Levítico 4 - Bible in Tzotzil de Chamula

Ti milbil matanaletic ta scoj ti mulile

¹ Ti Diose xi laj yalbe ti Moisés ti c'alal laj sc'opon talele:

² “Albo ya'iic ti israeletique, mi oy bu ta xc'ot ta pasel ti oy buch'u ta sta smul ta scoj ti mu'yuc xa'i c'uxi laj scontrainbe jtosuc ti mantaletic yu'un ti Diose, xchi'uc ti laj spas ti c'usi albil sc'oplal ti mu xu' jech ta xich' pasele, xi s'elan ac'o yich' pasele:

³ “Mi ja' laj sta smul ti banquilal palee, ti ta sta ta maquiel yu'un ti jteclume, tsots sc'oplal ta xac' ta stojol Dios jcotuc ch'iom tot vacax ti mu'yuc jutebuc xchopolile, ti ta xich' milel ta scoj ti smul ti laj stae.

⁴ Ta xic' batel ta stojol ti Dios ta sti' ti ochebal Axibalna ti bu nupel ta bee. Ti bu taje, ta scajan sc'ob ta sjol ti matanale. Mi laj une, ta xich' c'ocbel snuc' xtoc ta stojol ti Diose.

⁵ Ts'acal to un, ja' stuc ta stsac jutebuc xch'ich'el ti ch'in vacaxe, ti ta xich' batel ta Axibalna ti bu nupel ta bee.

⁶ Ti bu taje, ta sts'aj sni' sc'ob ti ta ch'ich'e, ti vucub velta ta slilin batel ta stojol Dios ta stuq'uil ti bu lich'il ti poc' yu'un ti Axibalnae.

⁷ Ta xjaxbe jutebuc ch'ich' xtoc ta xulubtac ti altar ti albil sc'oplal sventa xchic'obil muil pom ti oy ta stojol ti Dios ta Axibalna ti bu nupel ta bee. Ja'uc scotol scomelal ti ch'ich'e, ta smal ta yoc altar sventa xchic'obil ti matanal ti oy ta ochebal sti' ti Axibalna ti bu nupel ta bee.

⁸ Mi laj taj une, ta sloq'uesbe xepu'al sbiquil ti milbil ch'in vacax ta scoj ti mulile.

⁹ Ta sloq'uesbe xtoc ti xchibal sq'uine, ti xepu'altaque, ti xepu'al spate, ti xepu'al secube, ti jmoj ta xich' loq'uesel batel jech c'u cha'al ti sq'uintaque,

¹⁰ ti co'ol jech ta xich' pasel jech c'u cha'al laj yich' pasbel ti tot vacax ti laj yich' aq'uel ta matanal sventa ti lajesobil o'ntonale. Mi laj une, ti palee ta xchic' ta sba altar yu'un ti xchic'obil matanale.

¹¹ Yan ti snuculil ti ch'iom tot vacaxe, scotol ti sbec'tale, ti sjole, ti yo'taque, ti sbiquiltaque, ti yic'obal xch'ute,

¹² ti xcaltique, ta scotlej ti ch'iom vacaxe, ta xich' loq'uesel batel ta loq'ueltic yu'un ti Axibalna ti bu q'uelbil leque, ti bu ta xc'ot yich' jipel ti tane. Ti bu busul ti tan taje, ta xich' busanbel si' ta sba ti ta xich' tsanbel sc'ac'ale.

¹³ “Yan mi scotol ti israeletic ti mu'yuc xa'iic c'uxi chopol batique, xchi'uc ti mi mu'yuc buch'u junucal yu'unic ti laj sna' ti oy xa smulic ic'ot ti contrain xil smantaltac Dios ti c'usi chopol laj xa spasique,

¹⁴ c'alal mi vinaj lec c'u s'elan ti mulil yu'unique, tsots sc'oplal ta scomon aq'uic jcot ch'iom tot vacax ta scotolic ti ta xich' svocol ta scoj ti mulile. Ta xiq'uic batel xtoc ta Axibalna ti bu nupel ta bee.

¹⁵ Jech ti moletic yu'un ti israeletique ta scajan sc'obic ta sjol ti ch'iom tot vacax ta stojol ti Diose. Ti bu taje, tey no'ox ta sc'ocbeic snuc'.

¹⁶ Mi laj une, ti banquilal palee ta xich' batel jutebuc xch'ich'el ti ch'iom tot vacax ta Axibalna ti bu nupel ta bee.

¹⁷ Ta sts'aj sni' sc'ob ti ta ch'ich'e, ti vucub velta ta slilin batel ta stojol Dios ta yeloval ti bu joc'ol ti muc' ta poq'ue.

¹⁸ Ta xjaxbe jutebuc ch'ich' ta xulubtac ti altar ti oy ta stojol Dios ta Axibalna ti bu nupel ta bee. Scotol scomelal ti ch'ich'e, ta smal ta yoc altar yu'un ti xchic'obil matanal ti oy ta ochebal sti' ti Axibalna ti bu nupel ta bee.

¹⁹ Ja' jech xtoc ta sloq'uesbe scotol xepu'al ti ch'iom tot vacaxe, ti ta xchic' ta altare.

