Miqueas 1 - Bible in Tzotzil de Chamula

Ti c'usi ta slaman talel ti Dios ta stojol ti jteclum Samariae

¹ C'alal yorail tiq'uilic ta ajvalil ta Judá ti Jotame, ti Acaze, xchi'uc ti Ezequíase, ja' o yorail tal c'oponatuc yu'un Dios ti Miqueas ti talem ta jteclum Moresete. Ti Miquease jambat sba sat ta yilbel sc'oplal ti c'usi ta xc'ot ta stojol ti jteclum Samariae xchi'uc ti jteclum Jerusalén ti ja' laj yal ti Diose.

² Acotolic jteclumetic, ts'etano achiquinic ta ya'yiel li'e; acotolic jnaclejetic ta banomil, a'yio ava'iic li'e ti xi s'elan ta xc'ot ta pasele: Ti Diose ja' ta sva'an sba ta rextico yo' ta scontrainoxuc, yu'un ta xch'ulna to ta sva'an sba talel.

³ Ti Diose ta xloc' talel ti bu nacale, ti xchechet talel ta xanobal ta sba ba te'tic ti oy ta vitstique.

⁴ Ta x'unij ta yolon yoc ti vitstic yu'une jech c'u cha'al junuc cera ti ta xich' lacanel ta c'oq'ue. Ti vitstic oy ta yolon yoque, ta x'unij ti xbalaq'uin no'ox ech'el ta stenlejal jech c'u cha'al ti balac' vo' ti ta x'ech'e.

⁵ Scotol ti va'i s'elan taje, ja' ta scoj stoyobbail snitilultac ti Jacobe, ta scoj smul xtoc svinquileltac ti Israele. ¿Bu c'alal c'ot stoyobbail ti Jacobe? C'ot ta Samaria jteclum. ¿Bu oy ti c'opojebal ti'inebal yu'un sdiosic ti Jacobe? Tey no'ox ta jteclum Jerusalén.

⁶ Ja' yu'un un, xi ta xal ti Diose: “Ja' ta jpas ti stuc xa no'ox xch'uch'ulil busul ta xcom ti jteclum Samariae. Ta xc'ot ta jun jamal osiltic ti bu ta xlic yich' ts'unel ti uvae, ti ta jtani batel ta stenlejal stanaltac ti jteclume, ti c'ajomal xa no'ox xvinaj ta xcom ti sliquebal yoque.

⁷ Scotol ti loc'obbailetic yu'unique, lilijem ta xcom; chic'bil ta xcom scotol ti ch'ul c'opojebal ti'inebal yu'unique. Yu'un ja' laj yich' meltsanel o ta staq'uin antsetic ti sna' sbolomalin sbaique. Yan to velta xtoc ta xcac' joybijuc ta staq'uin jbolomajel ants.”

Ta xme'inal oc' ti Miquease

⁸ Ta jmil jba ta oq'uel yu'un ti at-o'ntone; ta xixanav ta pis oc yu'un taje. Xivu'et no'ox yu'un jech c'u cha'al te'tical ts'i'; xivic'vun no'ox yu'un jech c'u cha'al ti ch'inic j'anilajel-mute.

⁹ Yu'un xi c'ot ta stojol ti jteclum Samariae: mu xa cha'bel stac' poxtael ti syayijemale, ti c'ot xa ta stojol ti Judae, ti xyaquet xa batel ta stojol ti Jerusalene, ta jteclum ti bu nacalic ti jteclumaltaque.

¹⁰ Ti va'i s'elan taje, mu me xavalbe ya'iic ti jnaclejetic ti nacalic ta jteclum Gate, mi ja'uc xa'oq'uic xa liquel yu'un. C'ajomaluc no'ox valc'uj sutbijanic yu'un ti yipal xc'uxul ta pucuctic yu'un ti Bet-le-afrae.

¹¹ Jnaclejetic yu'un jteclum Safir, bec'bil ta xaloc' ta abanomilic, ti nijil chimiloxuc ta q'uexlal apun ta j'ech'el ti jech t'analoxuque. Ti jnaclejetic nacalic ta Zaanane, mi ja'uc stac' xloq'uic. Ti jnaclejetic ta Bet-esele, x'avlajet no'ox liquel ti oq'uel teye, mi ja'uc xa ta xataic ti pojel yu'une.

¹² Ti c'ajomal no'ox juteb ta yo'ntonic ta sc'an ti lecuc oyicuc ti jnaclejetic ta jteclum Marote, xvalc'uj sutbijic xa liquel xchi'uc ti yipal xc'uxule. Ta xa xc'ot ta pasel yu'un Dios ti c'usi chopol ta xc'ot ta ochebal ti'na yu'un ti jteclum Jerusalene.

¹³ Ti vo'oxuc jnaclejetic yu'un ti jteclum Laquise, ti co'ol atoyobbailic jech c'u cha'al ti Israele, ti ja' ta acojic ti laj sa' smulic ti jteclum Sione, xojbeic scarreta ti aca'ique.

¹⁴ Albo xa avo'nton ti ch'ay ta aba ta asatic ta sq'uelel ti jteclum Moréset-gate. Ti ta jteclum Aczibe, ta xc'ot ta spets'al ti ajvaliletic yu'un ti Israele.

¹⁵ Ti Diose xi ta xale: “Ta ach' ta jtac talel ta atojolic jun j'ilbajinvanej ta acontrainelic ti nacaloxuc ta Maresa jteclume. Ti buch'utic cajal sc'oplal yu'un ti Israele, ta xbat snac' sbaic ta nail ch'entic ti ta Adulame.

¹⁶ Jnaclejetic yu'un Sión, t'axbuno ta loq'uel ajolic yu'un ti avocolique, ta scoj ti mu xtuch' ta avo'nton ti avalab anich'nabique. T'axbuno ta loq'uel ti ajolic jech c'u cha'al ti t'ax-jol tararane, yu'un ti avalab anich'nabe, bec'bil ta xloq'uic batel ta sbanomilic.”