Miqueas 4 - Bible in Tzotzil de Chamula

Ti c'u s'elan lamajem c'op ti ta spas mantal ti Diose

¹ Ti slajebtic xa batel ti c'ac'ale, ta j'ech'el ta xchapaj lec sc'oplal ti vits ti bu oy xch'ulna ti Diose. Ja' jun vits ti cajal ta xc'ot sc'oplal ta j'ech'ele, ti ja' no'ox stuc ti cajal ti sc'oplale, mu'yuc xa yan. Scotol ti muc'tiquil jteclumetique, ta xtalic ta stojol.

² Mu no'ox albajuc yepal ti jteclumetic ta xc'otic tey ti xi ta xalbe sbaique: “La'ic, muycutic batel ta vits yu'un ti Diose, ta xch'ulna ti Dios yu'un ti Jacobe, yo' jech ti stuque ta xiyac'botic quiltic ti bu stamoj ech'ele, yo' jech ta jchantic ta spasel ti c'u s'elan ta sc'an ti stuque.” Yu'un ti ta Sione, ta xlic talel ti chanubtasel yu'un ti Diose; yu'un ta jteclum Jerusalén, ta xlic talel ti sc'ope. b

³ Ja' stuc ti Diose ta xchapan c'u s'elan ti jujun muc'tiquil jteclumetique; ja' ta xchapan c'u s'elan c'opetic yu'un ti epal jteclumetique, ac'o mi namal banomil xa oyic. Ti yespadaique, ta xlic sjoybinic ta voc'ob banomil yu'unic; ta xlic sjoybinic ta jos ti spuya'ique. Mi junuc jteclum ta stsac ti yabtejeb yo' ta scontrain ti yan jteclume, mi ja'uc xa ta xich'ic chanubtasel c'u s'elan ta yaq'uel ti letovajele.

⁴ Scotolic nom c'ot ti xi'el ta xa'iic ta xch'iel sc'opojelique; jujun tal xu' ta xcux yo'ntonic ta yolon yaxinal ti s'uvaique, ti yicuxique. Ti va'i s'elan taje, ja' ta xal ta ye ta sti' stuc ti Dios ti scotol xu' yu'une.

⁵ Ti yan jteclumetique nijil chimilic ta stojol ti sdiosique, ja'uc ti vo'otique ta jch'untic ta spasel ti c'u s'elan ta sc'an ti Ajvalil Dios cu'untique.

Ti Diose ta stic' sba ta spojel ti steclumale

⁶ Ti Diose xi ta xale: “Ti jech c'ac'al taje, ta xlic jtsob ti jchijtac ti pasemic ta coxove; ta xquiq'uic talel ta jtojol ti ch'ayemic ta bee, ti laj xa cac'beic ti svocolique.

⁷ Ti scomelal yuni coxovile, ja' ta xc'ot ta jun jtunel; ti xch'ayemal ta bee, ta xc'otic cu'un ta jun tsatsaquil jteclum. Avi tana li' une, ja' ta xic'ot ta jventainvanej yu'unic sbatel osil ti ta vits Sione.

⁸ Jech ti vo'ote, jteclum Jerusalén, ti co'ol a'elan ti natil q'uelob osilote, ti pojobbailot yu'un ti vits Sione, ta xac'ot yan velta ta banquilal jtsobvanej yu'un ti lume jech c'u cha'al la'ech' ta ba'yel ti c'alal bisbilot to ox ta jun muc' ta me' ajvalile.” p

⁹ Ja' yu'un un cha'e, ¿c'u cha'al ya'yel ta xa'avan ta j'ech'el jech c'u cha'al junuc ants ti liquem xc'uxul ta svoq'uesel ti yole? ¿Mi yu'un ch'ay xa sc'oplal ti ajvalil ta atojole? ¿Mi yu'un ja' laj xa chamicuc ti avajbijubtasvaneje?

¹⁰ Valc'uj sutbijan xa, avetan xa xchi'uc ti yipal xcuxule, jteclum Sión, jech c'u cha'al junuc ants ti xvalc'uj sutbij xa ta xa'ibe xc'uxul ta svoq'uel ti yole, yu'un ti ateclumale ta xloc' ech'el ta atojol, yu'un ta xbat nacliicuc ta jamal osiltic. Ma'uc no'ox taje, yu'un ta xbatic c'alal to ta jteclum Babilonia. Ti bu taje, ti Diose ta stic' sba ta spojel ti steclumale, yu'un ta spoj ta yoc ta sc'ob ti jcontrainvanejetique.

¹¹ Avi tana le'e, laj xa stsob sba epal lum ta scontrainelot ti xi ta xalique: “Xlaet to ya'yel ti ta to xquiltic ta jba ta jsatic ti soquem ta xcom sc'oplal ti Jerusalene.”

¹² C'u stu un, ti jteclumetic taje, mi ja'uc ta sna'ic ta xojtiquinic ti c'u s'elan snopoj ta spas ti Diose; mu sna'ic ti jech ta xich'ic tsobel ta jujuvoc' jech c'u cha'al ta xich' tsobel ta jujuchuc ti trigo ti ta xich' majele.

¹³ Lican, va'lan ec un, jteclum Sión, ju'o ta teq'uel ya'i ec un, yu'un ti Diose xi ta xale: “Co'ol s'elan yip jcot vacax ta xcac'bot ti avipe, tsatsal taq'uin ta xcac'bot axulubin xchi'uc c'anal ts'ayetel taq'uin ta xcac'bot ti avoytaque yo' jech epal jteclumetic ta xatubbe sc'oplal xchi'uc. Ta xapojbe ti sc'ulejalic ti ma'uc ta slubel xchamel yoc sc'obic laj staic ta tsobele, yu'un ta xavac'bun ta jtojol ti vu'un Ajvalilun yu'un scotol ti banomile.