Levítico 18 - Bible in Tzotzil de Chamula

Ta j'ech'el mu stac' xich' tael ta xchi'inel ti ma'uc sventae

¹ Ti Diose xi laj yalbe ti Moisés ti c'alal laj sc'opon talele:

² “Xi xcholet xavalbe ya'i ti israeletic jech c'u cha'al li'e: Vu'un ti Ajvalil Diosun avu'unique.

³ “Mu xachanbeic stalel ti c'u s'elan ta spasic ti egipcioetic ta jteclum ti bu lanaquiic to oxe. “Mu xachanbeic stalel ti c'u s'elan ta spasic ti cananeoetic ta jteclum ti bu ta xquic'oxuc batele. Mi ja'uc xachanbeic ta spasel ti c'u s'elan liquem yu'unic ti oy c'usi jbel tsots albil yu'unique.

⁴ “C'otuc ta pasel avu'unic ti c'u s'elan caloje. Chanic ta spasel ti oy c'usi jbel tsots sc'oplal albile. Ch'ian c'opojanic ta spasel. Vu'unun ti Ajvalil Dios avu'unique.

⁵ “Chanic ta spasel ti oy c'usi tsots jbel albile, ti c'usitic nopbil cu'une. Ti buch'u ta xc'ot ta pasel yu'une, ta xch'i xc'opoj. Yu'un vu'un ti Ajvalilune.

⁶ “Ta jbel sc'oplal mu stac' mi junuc vinic ta xnopaj ta sta ta chi'inel sbaic ti c'alal ja' yuts' yalaltaque. Yu'un vu'un ti Ajvalilune.

⁷ “Mu xacus ta avic'obal ti atot ti lec xa xava'i ta xata ta chi'inel ti ame'e. Ta j'ech'el mu stac' ti jech ta xapase, yu'un ja' ame'.

⁸ “Mu xacus ta avic'obal ti atot ti lec xa xava'i ta xata ta chi'inel ti yajnile.

⁹ “Mu stac' xata ta chi'inel ti achi'il ta voq'uele, mi ja' ti jun atotic xchi'uque, mi ja' ti jun ame'ic xchi'uque, mi ja' ti lavoq'uic ta jun na xchi'uque, mi ja' voc' talel ta yan nae. Ta jbel sc'oplal mu stac' xata ta chi'inel.

¹⁰ “Mu xavac' aba ta q'uexlal atuc ti ta xata ta chi'inel ti amome, mi ja' ta sventa yantsil nich'on ti aquereme, mi ja' ta sventa yantsil ol ti atsebe. Ta j'ech'el mu stac' xata ta chi'inel.

¹¹ “Mu stac' ta xata ta chi'inel yantsil ol ti yajnil atote, yu'un ja' xnich'on ti atote, yu'un ja' achi'il ta voq'uel. Ta j'ech'el mu stac' xata ta chi'inel.

¹² “Mu stac' xata ta chi'inel ti xchi'il ta voq'uel ti atote, yu'un ja' jun xch'ich'elic xchi'uc ti atote.

¹³ “Mu stac' xata ta chi'inel ti xchi'il ta voq'uel ti ame'e, yu'un ja' jun xch'ich'elic xchi'uc ti ame'e.

¹⁴ “Mu xacus ta avic'obal ti ajuntote, ti ta xata ta chi'inel ti yajnile, yu'un ja' ajunme'.

¹⁵ “Mu stac' xata ta chi'inel ti avalibe, yu'un ja' yajnil anich'on. Ta j'ech'el mu stac' xata ta chi'inel.

¹⁶ “Mu xacus ta avic'obal ti achi'il ta voq'uel ti ta xata ta chi'inel ti yajnile.

¹⁷ “Mu stac' xata ta chi'inel xchi'uc ti ants taje, mi ja'uc ti yantsil ol taje, mi ja'uc ti smome, mi ja'uc ti yantsil nich'on ti squereme, mi ja'uc ti yantsil ol ti stsebe. Taje, toj ech'em chopol ta j'ech'el, yu'un jun ach'ich'elic xchi'uc.

¹⁸ “Mu stac' xavajnilin ti xchi'il ta voq'uel ti avajnile. Mi ja'uc stac' xata ta chi'inel ti c'alal cuxul to ti avajnile yo' mu scontrain sbaic.

¹⁹ “Mu stac' xata ta chi'inel jun ants ti c'alal yorail ta xil ti xchamele.

²⁰ “Mu stac' xaluts'be yajnil ti achi'ile. Mi ja'uc xata ta chi'inel ti ta xasoques aba yu'un ta scoj taje.

²¹ “Mi junuc anich'on xavac' ta smoton ti dios Moloque. Ti jech taje, mu xasoquesbe sc'oplal ti Dios avu'une. Yu'un vu'un ti Ajvalilune.

²² “Mu xata ta chi'inel vinic ti co'ol xa s'elan ta xabis ta jun ants ta xchi'inele. Ti jech taje, yu'un ch'abal xa ch'ulelil ta j'ech'el.

²³ “Mu xata ta chi'inel abaic xchi'uc junuc chon bolometic yo' jech mu xasoques aba ta scoj taje. Ja' jech xtoc ti antse mu me stac' sta sbaic ta chi'inel junuc chon bolometic. Ti mi jech taje, yu'un ch'abal xa ch'ulelil ta j'ech'el.

²⁴ “Mu xasoques abaic yu'un jtosuc taje. Yu'un ja' jech laj soques sbaic ti jteclumetic ti laj avilic ta aba ta asatic ti vu'un ta jip loq'uele.

²⁵ Va'i un, soquem com yu'un ti steclumalique. Ja' no'ox un, vu'un laj quich'be ye sti'ic yu'un ti xchopolalique. Jech ti lume laj sten loq'uel ti jnaclejetic yu'une.

²⁶ Ja'uc ti vo'oxuc une, israeletic xchi'uc ti jyanlumetic ti achi'inojic ta nacleje, chanic ta spasel ti oy c'usi jbel tsots albile xchi'uc ti c'usitic nopbil cu'une. Mi ja'uc xapasic jtosuc ti c'usitic xu' ta xasoques abaic xchi'uque.

²⁷ Yu'un scotol ti c'usi chopol taje, ja' jech laj spasic ti jnaclejetic ti naquiic li' ta lum ti c'alal mu to ta xc'ot naclanique. Jech o xal un, soquem com ti banomil yu'unique.

²⁸ Yu'un ma'uc me xataic o tenel loq'uel yu'un ti lume ta scoj ti xi'bal sba xch'amaj ti achopolalique jech c'u cha'al tenatic loq'uel ti ba'yel jnaclejetic ta lum ti c'alal mu'yuc to ox ta xavulic ta nacleje.

²⁹ Ti buch'uuc no'ox ta spas jtosuc ti va'i s'elan toj chopol taje, ta xtenat loq'uel yu'un ti steclumale.

³⁰ Ja' yu'un un, chanic ta spasel ti c'usitic caloje. Mi ja'uc xachanic ta spasel ti c'usi toj chopol jech c'u cha'al laj spasic ti buch'utic ba'yel vulic ti c'alal mu'yuc to ox ta xavulic ta loq'uele. Mi ja'uc xasoques abaic xchi'uc jtosuc taje. Yu'un vu'unun ti Ajvalil Dios avu'unique.”