Levítico 6 - Bible in Tzotzil de Chamula

Ti c'usitic ta xich' milel ta scoj ti elc'anvaneje

¹ Ti Diose xi laj yal ti c'alal laj sc'opon talel ti Moisese:

² “C'alal mi oy buch'u laj xa sta ti smule, ti oy smul c'ot ta stojol ti Dios ta scoj ti laj slo'la ti xchi'ile, ti ta xc'ot xa ta pasel ti mu xa sutes ti c'usi ac'bat xch'amune, mi ja' ti c'usi ta xelc'anbee, mi ja' ti oy c'usi ta stsatsal-poje,

³ mi ja' ti ta sbis ta yu'un ti c'usi naca stamol ti bu laj stae, mi ja' ti naca lo'lavanej ta spas ti oy c'usi xac'an xa ta rextico yilele, ti c'usiuc no'ox jtosucal ti jech ta spas ti smul taje,

⁴ xcuchoj me lec c'ot ti mulile. Ja' yu'un un, ac'o sutes ti c'usi laj yelc'ane, mi ja' ti c'usi laj stsatsal-poje, mi ja' ti yeilal no'ox yu'un ta x'ac'un ta vocol ti xpatet xa o'ntonal yu'un yilele, mi ja' ti tamolil ti bu laj yich' taele,

⁵ mi ja' ti naca lo'lavanej laj spas ti c'usiuc no'ox xac'an xa ta rextico yilele. Taj une, ac'o sutesbe scotol ti yajvale. Va'i un, ti c'alal ta xich' aq'uel ti milbil matanal ta scoj ti mulile, ta xac' xtoc jch'ac ta vo'ch'ac ti c'u yepal ti c'usiuc no'ox laj stae.

⁶ Ti c'usi ta xich' svocol yu'un ta milel ta stojol ti Diose, sc'an ja'uc jcot chij ti mu'yuc jutebuc ti xchopolile, ti vo'ot ta xaval ti c'u yepal xtojolin o ta xavile, ti ja' sts'unub stuc ta xich' batel ta stojol ti palee, ti ta xich' milel ta scoj ti mulile.

⁷ Va'i un, ti palee ta sta ti ch'aybil smul ta xc'ot ta stojol Dios ti buch'u oy c'usiuc jtosucal laj sta o ti smule, ja' to jech ch'aybil ta xc'ot ti mulile.”

Bijubtasel sventa ti c'usi ta xich' chiq'uele

⁸ Ti Diose xi laj yalbe ti Moisés ti c'alal laj sc'opon talele:

⁹ “Xi s'elan xcholet xabijubtas ti Aarón xchi'uc ti xnich'nabe, sventa sc'oplal ti oy c'usi ta xich' chiq'uele: Ti milbil chon bolome, sjunul ac'ubal cajal ta xcom ta sba yac'alil ti altare yo' ta xc'ac' lec ta c'oc'.

¹⁰ Jech ti palee ta slap ti sc'u'e xchi'uc ti scom-com saquil vexe. Mi laj taj une, ta stsob loq'uel stanil ti chon bolom ti laj yich' chiq'uel ta sba ti altare. Ta xac' ta jot xocon ti altare.

¹¹ Ts'acal to un, ta xlic sjelta ti sc'u'e. Ta sjop loq'uel ti tane. Ta xbat yac' ta spat ti bu lamalic ta naclej ti bu tuc'ulanbile.

¹² “Tsots sc'oplal ti j'ech'eluc mu xtub ti c'oc' ti ta xtil ta altare. Jech ti palee, ja' yabtel jujun sob ic'luman ti ac'o yac'be ti si'ile, xchi'uc ta scajanel muyel ta ba c'oc' ti chon bolom ti ta xich' chiq'uele, xchi'uc ta xchiq'uel xtoc ta altar xepu'altac ti c'usitic ta xich' milel ta sventa ti lajesobil o'ntonale.

¹³ J'ech'eluc tilemuc ti c'oc ta altare, sc'an ti mu me xtube.

Bijubtasel ti c'u s'elan ta xich' aq'uel ti matanal sat ts'unubaletique

¹⁴ “Xi s'elan ti bijubtasel ta sventa ti c'u s'elan ta xich' aq'uel ti matanal sat ts'unubaletique: Ti paleetique, ac'o yaq'uic ta stojol Dios ti tey ta altare.

¹⁵ Ti jun yu'unic ta scotolique ta stsac jopuc ti harina ti ac'bil ta matanale, xchi'uc ti yaceiteale, jmoj xchi'uc scotol ti pom ti capal xchi'uc ti matanale, ta xchic' ta altar ti c'ot ta svulesobil o'ntonal ti jun yutsil smuil ta xich' ac'bel ti Diose.

