Levítico 24 - Bible in Tzotzil de Chamula

Ti aceite ti ta xtun ta sventa ti lamparaetique

¹ Ti Diose xi laj yalbe ti Moisés ti c'alal laj sc'opon talele:

² “Albo ya'i mantal ti israeletique ti ac'o yich'boxuc talel ti bats'i yaceiteal olivoe yo' jech staoj yav tsanal ti lamparaetique.

³ Ja' ta sbain ta xchapanel ti Aarone yo' jech tsanal o sjunul ac'ubal ta stojol Dios ta Axibalna ti bu ti nupel ta bee, ta spat ti bu lich'il ti muc' ta poc' ta sts'el xcaxail ti tratee. Taje, ta xc'ot ta jbel c'usi albil ti tsots sc'oplal ti na'bil ta xcom o ta atojolique, ti ta x'ech' ta stojolic ti totil me'iletique xchi'uc ti alab nich'nabe.

⁴ Tsots sc'oplal ta xchapan lec ta meltsanel ti lamparaetique, ti co'ol s'elan spajleb cantila ti naca bats'i oroe yo' jech ta xtil ta stojol ti Diose.

Sc'oplal ti pan ti ta xich' aq'uel ta tojolile

⁵ “Tsaco jopuc ti lequil t'ujbil harinae. Ta'ajeso lajchebuc muc'tic panetic ti yich'oj o'lol yo'obal kilo ti jujubeje.

⁶ Va'i un, cajano ta ba mexa ti ja' meltsanbil ta bats'i oro ti oy ta stojol ti Diose. Cholo ta cha'chol ti vacbej muc'tic pan ti jujuchole.

⁷ Ac'bo bats'i pom ti jujuchole, ti ta xtun ta sventa matanal svulesel ta o'ntonal ti ta xich' chiq'uel ta stojol ti Diose.

⁸ Taje, tsots sc'oplal ti ta xich' aq'uel ta stojol ti Diose ti c'alal ta sta sc'ac'alil ti cuxob o'ntonale, ti ja' jun trate sbatel osil ta sventa ti israeletique.

⁹ Taje, ja' me ti ta xc'ot ta spuculal ti Aarone xchi'uc ti snitilultaque, ti tsots sc'oplal ta sve'ic ti bu tuc'ulanbil leque. Yu'un ti matanaletic ti ta xich' chiq'uel sventa yich'el ta muc' ti Diose, ja' ti ech'em jelavem ts'uiltasbil ta j'ech'ele.”

Ti buch'u ta soquesbe yo'nton ti Diose, ta xich' tsitsel

¹⁰ Ti jech yorail ta vo'ne taje, oy jun yol me' israelita ants, ti ja' egipcio vinic ti stote, ti jmoj ch'iic xchi'uc xnich'nab ti israeletique. Ti yol xtoc ti me' israelita antse laj stsac ta c'op jun bats'i israel vinic ti bu lamalic ta nacleje.

¹¹ Ti squerem ol ti me' israel antse laj soquesbe yo'nton ti Diose. Laj sbis ta cotol chaval. Va'i un, laj yiq'uic batel ta stojol ti Moisese. Sbi ti sme' taje, ja' Selomit, yantsil nich'on ti Dibrí ti ayan talel sts'unubal ta stojol snitilultac ti Dane.

¹² Va'i un, lic yich' chabiel lec yu'unic yo' jech ta smalaic ya'iic c'u s'elan ta x'albatic yu'un Dios ti c'usi xu' ta spasbeique.

¹³ Ti Diose laj sc'opon talel ti Moisés ti xi laj yalbe ya'ie:

¹⁴ “Loq'ueso batel ti bu lamaloxuc ta naclej ti buch'u laj sbisun ta cotol chavale. Scotolic ti buch'u laj ya'iic ti c'u s'elan c'opoje, ac'o scajan sc'obic ta sjol. Mi laj taj une, ac'o lomatuc ta milel ta ton yu'un scotol jteclum ti vinic taje.

¹⁵ Ta sventa ti israeletique, xi xcholet xavalbe ya'i jech c'u cha'al li'e: Ti buch'u ta soquesbe yo'nton ti ta sbis ta cotol chaval ti Ajvalil ti ja' Dios yu'une, ac'o xcuch o comel ti smule.

¹⁶ Va'i un, ta xich' milel ta ton yu'un scotol ti xchi'iltaque. Ti jech taj une, ja' jech ta xich' ec ti jyanlumetique jech c'u cha'al ti yajval lumetique. Yu'un ti buch'u ta soquesbe yo'nton ti Diose, chapal sc'oplal ta xich' milel.

¹⁷ “Ti buch'u ta xtuch'be xcuxlej ta milel ti jun xchi'ile, chapal sc'oplal ta xich' milel ec.

¹⁸ “Ti buch'u ta smil jcotuc vacaxe, xi s'elan ta xc'ot ta stojole: Ja' no'ox jech jcot vacax ta xq'uexta sutel.

¹⁹ “Ti buch'u ta xac'be svocol junuc xchi'il ti ta steclumale, ja' ono'ox jech ta xich' ec, yu'un xi s'elan ta xc'ot ta stojole:

²⁰ Ti buch'u ta sc'asvane, ja' jech ta xich' c'asel ec. Ti buch'u laj stub satile, ja' jech ta xich' tubbel ec. Ti buch'u laj sc'as stanal eale, ja' jech ta xich' c'asbel ec. Ta xa'ibe yutsil ta sbec'tal stuc ec ti c'usi laj spasbe ti xchi'ile.

²¹ “Ti buch'u ta smil jcotuc chon bolome, tsots sc'oplal ta xq'uexta. Ti buch'u ta smil junuc vinique, chapal sc'oplal ta xich' milel ec.

²² “Ti jbel ti c'usi tsots albile, oy yip ta stojol ti jyanlumetique xchi'uc ta stojol ti bats'i yajval lumetique. Yu'un vu'un ti Ajvalil Diosun avu'unique.”

²³ Va'i un, ti Moisese laj sc'oponan ti israeletique. Tey laj xchechic loq'uel ta sti'il jteclum ti buch'u laj sbis ta cotol chaval ti Diose. Tey laj slomic ta milel ta ton. Jech laj spasic ti israeletic jech c'u cha'al albat mantal ti Moisés yu'un ti Diose.