Levítico 19 - Bible in Tzotzil de Chamula

Ti c'usi tsots sc'oplal albil ta sventa ti lequilale xchi'uc ti tuc'uc ti snopbenale

¹ Ti Diose xi laj yalbe ti Moisés ti c'alal laj sc'opon talele:

² “Xi xcholet xavalbe ya'iic scotol ti c'u yepal oy ti israeletic jech c'u cha'al li'e: Oyuc alequilalic avutsilalic, yu'un ti vu'un Ajvalil Diosun avu'unique, jelavem jlequilal cutsilal ta j'ech'el.

³ “Ti jujunoxuque, bic'tajeso abaic ta snijanel xchimanel abaic ta yich'el ta muc' ti atotique xchi'uc ti ame'ique. “Ich'ic ta muc' xtoc ti sc'ac'alil cuxob o'ntonale. Yu'un vu'un ti Ajvalil Diosun avu'unique.

⁴ “Mu xanijan xachiman abaic ta sts'ac-patiel ti c'usi meltsanbil ta c'abale. Mi ja'uc xameltsan ta xrioxinel ti ulesbil ta taq'uine. Yu'un vu'un ti Ajvalil Diosun avu'unique.

⁵ “C'alal ta xavac'beic Dios ti oy c'usi ta xich' svocol ta sventa ti slajesobil o'ntonale, ja' me pasic ti c'u s'elan ich'bil tsacbil ta muc' ta xc'ot yu'un ti Diose.

⁶ Ti chon bolom ti ta xich' aq'uele, ta sc'ac'alil no'ox, tsots sc'oplal ac'o yich' ti'el. Xu' to ta xich' ti'el ta yoc'omal xtoc. Ja'uc ti c'u to yepal com to scomelal ta yoxibal c'ac'ale, tsots sc'oplal ac'o xa yich' chiq'uel.

⁷ Yan ti mi ta to xich' ti'el ti scomelal matanal ta yoxibal xa c'ac'ale, mu'yuc xa yutsil, mu'yuc xa tsacbil ich'bil ta xc'ot yu'un ti Diose.

⁸ Ja'uc ti buch'u ta sti'e, cajal ta xc'ot ta sba ti smule. Tenbil ta xloc' yu'un ti slumal ta scoj ti laj soquesbe sc'oplal ti c'usi c'ot ta yu'un ti Diose.

⁹ “C'alal ta sta yorail ta xich' tuch'el ti ts'unubile, mi ja'uc xabejel tsob ta j'ech'el ti ats'unub ti oy ta avosile, mi ja'uc xabejel c'uxc'ulta ta j'ech'el ti bu to come.

¹⁰ Mi ja'uc xabejel c'uxc'ulta ta j'ech'el ti sat uvatic ti c'alal ta xatul ti oy ta avosile. Mi ja'uc xabejel tsob ti lamal ta lumtique. Comuc xa ta sventa ti me'un mu'natetique xchi'uc ti jyanlumetique. Yu'un vu'un ti Ajvalil Diosun avu'unique.

¹¹ “Mu xa'elc'ajic. Mu xajutic c'op. Mi ja'uc xalo'laan abaic.

¹² “Mu ta jeche'uc no'ox xava'anun ta rextico ti co'ol s'elan xc'ot xa xac'opoj yilele, yu'un ta xasoquesbe sc'oplal ti Dios avu'une. Yu'un vu'un ti Ajvalilune.

¹³ “Mu xapas ti cajal ta xavac' aba ta yilbajinel ti achi'ile. Mi ja'uc xapojbe ti c'usi ja' yu'une. “Mu me yanuc to c'ac'al xatoj ti j'abtele ti xu' no'ox ta xava'i ti achabiojbe ti stojole.

¹⁴ “Mu xabis ta cotol chaval ti jmacal-chiquine. “Mu me stsuculin yacan avu'un ti ma'sat ti bu ta x'ech' ta sbee. Vinajuc ta j'ech'el ti biq'uit avac'oj aba ta stojol ti Diose. Yu'un vu'un ti Ajvalilune.

¹⁵ “Ti c'alal xi s'elan ta xaval ti buch'u ta xachapbe sc'oplale, mu xapas xajoybin ti c'ope: Mu xapoj ti buch'u mu xu' yu'un ta spoj sbae. Mi ja'uc xapacbe sc'oplal ti buch'u xi'bile. Ja' me tamo ta spasel ti lequil chapel ti c'alal ta xachapanvane.

¹⁶ “Mu xapas ti xava'vunet ta spuquel slo'iltael ti achi'iltaque. “Mu xatic' aba ta smilel ti achi'ile. Yu'un vu'un ti Ajvalilune.

¹⁷ “Mu me teyuc tic'luc o ta avo'nton ti xti'et ajol ta scontrainel ti avinquilele. “Tojobtaso ta stuq'uibtasel ti achi'il ti bu oy smelol stac' tojobtasele. Mu me lecuc xa xava'ibe ti ta xatic' aba yu'un ti smule.

