Levítico 5 - Bible in Tzotzil de Chamula

Matanal ti ta xich' milel yu'un ti c'usiuc no'ox mulile

¹ “Mi oy buch'u ta xich' tael ta iq'uel ti ac'o yal ta jamal ti c'usi ta xjac'bate, ti ja' rextico stuc ti c'usi laj yile, mi ja' ti c'usi laj ya'ie, mi yalel xa mu xal une, laj xa sta smul. Ma'uc no'ox taje, yu'un xcuchoj me ta xc'ot ti mulile.

² “Mi oy buch'u ta spic jtosuc ti albil sc'oplal ti mu stac' piquele jech c'u cha'al ti chamem chon bolome, mi ja' ti c'usitic ta xch'i ta te'tique, mi ja' ti c'usitic ts'unbile, mi ja' ti quiletel chone, ja' jech s'elan ta q'uelel ec ti buch'u jech ta spase. Oy xa me smul ti c'alal ta xa'i ti c'usi laj spase.

³ “Mi oy buch'u ta spic ti albil sc'oplal ti mu stac' piquel ti xcuchinoj talel ti yane, mi c'usiuc no'ox yan, oy xa me smul ti c'alal ta xlic ya'i sba ti c'usi laj spase.

⁴ “Mi oy buch'u uni supul no'ox xa'i sba ti c'usiuc no'ox ta sva'an ta rextico ta anile, ti spas xa yu'un ta xa'i ti c'usiuc no'ox jtosucale, mi ja' ti c'usi leque, mi ja' ti c'usi chopole, oy xa me smul ti c'alal ta xa'i sba ti c'usi laj yale.

⁵ “Ti buch'u tabat smul yu'un ta scoj jtosuc taje, ac'o yal c'usi ti mulil ti c'otem ta pasel yu'une.

⁶ Va'i un, ac'o yac' ta stojol Dios jcotuc sme' yuni ts'unub stuc ti ta xich' svocol ta milel ta scoj ti mulil c'ot ta pasel yu'une, xu' jcotuc me' chij, mi mo'oje, jcotuc me' tentsun. Ta sventa ti milbil matanal taje, ti palee ta sta ti ch'aybil smul scolo' ta xc'ot ti buch'u jech c'ot ta pasel yu'une.

⁷ “Mi mu'yuctic lec c'usi x'ayan yu'un yo' ta sman jcotuc ti chije, ac'o yich' batel ta stojol Dios cha'cotuc tórtola, mi mo'oje, cha'cotuc bats'i paloma ti xi s'elan ta xich' aq'uel ta scoj ti mulil c'ot ta pasel yu'une. Ti jcote, ta xich' milel ta scoj ti mulile. Yan ti jcote, ta xc'ot ta chic'bil matanal.

⁸ Taj une, ac'o yich' batel ta stojol ti palee, ja' ba'yel ta xac' ti xch'ayobil mulile. Ta sts'otbe ti snuq'ue, ti mu xtuch' yu'un ta j'ech'el ti sjole.

⁹ Mi laj taj une, ta svijbe jutebuc xch'ich'el ti ch'ayobil mulil ta jotuc xocon ti altare. Ti scomelal ti xch'ich'ele, ac'o sts'ujes ta yoc ti altare. Yu'un laj yich' milel ta scoj ti mulile.

¹⁰ Yan ti xchibale, ta xchic' jech c'u cha'al albil sc'oplal ti liquem ono'oxe. Jech ti palee ta sta ti ta xch'ay smul scolo' ti buch'u jech c'ot ta pasel yu'une. Jech c'ot ta tubel ti smul scolo'e.

¹¹ “Yan ti mi mu'yuc c'usi x'ayan jutebuc yu'un yo' ta sman o cha'cotuc tórtolae, mi cha'cotuc ch'in palomae, ac'o yac' chibuc kilo harina ti lec t'ujbile ti ta xc'ot ta sventa xch'ayobil mulile. Mu me xac'be aceite, mi ja'uc pom ta sba, yu'un ja' jun xch'ayobil mulil.

¹² Taj une, tsots sc'oplal ac'o yich' batel ta stojol ti palee. Jech ti stuque ta stsac jopuc ti ja' svulesobil ta o'ntonal ti ta xich' chiq'uele, ti jmoj ta xchic' ta sba altar ti bu ta xich' chiq'uel ti yan matanaletic ta sventa yich'obil ta muc' ti Diose. Yu'un ja' jun matanal ta scoj ti mulile.

¹³ Ja' jech ti palee ta sta ti ta xch'ay smul scolo' ti buch'u jech c'ot ta pasel yu'une. C'ot ta tubel ti smule. Va'i un, ti c'u yepal scomelale, ja' xa yu'un ti palee jech c'u cha'al laj yich' pasel ti matanal ti sat ts'unubiletic ti laj yich' aq'uele.”

Ti c'usitic ta xich' milel ta scoj ti mulile

¹⁴ Ti Diose xi laj yal ti c'alal laj sc'opon talel ti Moisese:

¹⁵ “Ti buch'u mu'yuc xa'i sba c'uxi bat ti oy smul c'ote, ti ts'acal to vinaj ti ja' smul c'ot ta scoj ti mu'yuc xac' ti c'usi oy sc'oplal ti ja' yu'un ti Diose, ac'o yich' talel jcotuc sts'unub stot chij ti mu'yuc jutebuc c'usi xchopolile, ti ja' ta xich' svocol yu'un ta scoj ti smule. Ac'o yich' aq'uel ta stojol ti Diose. Ti stojol ti chij xtoque, ac'o yich' q'uelel c'u yepal plata taq'uin xtojolin o yu'un, ja' ti c'u s'elan liquem yu'unic ta ch'ulna ta sventa ti matanal yu'un ti mulile.

¹⁶ Ti buch'u jech taje, tsots sc'oplal ac'o stoj ti c'u yepal ch'ay ta yoc ta sc'ob ti c'usitic ch'acbil ta sventa yu'un ti Diose. Ja' slecoj ti ta to xac' ta stojol pale jch'ac ta vo'ch'ac ti c'u yepal ta xich' aq'uele. Mi laj taj une, ta xich' aq'uel ti chij ti ta xich' milel ta scoj ti mulile. Jech ti palee ta sta ti ch'aybil ta xc'ot smul scolo' ti buch'u jech laj spase. Tub ti mulil yu'une.

¹⁷ “Mi oy buch'u ta sta smul ta spasel ti c'usi contra xil sba xchi'uc smantaltac ti Diose, ac'o mi mu xa'i sba ti jech oy smule, yu'un tsots sc'oplal ti xcuchoj ta xcom stuc ti smule.

¹⁸ Ja' yu'un un, tsots sc'oplal ac'o yich' talel jcotuc sts'unub chij ti mu'yuc jutebuc c'usi xchopolile. Ti stojole, tey xaq'uel c'u yepal xtojolin o. Ja' jech xtoc ta xich' batel ta stojol ti palee yo' ta xc'ot ta stojol ti mulile. Ja' to jech ta xich' tael ti ta xch'ay smul ti buch'u mu'yuc xa'i c'uxi bat ti oy smul c'ote. Tub ti mulil yu'une.

¹⁹ Taje, ja' jun matanal ti ta xich' svocol ta scoj ti mulile. Yu'un ti buch'u jech ta xaq'ue, ja' ta scoj ti oy smul ta stojol ti Diose.”