Malaquías 2 - Bible in Tzotzil de Chamula

¹ Ti Dios ti scotol xu' yu'une, xi ta xale: “Avi tana une, paleetic, xi s'elan sc'oplal ti sc'an xapasique:

² Tsotsuc sc'oplal xava'iic ti ch'unbeicun ti c'usi ta xcale, c'otuc ta pasel avu'unic ti quich'el ta muq'ue. Yan ti mi mu jechuc ta xapasic une, ta me xajbisoxuc ava'iic ta cotol chaval, ja' ti mu'yuc laj avaq'uic ta venta ti oy jc'oplal ti quich'el ta muq'ue. Ta joybin ta avocolic no'ox xtoc ti oy c'usi lec ataojic ti jech oyoxuc ta paleale.

³ “Ta jtubbe sc'oplal ti jech tsots avabtel avich'ojique. Ta jip ta asatic xtoc ti yic'obal sbel xch'ut ti chon bolometic ti ta xavac'beic yich' svocol ta milele. Jmoj capal ta xavich'ic mesel loq'uel xchi'uc ti yic'obal sbel xch'ut ti chon bolometique.

⁴ Ja' to jech ta xana'ic ti vu'un laj cal ti mantale yo' jech mu xch'ay ta be ti jtrate laj jpas ta stojol ti Levie.

⁵ “Ti jtratee, ja' cuxlejal, j'ac'-jun-o'ntonal ti c'ot ta stojol ti Levie. Ti c'ot ta stojol cu'une, yo' ta xiyich' ta muc', yo' ta xixi'taun, ti nijil chimil ta jtojole. Yu'un ti stuque, vinaj ti laj xi'taune, ti laj snijan xchiman sba ta jtojole.

⁶ Ti Levie laj yac' ta na'el ti bu ja' melele. Mi ja'uc jutebuc ti c'usi chopol oy ta ye ta sti'e. Cuxul lec yo'nton ti nabal ta spasel ti c'usi xco'olaj co'nton xchi'uque. Ep ti buch'utic laj sutesan sbaic yu'un ta spasel ti c'usitic chopole.

⁷ Yu'un ja' yabtelic ti paleetic ta xchanubtasel ti jnaclejetic ti ac'o xiyojtiquinique. Ja' yu'un un, scotolic ac'o yac' sjolic ti ac'o sc'anic ti tojobtasele. Ti stuquique, ja' j'al-mantal j'ich'-c'opetic yu'un ti Dios ti scotol xu' yu'une.

⁸ “Ja'uc ti vo'oxuc une, paleetic, laj xa avalopatinic comel ti lequil bee. Ti c'u s'elan lachanubtasvanique, ep xa ti buch'u ch'ay ta be avu'unique. Yu'un laj ayanijesbeic sc'oplal ti jtrate ti laj jpas ta stojol ti Levie.

⁹ Jech o xal un, ti jech mu'yuc xavaq'uicun ta ventae, ti mu co'oluc ta xapasic ta stojol scotol ti c'alal ta xachanubtasic ti jnaclejetique, jech o xal un, ta xc'ot ta pasel cu'un ti mu'yuc atuique, ti bajbil tenbil ta xac'otic yu'un scotol ti jnaclejetique.” Ti va'i s'elan taje, ja' ta xal ti Dios ti scotol xu' yu'une.

Yanijem sjol yo'ntonic ti Israele

¹⁰ ¿Mi mu junuc no'ox ti Dios ti ja' Jtotic ta jcotoltic ti Buch'u laj yac' ti jch'ulel canimatique? ¿C'u cha'al ya'yel un cha'e ti ta jlo'laan jbatic ta jujun tale, ti ta ju'tic comel ta teq'uel ti trate ti laj spas ti Dios ta stojol ti jmolmuc'totic ti laj ech'icuque?

¹¹ Ti Judae, yan sjol yo'nton ta stojol ti Diose. Spajebal xa no'ox ti c'usitic chopol ta spas ta Jerusalene, ti ta Israele. Ti Judae laj xa sju'be ta teq'uel yutsilal ti ch'ulna ti stuc'ulanoj lec ti Diose. Ti viniquetic ta jteclum Judae laj xa yajnilanic antsetic ti xrioxinojic ti va'anbil diosetique.

¹² Oc la ta alel ti tubbatuc ya'i sc'oplalic yu'un Dios ti jteclumaltic ti buch'utic yac'ojbeic yipal ta spasel ti va'i s'elan taje, mu'yuc ta alel buch'uuc no'ox, manchuc mi ta xich'ic talel ti matanaletic ta stojol Dios ti scotol xu' yu'une.

¹³ Ja'uc ti vo'oxuc une, xi s'elan avac'ojbeic yipal ta spasele: Ti xmal no'ox ti ya'lel asatic ta sba ti altar yu'un ti Diose, xchi'uc ti xamil no'ox abaic ta oq'uel ta avanele, ja' ti mu xa xmuyubaj ti Dios ta stsacboxuc ti matanale.

¹⁴ “¿C'u cha'al le' une?” xachi ta xajaq'uique. Ti Diose ja' rextico c'otem ti laj xa asutes ave ti c'usi laj aval ta stojol ti ants ti buch'u laj avic' ta aqueremale, yu'un ja' c'ot ta achi'il. Jech ti vo'ote laj aval ta stojol ti tuc' ajol avo'nton ta stojole.

¹⁵ ¿Mi mu junuc no'ox ti Dios ti buch'u laj yac' ti lum ach'ele, xchi'uc ti ch'ulel animaile? ¿C'u cha'al jech ta sc'an ti Dios ya'yel taj un cha'e? ¿Mi mu yu'unuc ta sc'an ti ac'o ayanuc nitiluletic ti ta xc'ot ta yu'untaque? Ja' yu'un un cha'e, q'uelo abaic lec xchi'uc ti ach'ulel avanimaique. Tsots sc'oplal ti mu xch'ay ta be avu'unic ti c'u s'elan laj avac' ave ati' ta stojol ti avajnil ti laj avic' ta aqueremale.

¹⁶ Xi ta xal ti Ajvalil ti scotol xu' yu'une, Dios yu'un ti Israele: “Ja' yu'un cha'e, tuc'ulano me abaic lec xchi'uc ti ach'ulel avanimaique. Mu xayanijes abaic. Mu junuc co'nton yu'un ti buch'u ta sten ti yajnile, ti ta soques sba ta spasel ti c'usitic chopol taje.”

Ti sc'ac'alil chapanele

¹⁷ Ti Diose mu xa sc'an xa'i ti ac'opique. Ja'uc ti vo'oxuc une xi to ta xajaq'uique: “¿C'usitic laj xa calbetic ti jech mu xa sc'an ta xchiquinta ti jc'optique?” Ta xavalilanic ti lec ta xa'i Dios ti buch'utic oy c'usitic chopol ta spasique, ti xmuyubaj yu'un ti avalojique. Mu xc'ot ta avo'ntonic ti tuc' sna' xchapanvan ti Diose.