Marcos 11 - Bible in Tzotzil de Chamula

Ti Jesuse ta x'och batel ta Jerusalén

¹ C'alal c'otic nopol xa Jerusalén bu oy ti chib jteclum Betfage xchi'uc ti Betaniae, ti oy ta yeloval vits Olivose, ti Jesuse laj stac jelavel cha'vo' yajchanc'op,

² ti xi albatique: —Batanic ta uni jteclum le' xjelav batele. C'alal mi lac'otic bu taje, ta xataic jun burro chucul ti mu'yuc bu cajlebinbile. Jitunic, nitic talel li'e.

³ Mi oy buch'u xi ta xalboxuque: ‘¿C'u cha'al jech ta xapasic le'e?’ xi xavalbeic ya'ie: ‘Ta xtun yu'un ti Cajvaltique. Ta sutesbot talel ta ora.’

⁴ Va'i batic un, chucul laj staic ti uni burroe nopol ta ti' na ti oy ta ti' bee. Laj sjitunic talel.

⁵ —¿C'usi ta xapasic? ¿C'u cha'al ta xajitunic ti burroe? —xiic ti jlom ti buch'u tey oyique.

⁶ Jech laj stac'beic sutel jech c'u cha'al albatic yu'un ti Jesuse. Mu'yuc c'usi albatic.

⁷ Laj snitic batel ti burro bu com ti Jesuse. Lic slambeic sc'u'ic ta sba ti burroe. Caji batel ti Jesuse.

⁸ Yepal no'ox ti buch'u ta slaman sc'u'ic ta be. Oy yan xtoc laj sbojic talel yanal c'ob te'. Laj slamanic ta be.

⁹ Xi laj yalic ti buch'u jba'beic batele xchi'uc ti buch'u ts'acalic talel ta patile: —Jun yutsil ti Buch'u tacbil talel yu'un ti Diose.

¹⁰ Jun yutsil ti jventainvanej ta xtale jech c'u cha'al ventainvan ti jmolmuc'totic Davide. Jun yutsil ti Dios oy ta toyole.

¹¹ Och batel ti Jesús ta Jerusalén. Tuc' bat bu oy ti ch'ulnae. C'alal laj sq'uel scotol c'u s'elane, c'un to bat ta Betania xchi'uc ti lajcha'vo' yajchanc'optaque, yu'un mal xa ti c'ac'ale.

Ti Jesuse laj sbis ta cotol chaval ti icuxe

¹² Ta yoc'lomal c'alal loq'uic batel ta Betaniae, ti Jesuse lic vi'najuc.

¹³ Laj yil ta nom jpets icux ti oy yanale. Bat sq'uel mi oy sat. Ja'uc le' une, mu'yuc sat laj sta. C'ajomal naca yanal, yu'un ma'uc to yorail ta satin.

¹⁴ Va'i un, ti Jesuse xi laj yalbe ti icuxe: —Mu'yucuc buch'u slo'bot o asat ta j'ech'el. Laj ya'iic ti yajchanc'optaque.

Ti Jesuse tsmes ta xch'uba ti ch'ulnae

¹⁵ Ts'acal to un, c'alal c'otic ta Jerusalén ti Jesuse xchi'uc ti yajchanc'optaque, och batel ta ch'ulna, laj snutsan loq'uel scotol ti buch'u ta xchonilajic, ta xmanolajic teye. Laj svalc'unbe xmexaic ti jel-taq'uinetique xchi'uc xchonolajeb ti jchon-palomaetique.

¹⁶ Mi junuc ta xac' ochuc ti oy c'usi xcuchojic ochel ta ch'ulnae.

¹⁷ Ti Jesuse xi lic chanubtasvanuque: —Xi ta xal ti ts'ibabil ta ch'ul c'ope: ‘Ti jch'ulnae, albil sc'oplal sventa jtaobil ta c'oponel ta ti'inel yu'un ti jnaclejetic oyic ta sjoylej banomile.’ Ja'uc ti vo'oxuc une, lajoybinic ta snail ch'en j'eleq'uetic.

