, ti c'usi ta jpasolane. Mi ja'uc jchapojbe ya'iic ti judaetic taj une, ti paleetique, ti buch'u ich'bil ye sti'ique, ti jpas-mantaletique, xchi'uc ti buch'utic ta scolta sbaic ta spasel ti abtel xcaltique.

¹⁷ Va'i, xichi laj calbeique: —Xana'ic lec, tsots ti c'usi sc'an pasel vul jtatic li'e. Ti Jerusalene lilijem, c'aq'uemic ti sti'taque. Jvol jbatic ta xcha'va'anel smocal ti Jerusalene yo' jech mu xbic'tal c'opojic ti jlabanvanejetic ta jtojoltique.

¹⁸ C'alal laj jchapbeic ya'iic ti c'u s'elan ta yutsil yo'nton laj scoltaun ti Diose, ti c'u s'elan loc' ta ye laj yalbun ti ajvalile, xi laj staq'uic ti stuquique: —¡Jliquestic xch'a ti abtel sc'an pasele! Xmuyubajic no'ox laj yac'be sba yip yo'ntonic ta jujun tale.

¹⁹ Ja'uc le' une, c'alal laj ya'iic ti Sanbalat ti oy ta Horone, ti Tobías ti j'opisial amonitae, xchi'uc ti árabe Geseme, xbic'tal c'opojic xa liquel ta slabaneluncutic ti xi ta xalique: —¿Bu avich'ojic talel avipic ti avalojic le'e? ¿Mi yu'un ta xanop ta xavol abaic ta scontrainel ti ajvalile?

²⁰ Xichi laj jtac'bee: —Ti Dios ti oy ta vinajele ta sva'an sba cu'uncutic yo' mu xch'ay ta be ti abtele. Ti yajtuneluncutique ta jliquescutic ti abtele. Ti vo'oxuque mu'yuc stunel avoc ac'obic. Mi ja'uc stac' xatic' abaic ta Jerusalén.