Miqueas 2 - Bible in Tzotzil de Chamula

Stsacoj yip ti cuxul j'ilbajinvanejetique

¹ Mu xa ono'ox cha'bel un, ti buch'utic puch'ulic ta stemic ti yacalic xa ta snopel ti c'usi chopol xu' ta spasique. Mi sacub ti osile, ta xc'ot ta pasel yu'un, ja' ti stsacoj lec yipic ta xa'iique.

² C'upijem yo'ntonic yu'un ti osil banomile, ta xlic yu'ninic un. Xuj xutic no'ox loq'uel xchi'uc yalab xnich'nab ti yajval naetic ti bu c'upij yo'ntonic yu'une. Poj xutbeic xrextoic ti c'u yepal smacojique.

³ Ja' yu'un un, xi ta xal ti Diose: “Ja' jechun ec, oy xa c'usi jnopoj ta jpas ta atojolic, ti mu xa ono'ox xacol ava'iic ta j'ech'ele, ti mu ja'uc xa cajal xava'i aba ti bu ta xaxanave, yu'un ja' o yorail ti mu'yuc c'usi lec ta xc'ot ta pasele.

⁴ Ti jech c'ac'al taje, ta xaq'uejintabatic me'inal q'uejimoletic ti xi ta xa'albatique: ‘Bal to xca'itic pisil une, ti ta j'ech'el lijtubotique. Ti jteclumaltic yu'un ti Diose, mu ja'uc xa laj stic' sba ti Dios ti c'alal och yan yajvale. Jech laj yich' ch'aquel ti cosil jbanomiltic yu'un ti jpoj-osiletique.’ ”

⁵ Jech o xal ti vo'oxuque, ch'acbil ta xac'otic ti bu oy steclumal ti Diose.

Ti chopol j'alc'opetique

⁶ Xiic ta xalic ti stuquique: “Ts'ijlan ca'itic ta jtojol ti c'usi xavulvun no'ox ta scaj'alilanele, mi ja'uc xu' ta xvul ta jtojoltic ti c'usi chopole.”

⁷ ¿Mi yu'un ca ti Dios ta sbis ta cotol chaval steclumaltac ti Jacobe? ¿Mi yu'un xa ca ch'abal sts'iquemal xcuchemal yu'un? ¿Mi yu'un ca jech ta spas? ¿Mi yu'un ca mu lecuc ti sc'op ta xc'ot ta stojol ti buch'u ta stuc'ulan sbae?

⁸ Ti vo'oxuque, cajal ave ati'ic xava'i abaic ta stojol ti jteclumale. Ta xatsatsal-pojbeic slequil-c'u'ic ti buch'utic ja' to no'ox sutic talel ta letoe, ti snopojic ti mu xa c'usi chopol ta xc'ot ta stojole.

⁹ Ta xanutsic loq'uel ta snaic ti antsetic ti c'alal jun yo'nton tey nacalique; laj avu'ninbe ti yalabic ti c'alal ja' smuyubajel yo'ntonic staojic cu'une.

¹⁰ Lican, va'lanic, yalel muyanic ta xanobal, yu'un ma'uc yavil xcuxubil avo'nton li'e ta scoj ti mu albajuc ti chopol oy ta stojole. Jech o xal soquem ta j'ech'el.

¹¹ Mi oy buch'u xi ta xlic esomajuc sjol ta sjutel ti c'ope: “Ti vu'une ta xcalbe sc'oplal ti lec ti vinoe xchi'uc ti uch'bajele”, ti jech slo'il ya'yej ti j'alc'op taje, ja' xa xyal o ta xa'iic ti jteclum li'e.

Ti Diose ta xal ti ta stic' sba ta spojel ti steclumale

¹² Ta xlic jtsob scotol steclumal ti Jacobe. Ta xlic jvol ti xi xa yuni epal scomelal ti Israele. Jech ta jtsob jech c'u cha'al ta xich' tsobel ti chij ta scorrale, jech c'u cha'al ta spasic ti jq'uel-chijetic ti ta stsobic ti xchijic ta yaxaltic ti jun to yepal xc'uletic ta a'yiele.

¹³ Yu'un ja' jam be ech'el ti Diose, ts'acalic batel ta spat ti stuquic ti ta xloq'uic ech'el ta sti'tac ti jteclume, jba'be ech'el yu'unic ta scotolic ti Ajvalil ti ja' Dios yu'unique.