San Mateo 3 - Bible in Tzotzil de Chamula

Ti Juan j'ac'-ich'-vo'e oy c'usi ta xal ta xocol banomil

¹ Ti jech yorail taje, ja' o vul ta loq'uel ti Juan j'ac'-ich'-vo' ta xocol banomil yu'un ti Judeae,

² ti xi ta xale: —Na'o aba ava'iic, sutanic talel ta stojol ti Diose, yu'un nopol xa yorail ti ta xventainvan ti Diose.

³ Ti Juan taje, ja' ti buch'u xi ts'ibabat sc'oplal yu'un ti j'alc'op Isaiase: “Oy buch'u tsots ta xc'opoj ta xocol banomil ti xi ta xale: ‘Jambeic tuq'uil be ti Cajvaltique. Meltsanbeic lec sbe.’ ”

⁴ Meltsanbil ta stsotsil camello sc'u' ti Juane. Nucul ti xchuque. Naca c'ulub ti sve'ele xchi'uc ti te'tical ajapome.

⁵ Ti jnaclejetic ta Jerusalene, ta sjoylej ti Judea banomile, xchi'uc ti nopol ta uc'um Jordane, ta xtalic ya'ibeic sc'op ti Juane.

⁶ C'alal jamal ta xalic ti smulique, ti Juane ta xac'be yich' vo' ta uc'um Jordán.

⁷ C'alal laj yil ti Juan ti ep ta xtalic ta yich'el vo' ti fariseoetique xchi'uc ti saduceoetique, xi laj yalbee: —Xnich'nab jti'oval chon, ¿buch'u laj yalboxuc ava'iic ti ta xapoj abaic yu'un ti tsots tsitsel ti ta xa xtale?

⁸ Lecuc ti c'usi ta xapasique yo' ta xvinaj ta j'ech'el ti lasutic talel ta stojol ti Diose.

⁹ Mu xatoy abaic yu'un ti xi ta xavalique: ‘Snitilulotic Abraham ma' ti vo'otique.’ Ta xcalboxuc ava'iic, ti Diose xu' ta sjoybin ta snitilultac Abraham ti tonetic li'e.

¹⁰ Chapal xa ti eq'uel ta slomes ti te'etic xchi'uc ti yibele. Scotol te'etic ti mu'yuc lec ta xac' ti sate, ta xich' bojel yo' jech jip xi ochel ta c'oc'.

¹¹ Ta melel, vo' no'ox ta xcac' avich'ic ta yiq'ueloxuc ti sutanic talel ta stojol ti Diose. Ja'uc ti Buch'u ta ts'acal to ta xtale, ta xac'boxuc avich'ic ti Ch'ul Espíritu ti co'ol s'elan c'oq'ue. Ti Buch'u ta ts'acal ta xtale, jelavem ti smuc'ule. Ti vu'une ch'abal c'usi xu' cu'un, mi ja'uc ta yich'bel batel ti xonobe, mu'yuc jlequilal ta stojol.

¹² Ti Buch'u ta ts'acal to ta xtale stsacoj xa ti yic'aobil trigoe. Ta st'ujbe loq'uel ti sc'a'epale yo' naca trigo ta xcom. Ti t'ujbil trigoe ta sq'uej ta yavil. Yan ti sc'a'epale ta xich' chiq'uel ti bu mu xtub ti c'oq'ue.

Ta xich' vo' ti Jesuse

¹³ Ti Jesuse loc' batel ta Galilea banomil. Ic'ot ta uc'um Jordán yo' ta x'ac'bat yich' vo' yu'un ti Juane.

¹⁴ Ti Juane mu xc'ot o ta xa'i ti ta xac'be yich' vo' ti Jesuse. Jech o xal xi laj yale: —Vo'ot ta xavac' quich' vo' ti jechuque. ¿C'u no'ox cha'al ti latal ta jtojole?

¹⁵ Ti Jesuse xi laj staq'ue: —Ch'an to chian xchi'uc le'e. Tsots sc'oplal ti c'otuc ta pasel scotol cu'untic ti c'u s'elan yaloj ti Diose. Ti Juane laj ya'ibe smelol.

¹⁶ C'alal laj yich' vo' ti Jesuse, loc' batel, ta jech yepal jam ti vinajele. Ti Jesuse laj yil ti Ch'ul Espíritu yu'un ti Diose ti co'ol s'elan jcot paloma ti ta xyal talel ta stojole.

¹⁷ Ja' o vinaj talel ti oy Buch'u c'opoj ta vinajel ti xi laj yale: —Le'e, ja' Jnich'on ti c'ux ta xca'ie, ximuyubaj yu'un.