San Mateo 7 - Bible in Tzotzil de Chamula

Mu xavac' ta chapanel ti yane

¹ Ti Jesuse xi laj yale: —Mu xavac' ta chapanbel smul ti yane yo' mu xata chapanel yu'un ti Diose.

² Ti c'u yepal ta xachapanbe smul ti yane, jech yepal ta xchapanot ti Diose. Ti c'u yepal ta xapasbe ti yane, ja' jech ta spas ti Dios ta atojolique.

³ ¿C'usi xavut xavil ti uni juteb c'a'ep ti oy ta sat ti achi'ile ti ja' mu xavil ti xchumanil c'a'ep ti oy ta asate?

⁴ Mi oy ti xchumanil c'a'ep ta asate, ¿c'u cha'al ta xavalbe ti achi'ile: ‘Jloq'uestic ti uni juteb c'a'ep ti oy ta asate?’

⁵ Jeche' ta xapac'ta aba. Loq'ueso ba'yel ti xchumanil c'a'ep ti oy ta asate, va'i unbi, xu' xaloq'uesbe ti uni juteb c'a'ep ti oy ta sat ti achi'ile.

⁶ “Ti c'usi c'otem yu'un ti Diose, mu xavac'beic ts'i'etic, yu'un xu' ta slilinot ta ti'el. Mu xavac'be chitometic ti nats'il ti toyol stojole, yu'un xu' naca no'ox ta xpech'olan ta teq'uel.

C'ano, sa'o, tijo ti ti'nae

⁷ “C'anbeic ti Diose, ta xac'boxuc. Sa'ic, ta xataic. Tijic ti ti'nae, ta xajambatic.

⁸ Ti buch'u ta sc'ane, ta x'ac'bat. Ti buch'u ta sa'e, ta sta. Ti buch'u ta stij ti ti'nae, ta xjambat.

⁹ “¿Mi oy la buch'u junucal ta xavac'beic jbej ton ti anich'onic c'alal ta sc'an jbejuc pan sve'e?

¹⁰ ¿Mi oy la jcot chon ta xavac'beic ti c'alal choy ta sc'anboxuque?

¹¹ Manchuc mi toj chopoloxuc un, xana'ic lec st'ujel c'usi ta xavac'beic ti anich'onique. ¡Ti Jtotic ti oy ta vinajele, x'ech' to ta xac'boxuc ti c'usi leque!

¹² “Ja' yu'un un, mi ta xac'an ti lec ta xaspasboxuc ti achi'ilique, lec me xapas abaic ta stojolic. Taje, jech ta xchanubtasvan smantal ti Moisese xchi'uc ti c'u s'elan laj sts'ibaic comel ti j'alc'opetique.

Ti uni biq'uit ti'nae

¹³ “Ochanic batel ta uni biq'uit ti'na, yu'un ti sti' sbelal ti ch'ayele, toj jamal, toj muc', toj ep ti buch'utic ta x'ochic batel ti bu taje.

¹⁴ Ja'uc ti sti' sbelal cuxlejale, mu jamaluc, toj biq'uit, jutuc ti buch'utic ta staique.

Ti jpets te'e, ta sat no'ox ta ojtiquinel

¹⁵ “Bijanic yu'un ti jlo'lavanejetic ti ta xalic ta xc'opojic ta sventa ti Diose, ti co'ol chij ti stalelic yilele. Ti yut yo'ntonique, jti'oval-oq'uil ta j'ech'el.

¹⁶ Ta stalelic no'ox xavojtiquinic ti c'u s'elan ta spasique. Yu'un ti ch'ixe mu xu' ta xac' uva ti sate. Ti tsucum ch'ixe mu xu' ta xac' icux ti sate.

¹⁷ Scotol ti bu lequil te'e, lec ta xac' ti sate. Ti chopol te'e, chopol ta xac' ti sate.

¹⁸ Ti lequil te'e mu stac' chopol ta xac' ti sate. Ti chopol te'e mu stac' lec ta xac' ti sate.

¹⁹ Scotol te' ti mu lecuc ta xac' ti sate, boj xi loq'uel, chic' xi ta c'oc'.

²⁰ Ta stalelic no'ox xavojtiquinic ti c'u s'elan ta spasique.

Ti bu ventainel yu'un ti Diose mu scotoluc ta x'ochic batel

²¹ “Yepal ma' ti xi ta xalique, ‘Cajval, Cajval’, ja'uc le' une, mu scotoluc ta x'ochic batel ti bu ta xventainvan ti Diose. Ja' no'ox ta x'ochic batel ti buch'utic ta spas ti c'usi oy ta yo'nton ti Jtot ti oy ta vinajele.

²² C'alal ta sta sc'ac'alile, yepal ti xi ta xalique: ‘Cajval, Cajval, lic'opojcutic ta aventa. Laj jloq'uescutic pucuj ta aventa. Vo'ot ta aventa laj cac'cutic ta ilel ti alequilale.’

²³ Va'i un xichi ta jtac'beique: ‘Mu cha'beluc xacojtiquinic. Ch'aco abaic ta jtojol, ti mu stac' alel ti c'usitic laj apasique.’

Sliquebal ti cha'bej nae

²⁴ “Ti buch'u ta xchiquinta xchi'uc ta spas ti c'usi ta xcale, co'ol s'elan jun bijil vinic ti laj smeltsan sna ta ba tone.

²⁵ Tal tsots vo', laj nojuc talel ti uc'umetique, ech' majeuc ta tsots ic' ti snae. Mu'yuc xlom, yu'un tsacal lec ta ba ton ti sliqueb yoque.

²⁶ Ja'uc ti buch'u ta xchiquinta ti mu spas ti c'usi ta xcale, co'ol s'elan jun vinic ti mu'yuc sbijil ti laj smeltsan sna ta ba yi'e.

²⁷ Tal ti tsots vo'e, laj nojuc talel ti uc'umetique, ech' majeuc ta tsots ic' ti nae. Butq'uij yalel, lilij scotol.”

²⁸ C'alal laj yo'nton ta chanubtasvanej ti Jesuse, ch'ayal c'ot yo'ntonic ti jech chanubtasvane.

²⁹ Yu'un vinaj ti yich'oj tsots yabtel ti Jesuse. Mu xco'olaj xchanubtasvan jech c'u cha'al ti jchanubtasvanejetic yu'un ti mantale.