²⁰ Ti xcaltique, jbel sc'oplal jech ta xich' pasbel ti ch'iom tot vacax jech c'u cha'al ti jcot tot vacax ti laj yich' milel ta scoj ti mulile. Jech ti pale une ta sta ti ta xch'ay ti smul scolo'ique. Tub ti mulil colo'ile.

²¹ Ts'acal to un, ta xich' loq'uesel batel ti ch'iom tot vacax ta loq'ueltic yu'un ti Axibalnae. Ta xchiq'uic jech c'u cha'al laj spasbeic ti ba'yel ch'iom tot vacaxe. Yu'un ja' laj yich' svocol yu'un ta scoj smulic ti jteclume.

²² “Mi ja' jun banquilal laj sta smul ti oy bu laj scontrainbe smantaltac ti Ajvalil Dios yu'une, oy ono'ox smul, ac'o mi ma'uc ta yutsil yo'nton laj spas.

²³ C'alal ta xil ti ja' mulil ti c'usi laj spase, tsots sc'oplal ac'o yic' batel ta matanal jcotuc tot tentsun ti mu'yuc jutebuc ti xchopolile.

²⁴ Ta scajan sc'ob ta sjol ti tentsune. Ta xich' c'ocbel snuc' ta stojol Dios ti bu ta xich' milel ti chon bolometic ti oy sc'oplal ta xich' chiq'uele, yu'un ta xich' svocol ta scoj ti mulile.

²⁵ Mi laj une, jech ti palee ta sts'aj jutebuc sni' sc'ob ta xch'ich'el ti chon bolom ti ta xich' milel ta scoj ti mulile. Ta xjaxbe ta xulubtac ti altar ti ja' xchic'obil ti matanale. C'alal mi jech laj spase, ti scomelal ti ch'ich'e, ta smal ta yoc ti altare.

²⁶ Va'i un, ta xchic' scotol ti xepu'al ta sba ti altare jech c'u cha'al laj yich' pasbel xepu'al ti laj yich' milel ta matanal ta sventa ti lajesobil o'ntonale. Jech ti pale une ta sta ti ta xch'ay smul scolo' ti banquilale. Tub ti mulil colo'ile.

²⁷ “Mi laj sta smul junuc xocol vinic ti mu sna' mi ja' smule, oy ono'ox smul ta scoj ti ta scontrainbe smantaltac ti Diose.

²⁸ C'alal ta xil ti ja' mulil ti c'usi laj spase, tsots sc'oplal ac'o yic' batel ta matanal jcotuc me' tentsun ti mu'yuc jutebuc xchopolile, ti ja' ta xc'ot ta matanal ta scoj ti smul laj stae.

²⁹ Ta scajan sc'ob ta sjol ti chon bolom ti ta xc'ot ta matanal ta scoj ti smule. Ta xich' c'ocbel snuc' ti bu ta xich' chiq'uel ti matanaletique.

³⁰ Va'i un, ti pale une ta sts'aj jutebuc sni' sc'ob ta ch'ich'. Ta xjax ta xulubtac ti altar ti ja' xchic'obil ti matanale. Ja'uc scotol scomelal ti ch'ich'e, ta smal ta yoc ti altare.

³¹ Ja' jech xtoc tsots sc'oplal ta sloq'uesbe scotol ti xepu'ale jech c'u cha'al laj yich' pasbel ti jcot chon bolom ti laj yich' aq'uel ta matanal ti laj yich' milel ta sventa ti lajesobil o'ntonale. Ta xchic' ta altar ti jun yutsil smuil ta xich' ac'bel ti Diose. Jech ti pale une ta sta ti ta xch'ay smul scolo' ti buch'u taje. Tub ti mulil colo'ile.

³² “Yan ti mi ja' jcot chij ta xac' ta milel ta scoj smul ti buch'u taje, ac'o yic' talel jcotuc me' chij ti mu'yuc jutebuc xchopolile.

³³ Ta scajan sc'ob ta sjol. Ta xich' c'ocbel snuc' ti bu ta xich' chiq'uel ti chon bolometic ti ja' jun matanal yu'un ti mulile.

³⁴ Va'i un, ti palee ta sts'aj jutebuc sni' sc'ob ta xch'ich'el ti chon bolom ti laj yich' svocol ta scoj ti mulil colo'ile. Ta xjaxbe ta xulubtac altar yu'un ti xchic'obil matanale. Ja'uc scotol scomelal ti ch'ich'e, ta smal ta yoc ti altare.

³⁵ Mi laj taj une, ta sloq'uesbe xtoc scotol ti xepu'ale jech c'u cha'al laj yich' pasbel ti chij ti laj yich' aq'uel ta milel ta sventa ti lajesobil o'ntonale. Ta xchic'be ti xepu'al ta altare co'ol xchi'uc ti yan matanaletic ti ta xchiq'uic ta sventa yich'el ta muc' ti Diose. Jech ti pale xtoc une ta sta ti ta xch'ay ti c'u s'elan staoj smul scolo' ti buch'u taje. Tub ti mulil colo'ile.