Miqueas 5 - Bible in Tzotzil de Chamula

Ti Diose ta xlic sva'anbe yaj'ajvaliltac ti Israele

¹ Avi tana li' une, Jerusalén, chapano aba ti c'u s'elan ta xapoj abae, yu'un volibilot xa. Ta x'ac'bat yich' tsots tsitsel ti banquilal yu'un ti Israele.

² Ti Diose xi ta xale: “Ja'uc ti vo'ote, jteclum Belén Efrata, ti xi avuni muc'ul ti oyot ta yosilal ti Judae, ta x'ayan talel ta atojol ti Ajvalil yu'un ti Israele, ti ta xvul ta loq'uel ta stojol sts'unobal ti vo'ne totil me'ile.”

³ Avi li' tana xtoc une, ti Diose ta sten comel ti yu'untaque, ja' to ta xlic sventain mi voc' yol ti ants ti xchi'uque. Va'i un, ta xlic svol sba xchi'uc ti svinquileltac ti ja' israeletic ti bec'bil batic ta yan banomile.

⁴ Jech ti ajvalile ta xlic sva'an sba ta sq'uelel ta xchabiel ti steclumaltac ta sventa smuc'ul stsatsal ti Ajvalil Dios yu'une. Mu'yuc xa c'usi xal yo'nton ta xcuxiic, ja' ti muq'uibtasbil sc'oplal ta xc'ot ti Jcuch abtel Dios yu'unic ti bu xa jujuti' oy ti banomil ta sjunleje,

⁵ ja' ta spajes ti c'ope. C'alal ta xu'ninbotic jteclumaltic ti asirioetique, c'alal ta x'ochic talel ta muc'tiquil naetic ti chapanobbail cu'untique, ta jtactic batel vucub (7) viniquetic ti banquilal xa'i sbaic ta contrainvaneje, xchi'uc vaxacvo' (8) viniquetic ti ich'bil ye sti'ique.

⁶ Jech ti stuquic une ta xlic stsatsal-pasic ta mantal ti Asiria ti ja' yosilal ti Nimrode. Jech pojbil ta xijc'ot ta yoc ta sc'obic ti asirioetic ti laj xa xtuch'ic jelavel talel ti sts'aquil cosiltic ti ta spojic yalojic ti jbanomiltique.

⁷ Ti c'u yepal scomelal ts'unubal ti Jacobe, ti tiq'uil ta o'lol ta epal jteclumetique, co'ol s'elan job-ac'ubal yu'un ti Diose, co'ol s'elan jech c'u cha'al ti chaquilo' ta xvul ta bajel ta sba ti momoletique. Ti stuquique, mi ja'uc jutebuc ta smalaic ti c'usi ta snop ti viniquetique, ja' ta smalaic ti c'usi ta snop ti Diose.

⁸ Ti jech volibil ta epal muc'tiquil jteclumetic ti c'u yepal scomelal sts'unubal ti Jacobe, ta xc'ot ta pasel yu'unic ti co'ol to s'elan jcot ta león ta stojol ti te'tical chon bolometique, ti co'ol to s'elan jcot león ta stojol ti chijetique, yu'un ti c'alal ta x'ech' ta stojole, ta sbal ta lilinel ta j'ech'el, ti mu junuc cuxul ta xicta comele.

⁹ Ja' jech ta xatsacvan ta c'op ti vo'ote, Dios, ti ta xalilin ta j'ech'el scotol ti avajcontrataque.

¹⁰ Xi s'elan sc'an ta xal ya'i ti Diose: “Ti jech c'ac'al taje, ta jmil ti aca'taque; ta jlilin ti acarretatac sventa ti ac'ob-letoe.

¹¹ Ta xc'ot cu'un ta sts'ijlajan banomil ti jteclumetic avu'une; ta jines ti pojobbailetic avu'une.

¹² Ma'uc no'ox taje, yu'un ta jtsutses ta j'ech'el ti j'ac'-chameletic avu'une; mi junuc xa ta xquictabot comel ti buch'utic sna' xt'unvanique.

¹³ Ma'uc no'ox taje, yu'un ta jlilin ti loc'obbailetique xchi'uc ti c'usitic bisbil ta ch'ul tonetic avu'une, yo' jech ta xtub sc'oplal ta yich'el ta muc' avu'un ti adiostac ti laj ameltsane.

¹⁴ Ta jpitsbot loq'uel ti c'usitic abisojic ta cuxul te'etique; ta j'ech'el ta jtubbe sc'oplal ti jteclumetic avu'une.

¹⁵ Ta sc'ac'al co'nton ta jpac sutel jq'uex ta stojol ti muc'tiquil jteclumetic ti mu'yuc xch'unic ta spasel ti c'usi ta jc'ane.”