¹⁶ Ja'uc scomelal ti matanale, ti mu'yuc ac'bil ti spajubtasobile, ta sve' ti Aarón xchi'uc ti xnich'nab ti bu yavil chapanbil ti oy ta yamaq'uil ti Axibalna ti bu Nupel ta bee.

¹⁷ Tsots sc'oplal ti mu me sta'ajesic xchi'uc ti spajubtasobile, yu'un laj cac'beic scomelal jmoton ti ta xich' chiq'uele, ti ja' jun matanal ti tsots sc'oplal ventainbil xc'ote, xchi'uc ti matanal ti ta xich' milel ta scoj ti mulil colo'ile.

¹⁸ J'ech'el ta xcom o ta stojol scotolic ti viniquetic ti ja' snitilultac ti Aarone, ti xu' ta stun ta slajesic ti c'u yepal albil sc'oplal ta xich'ic ti scomelal chic'bil matanaletic yu'un ti Diose. C'usiuc no'ox ti ech' sta ta tijbel sbec'tal ti chon bolom taje, laj sta ti tey xa jelav ti ventainbil c'ot eque.”

Ti matanal ta xaq'uic ti paleetique

¹⁹ Ti Diose xi laj yalbe ti Moisés ti c'alal laj sc'opon talele:

²⁰ “Xi s'elan ti matanaletic ta xac' ti Aarone xchi'uc ti xnich'nab ti ta xac' ta stojol Dios c'alal ta xich' ti yabtel ta paleale: chib kilo ti lequil t'ujbil harina ti ja' ta xc'ot ta matanal jech c'u cha'al ti sat jchop o ta trigoe. Ti o'lol jch'aque, ta xich' aq'uel ta sacubel osil. Ti o'lol jch'ac xtoque, ta xich' aq'uel ta smalil c'ac'al. Mu me ch'abaluc xc'ot junuc c'ac'al.

²¹ Tsots sc'oplal ti ta'ajesbil ta xaltem ti capbil lec ta aceitee, ti sbic'tal bojilan xtoque, ti jun yutsil smuil ta xich' ac'bel ti Diose.

²² Ja' jech ta xchapan xtoc ti banquilal palee, snitilul ti Aarón ti t'ujbil ta xc'ot yo' ta xcom ta q'uexolile: tsots sc'oplal ti lec ta xchiq'ue, yu'un ja' c'otem ta yu'un ti Diose.

²³ Scotol matanaletic ta xaq'uic ti paleetique, j'ech'el ac'o yich' chiq'uel, mi junuc buch'u xu' ta stun slajes.”

Ti bijubtasel yu'un ti c'usi ta xich' svocol ta scoj ti mulile

²⁴ Ti Diose xi laj yalbe ti Moisés ti c'alal laj sc'opon talele:

²⁵ “Xi xcholet xavalbe ya'i ti Aarón xchi'uc ti xnich'nabtac ti bijubtasel sventa sc'oplal ti matanal ta xich' svocol ta milel ta scoj ti mulile: Ti chon bolom ti ta xich' aq'uel ta scoj ti mulile, ta xich' c'ocbel snuc' ta stojol Dios ti bu ta xich' milel ti chon bolometic ti oy sc'oplal ta xich' chiq'uele, yu'un ja' jun ch'ul matanal xa.

²⁶ Ti pale ti ja' ta xac' ti matanal ta scoj ti mulile, xu' ta sti' ec. Ja' no'ox un, tey ta sti' ti bu chapanbil sc'oplal ti oy ta yamaq'uil ti Axibalna ti bu Nupel ta bee.

²⁷ C'usiuc no'ox ti ech' sta ta tijbel sbec'tal ti chon bolom taje, laj sta ti tey xa jelav ti ventainbil c'ot eque. Mi ch'itomtic ta xcom ta ch'ich' ti c'u'ile, tey ta xich' chuq'uel ti bu yavil chapanbil sc'oplale.

²⁸ Ti lumal bin ti bu laj yich' lacanel o sbec'tal ti matanale, ac'o yich' voq'uel. Yan ti mi ja' laj yich' lacanel o ta c'anal taq'uin bine, lec no'ox ti ja' no'ox ta xich' juxel leque, xchi'uc yuc' xi lec ta vo'.

²⁹ “Ti milbil matanal taje, c'ot ta jun ch'ul matanal. C'ajomal no'ox oy sc'oplal xu' ta sti'ic ti paleetique.

³⁰ Yan ti chon bolometic ti ac'bil ta matanal ta scoj ti mulile, ti laj yich' ech'el ti xch'ich'el ta Axibalna ti bu Nupel ta bee, ta j'ech'el mu ti'baj, yu'un c'ot ta xch'ayobil mulil ti tey ta Axibalnae. Ti matanal ti laj yich' svocol taje, ac'o yich' chiq'uel ta c'oc'.