Levítico 3 - Bible in Tzotzil de Chamula

Ti milbil matanaletic ta sventa ti lajesobil o'ntonale

¹ “Ti mi oy buch'u ta xac' ta matanal ta stojol Dios jcotuc me' vacax, mi tot vacax, ti ta xich' svocol ta sventa ti lajesobil o'ntonale, ti chon bolom ti ta xich' aq'uel ta matanale, tsots sc'oplal ti mu'yuc jutebuc ti xchopolile.

² Ti buch'u ta xac' ti matanale, ta scajan sc'ob ta sjol ti chon bolom ti ta xich' aq'uele. Va'i un, ta xich' c'ocbel snuc' ta sti' ochebal Axibalna ti bu nupel ta bee. Jech ti paleetique, ja' yabtelic ta sbonbe ta ch'ich' ta sba xchi'uc ta sjoylej stsectac ti altare.

³ “Ti buch'u ta xac' ti chon bolom ti ta xich' milel ta sventa ti lajesobil o'ntonale, tsots sc'oplal ti ja' jun matanal ti chic'bil ta xac'be ti Diose. Yu'un ti xepu'al sbiquil ti chon bolome,

⁴ ti sq'uintac xtoque, ti xepu'ale, ti xepu'al spate, ti bu oy xepu'al ti secube, tsots sc'oplal ac'o yich' loq'uesbel jmoj jech c'u cha'al ti sq'uintaque.

⁵ Jech ti paleetique ta xchiq'uic scotol ta sba ti altar taje, jmoj xchi'uc ti chon bolom ti bu ta xtil ti si'e. Yu'un ja' jun chic'bil matanal ti jun yutsil smuil ta xich' ac'bel ti Diose.

⁶ “Mi oy buch'u ta xac'be ta smoton Dios jcotuc ti yuni chij ti ta xich' svocol yu'un ta sventa ti lajesobil o'ntonale, tsots sc'oplal ta xac' mi jcot stot, mi ja' jcot sme' ti mu'yuc jutebuc xchopolile.

⁷ Mi ta xac' ta matanal jcot ch'iom tot xchije, c'alal ta xc'ot ta stojol ti Diose,

⁸ ac'o scajan sc'ob ta sjol. Va'i un, ta xich' c'ocbel snuc' ta ochebal sti' ti Axibalna ti bu nupel ta bee. Ja' jech xtoc un, ti paleetique ta sbonbeic xch'ich'el ti chon bolom ta sba xchi'uc ta sjoylej stsectac ti altare.

⁹ “Ti buch'u ta xac' ta matanal ti chon bolom yo' ta xich' svocol ta sventa ti lajesobil o'ntonale, tsots sc'oplal ta xac' ta stojol Dios ti xepu'ale, ti sne ti c'ocbil loq'uel sjunul ti bu c'alal tsacale, ti xepu'altac sbiquile,

¹⁰ ti sq'uintaque, ti xepu'altac sq'uine, ti xepu'al spate, ti bu oy xepu'al ti secube ti oy sc'oplal ti jmoj ta xich' loq'uesel xchi'uc ti sq'uintaque.

¹¹ Mi laj taj une, jech ti paleetique ta xchiq'uic scotol ta sba ti altare, ti ja' sc'oplal jun matanal ve'lil laj yich' chiq'uel ta sventa yich'el ta muc' ti Diose.

¹² “Mi ta xac' ta matanal jcot tentsune, c'alal yorail xa ta xich' aq'uel ta stojol ti Diose,

¹³ ac'o scajan sc'ob ta sjol. Tsacal to ta xich' c'ocbel snuc' ta ochebal sti' ti Axibalna ti bu nupel ta bee. Jech xtoc ti paleetic une ta sbonbeic xch'ich'el ti chon bolom ta sba xchi'uc ta sjoylej stsectac ti altare.

¹⁴ “Ti buch'u ta xac' ta matanal ti chon bolom taje, oy ta stojol ta yaq'uel xchiq'uel ta sventa yich'el ta muc' ti Diose, scotol ti xepu'al sbiquile,

¹⁵ ti xchibal sq'uine xchi'uc ti xepu'altaque, ti xepu'al spate, ti oy bu xepu'al ti secube, ti tsots sc'oplal ac'o yich' loq'uesel scotol jmoj xchi'uc ti sq'uintaque.

¹⁶ Mi laj taj une, jech ti paleetique ta xchiq'uic scotol ta sba ti altare, ti ja' sc'oplal jun matanal ve'lil laj yich' chiq'uele, ti jun yutsil smuile. Scotol ti xepu'ale, ja' yu'un ti Diose.

¹⁷ “Xi s'elan ta xal ti c'usi tsots albil sc'oplale, ti ich'biluc ta muc' sbatel osil ti ta x'ech'ic ti totil me'iletique, ti alab nich'nabiletic ti buyuc no'ox nacalique: J'ech'eluc mu xati'ic ti xepu'e, ti ch'ich'e.”