¹⁸ “Mu me ja'uc xapas ti ta xa xapac ava'i sutele. Mi ja'uc ti xti'et xa xcapet xa ajol ta stojol ti avinquilele. C'uxubino ti avinquilel jech c'u cha'al ta xac'uxubin abae. Yu'un vu'un ti Ajvalilune.

¹⁹ “Chano ta spasel ti oy c'usi tsots albil sc'oplale. “Mu xavac' cuchumajuc ti ats'unubtac ta c'usiuc no'ox yan sts'unubale. “Mu xacap ta ts'unel ta avosil ti c'usiuc no'ox yan sts'unubale. “Mu xalap ti c'u'il ti ep ta tos snaul meltsanbile.

²⁰ “Mi oy buch'u ta sta ta chi'inel ta vayel jun mosovil ants ti oy xa sc'oplal yu'un yan vinique, ja' no'ox un ti mu'yuc to manbile, ti mu'yuc to colem loq'uel ta mosovile, ta stojic lec ta nucul ti xcha'vo'alique. Ja' no'ox un, mu'yuc sc'oplal ta xich'ic milel, ja' ti mu'yuc to manbil loq'uele.

²¹ Jech ti vinique ta xic' talel jcotuc tot chij ta stojol ti Dios ti ta xich' svocol yu'un ta scoj ti c'usi chopol laj spase, ti ta xic' talel ta ochebal sti' ti Axibalna ti bu nupel ta bee.

²² Ta sventa ti jcot chij taje, ti ta xich' svocol ta scoj ti colo'ile, jech ti pale une ta sc'anbe Dios ti ac'o ch'aybatuc smul ti vinic taje. Jech ti bu laj sta smule, ch'aybil xc'ot.

²³ “C'alal mi la'ochic batel ta jteclume, mi laj ats'unic ti te'etic ti stac' lo'bel sate, ti oxib jabil sjalile, tsots sc'oplal mu stac' xatuch'beic ti sate, mi ja'uc ta xalo'beic.

²⁴ Ta xchanibal to jabil un, ta xc'ot ta yu'un Dios scotol ti sat te'etic c'alal ta xapasbeic ti sq'uinale.

²⁵ Ta yo'obal to jabil un, xu' xalo'beic ti sate. Jech ti te'e ta xac' ep ti sate. Yu'un vu'un ti Ajvalil Diosun avu'unique.

²⁶ “Ta j'ech'el mi ja'uc xati'ic jset'uc ti c'usi oy xch'ich'ele. “Mu xachanic ti t'unvaneje. Mi ja'uc xachanic ta scaj'alel ti oy c'usi ta xc'ot ta pasel le' to batele.

²⁷ “Mi ja'uc set-set xaloc' ti ajolique. Mi ja'uc xasetic ti sba sni'tac avisimique.

²⁸ “Mu xayayijes abaic ta silel abec'talic ta scoj ti oy buch'u ta xchame. Mi ja'uc oy c'usi jtosucal xabonbe abaic. Yu'un vu'un ti Ajvalilune.

²⁹ “Mu xasoquesbe sc'oplal ta xchonel sba avu'un ti atsebe. Mu xasoques ti jteclum ta yepajesel ti c'usi ja' ta soquesvan ta j'ech'ele.

³⁰ “Ich'ic ta muc' ti sc'ac'alil cuxob o'ntonale. Nijano chimano abaic ta stojol ti jch'ulnae. Yu'un vu'un ti Ajvalilune.

³¹ “Mi ja'uc xanaban abaic ta sts'ac-patiel ti buch'u xilic ti toyol cajale, xchi'uc ti jt'unvanejetique. Mu xasoques abaic yu'un ta scoj ti oy c'usi ta xajac'beique. Yu'un vu'un ti Ajvalil Diosun avu'unique.

³² “Bic'tajeso aba ta stojol ti buch'u vulem xa xch'ulelique. Va'ano aba, c'opojan. Ac'o ta ilel ti abic'tajesoj aba ta stojol ti Dios avu'une. Yu'un vu'un ti Ajvalilune.

³³ “Mu xavilbajin ta yilbel svocol ti jyanlumetic ti nacal ta atojolique.

³⁴ Biso ta junuc achi'ilic. Oyuc syail xc'uxul avo'nton ta stojol, yu'un co'ol oy ach'ulelic. Ma'uc no'ox taje, yu'un jyanlum la'ech'ic ta Egipto. Yu'un vu'un ti Ajvalil Diosun avu'unique.

³⁵ “C'alal oy c'usi va'al sbisol ta xich' bisele, ti c'usi chechbil ta xich' bisele, mi ja' ti c'usi cunul ta xich' bisele, mu xalo'lavanic xchi'uc.

³⁶ Ts'acaluc lec sbisoltac ti c'usi chechbil ta xich' bisele, sbisoltac ti c'usi cunanbil ta xich' bisele, xchi'uc ti c'usi ta xich' bisel ta yalale. Yu'un vu'un ti Ajvalil Diosun avu'unic ti laj jloq'uesoxuc talel ta Egiptoe.

³⁷ “Ja' yu'un un, chanic ta spasel ti oy c'usi jbel tsots albile, ti c'usi nopbil cu'une. C'otuc ta pasel avu'unic. Yu'un vu'un ti Ajvalilune.”