Levítico 9 - Bible in Tzotzil de Chamula

Ta sliques yabtel ta paleal ti Aarone

¹ Ta xvaxaquibal c'ac'al un, ti Moisese laj sta ta iq'uel ti Aarone xchi'uc ti xnich'nabe, xchi'uc ti moletic yu'un ti israeletique.

² Xi laj yalbe ya'i ti Aarone: “Tsaco talel jcotuc ti ch'iom tot vacax ti ta xich' milel ta scoj ti mulile, xchi'uc jcotuc tot chij ti mu'yuc jutebuc ti xchopolile, ti ta xich' aq'uel ta chiq'uele, ti ta xich' aq'uel xtoc ta stojol ti Diose.

³ Yan ti israeletique, albo ya'iic ti ac'o stsaquic talel jcotuc tot tentsun ti ta xich' svocol ta milel ta scoj ti mulile, jcotuc tot vacax xchi'uc jcotuc tot chij ti jun to jabil yich'oje, ti mu'yuc jutebuc ti xchopolile yo' jech ta xich' aq'uel ta chiq'uele.

⁴ Jech xtoc, ac'o stsaquic talel jcotuc tot vacax xchi'uc jcotuc tot chij yo' jech ta xich' milel ta stojol ti Diose, ti ta xich' aq'uel ta sventa ti lajesobil o'ntonale. Ac'o yich'ic talel xtoc matanal juch'bil sat ts'unubaletic ti vots'bil ta aceitee, yu'un ti Diose ta xac' sba iluc ta jtojoltic ti c'ac'al avi tana li'e.”

⁵ Jech ti israeletique laj yiq'uic batel c'alal to sti' ti Axibalna ti bu Nupel ta bee, ti jech albatic mantal yu'un ti Moisese. Scotolic ti jteclume nopajic batel ti va'alic c'otic ta stojol ti Diose.

⁶ Va'i un, xi laj yal ti Moisese: “Ti li'e, ja' jech yaloj mantal ti Dios ti ta sc'an pasele. Pasic un, yu'un ti Diose, mu no'ox albajuc yutsil xojobal ta xac' sba iluc ta atojolic avi tana li'e.”

⁷ Laj taj une, ti Moisese xi laj yalbe ti Aarone: “Nopajan batel ta sts'el ti altare. Ac'o ti c'usi ta xich' milel ta scoj ti mulile, ja' ti chon bolom ti ta xavac' ta chiq'uel ta sventa ti xch'ayobil ti amule, xchi'uc sventa xch'ayobil smulic ti israeletique. Chapano xtoc ta yaq'uel ti matanal sventa xch'ayobil smulic ti israeletique jech c'u cha'al yaloj mantal ti Diose.”

⁸ Nopaj ech'el ta sts'el altar ti Aarone. Laj sc'ocbe snuc' ti ch'iom tot vacax ti ta xac' ta scoj ti smulique.

⁹ Jech ti xnich'nabe laj yet'esic jelavel ti ch'ich' ta stojol ti Aarone. Laj sts'aj ta ch'ich ti sni' sc'obe. Laj xjaxbe ta xulubtac ti altare. Ti scomelal xtoque, laj smal ta yoc ti altare.

¹⁰ Laj taj une, lic xchic' ta sba altar ti xepu'e, ti sq'uintaque, xchi'uc ti bu oy xepu'al ti secub ti chon bolom ti laj yich' svocol ta scoj ti mulil jech c'u cha'al albat no'ox ya'i ti Moisés yu'un ti Diose.

¹¹ Yan ti sbec'tale xchi'uc ti snuculile, laj xchic' ta loq'ueltic xa ti bu lamalic ta nacleje.

¹² Ti chon bolom ti ta xich' chiq'uel ta sventa ti matanale, ti Aarone tey laj sc'ocbe ti snuq'ue. Ti xnich'nabe ta xet'esic jelavel ti ch'ich' ta stojol ti Aarone. Laj taj xtoc une, laj smalbe ta sba ta sjoylejal ti altare.

¹³ Laj taj xtoc une, ich'bat talel ti sjole, ti c'u s'elan jecolanbil ta bojilanel ti chon bolom ti ta xich' chiq'uele, laj xchic' ta sba altar ti Aarone.

¹⁴ Laj sapbe lec ti sbiquiltaque xchi'uc ti yo'taque. Scotlej laj yich' chiq'uel ta sba altar ti chon bolom une.

¹⁵ Ti Aarone laj yac' xtoc ti matanal yu'unic ti israeletique. Yu'un com ta yoc ta sc'ob ti tentsun ti ta xich' svocol ta scoj smulic ti israeletique. Laj sc'ocbe ti snuq'ue. Laj yac' ta stojol mulil jech c'u cha'al laj spas ta ba'yele.

¹⁶ C'alal ta xac' ti chon bolom sventa ta xich' chiq'uele, jech laj spas jech c'u cha'al albil ono'ox sc'oplale.

¹⁷ Laj taj une, laj yac' xtoc ti matanal sat ts'unubile, ti laj sjop uni jopuc ti laj xchic' ta sba ti altare, xchi'uc ti matanal ti ta xich' chiq'uel ta jujun sob ic'lumane.

¹⁸ Ti tot vacaxe xchi'uc ti tot chij ti ta xac'beic yich' svocol ta milel yu'un ti israeletic sventa ti lajesobil o'ntonale, ti Aarone laj sc'ocbe snuc'. Ti xnich'nabtaque ta xet'esic jelavel ti ch'ich' ta stojole. Jech ti stuque laj smalbe ta sba ti altare xchi'uc ta sjoylejal.

¹⁹ Ja' jech xtoc ac'bat jelavel xepu'al ti tot vacaxe, xchi'uc xepu'al ti tot chije, ti snee, ti xepu'al sbiquile, ti sq'uintaque, xchi'uc ti bu oy xepu'al ti secube.

²⁰ Ma'uc no'ox taje, yu'un ti xepu'altaque, jmoj laj yaq'uic xchi'uc ti xpechelul sti' yo'ntontaque. Va'i un, ti Aarone laj xchic' ti xepu' ta sba ti altare.

²¹ Ja'uc ti xpechelul sti' yo'ntontaque, xchi'uc ti sbec'tal sbats'i o'taque, c'ajomal no'ox laj sye'ilan ta stojol Diose jech c'u cha'al albil ti Moisés yu'un ti Diose.

²² Jech ti Aarón une laj stoy batel sc'ob ta stojol ti israeletique, laj sts'uiltas. C'alal laj xa ox yac' ti c'usi laj yich' svocol ta scoj ti mulile, ti c'usi laj yich' chiq'uele, xchi'uc ti c'usi laj yich' svocol ta sventa ti lajesobil o'ntonale, laj xch'ac sba loq'uel ta sts'el ti altare.

²³ Laj taj une, jech ti Moisese xchi'uc ti Aarone ochic batel ta Axibalna ti bu Nupel ta bee. Ti c'alal loq'uic talel une, laj sts'uiltasic ti israeletique. Va'i un, ti Diose xi s'elan laj svinajes yutsil xojobal ti laj yac' iluc ta stojol scotol ti jteclume:

²⁴ Yu'un loc' talel c'oc' ta stojol ti Diose. Mu'yuc xvinaj c'uxi bat ti chon bolom ti ta xich' chiq'uele xchi'uc ti xepu'etic ti oy ta sba ti altare. Ti jech laj yilic taj une, scotol ti israeletique xmuyubajic xa lic avanicuc, xchi'uc snupilanic xa banomil laj spatan sbaic ta lum.