¹⁸ Lic xi'icuc c'alal laj ya'iic ti banquilal paleetique xchi'uc ti jchanubtasvanejetic yu'un ti oy c'usi tsots albil sc'oplale. Lic sa'beic smelol c'u s'elan ta xaq'uic ta milel ti Jesuse yu'un laj yilic ti ch'ayal ta xc'ot yo'nton yu'un ti jnaclejetic ti c'u s'elan ta xchanubtasvane.

¹⁹ C'alal och ti ac'ubale, loc' batel ta jteclum Jerusalén ti Jesús xchi'uc ti yajchanc'optaque.

Ti icux ch'abal sate ta xtaquij

²⁰ Sob xa ta yoc'lomal, ech'ic no'ox xtoc bu teq'uel ti icuxe. Ti yajchanc'optaque laj yilic ti taquijem xa xchi'uc ti yibele.

²¹ Va'i un, ti Pedroe vul ta yo'nton ti c'u s'elan laj ya'ie, xi yalbe ti Jesuse: —Jchanubtasvanej, q'uel avil ti icux ti laj abis ta cotol chavale, taquijem xa.

²² Xi tac'bat yu'un ti Jesuse: —C'otuc ta avo'ntonic ti oy c'usi xu' yu'un spas ti Diose.

²³ Ta xcalboxuc ava'iic ta melel, buch'uuc no'ox ti xi ta xalbe ya'i ti vits li'e: ‘Loc'an batel li'e, ba jipo aba ta nab’, mi xute, mi mu xna'etuque, ti xch'unoj ta xc'ot ta pasel c'usi laj yale, ta ono'ox xc'ot ta pasel.

²⁴ Jech o xal ta xcalboxuc ava'iic, scotol ti c'usi ta xac'anbe ti Dios c'alal ta xataic ta c'oponele, mi ta xach'un ti la'ac'bat xae, jech ono'ox laj xa ataic.

²⁵ Ch'ayo tubo ta o'ntonal mi oy buch'u aq'uelojbe smul c'alal ta xac'opoj xati'ine, jech ti Atotic oy ta vinajele ta xch'ayboxuc ti amul acolo'ique.

²⁶ Mi mu xach'ay xatub ti mulil colo'ile, jech ti Atotic ti oy ta vinajele mu xch'ay stub ti amul acolo'ique.

Tsots yabtel yich'oj ti Jesuse

²⁷ Ti Jesús xchi'uc ti yajchanc'optaque cha'sutic batel ta Jerusalén. C'alal och batel ta ch'ulnae, nopaj talel ta stojol ti banquilal paleetique, xchi'uc ti moletique, xchi'uc ti jchanubtasvanejetic yu'un ti oy c'usi tsots albil sc'oplale.

²⁸ Xi laj sjac'beic ti Jesuse: —¿C'usi avabtel avich'oj? ¿Buch'u laj yac'bot tsots avabtel ti vi s'elan ta xapase?

²⁹ Xi tac'av ti Jesuse: —Ja' jechun ec, ta jc'an ta jac'boxuc jbel c'op. Mi xtac' avu'unique, ta xcalboxuc ava'iic buch'u yac'ojbun cabtel ti jech ta jpase.

³⁰ Albun ca'i, ¿buch'u laj stac talel ti Juan yo' tal yac' ich' vo'e? ¿Mi tacbil talel yu'un ti Diose? ¿Mi ja' tacbil talel yu'un ti viniquetique? Tac'beicun tal ca'itic.

³¹ Ti stuquique xi lic yalolanbe sbaique: —Mi ta xcaltic ti ja' tacbil talel yu'un ti Diose, ti stuque xu' xi ta xistac'botique: ‘¿C'u cha'al ti mu'yuc laj avich'ic ta muc'?’

³² Mi ta xcaltic ja' tacbil yu'un ti viniquetic, melel toj xi'bal sba yu'un scotolic sna'ojic ja' jun j'alc'op ti Juane.

³³ Jech o xal xi laj stac'beic ti Jesuse: —Mu jna'cutic. Xi laj stac' ti Jesuse: —Ja' jechun ec, mi ja'uc ta xcalboxuc ava'iic buch'u yac'ojbun tsots cabtel ti jech ta jpase.